السلام عليكم ورحمة اللهى وبركاته

كيفكم أعضاء وزوار آرتين

بالحقيقة ... هالموضوع بالذات اللي راح أطرحو عليكم هلأ هو عبارة عن رد ألي بمشاركة لأحد الأعضاء
لكن ونظرا لأني حبيت أنو يستفيد الجميع من هالموضوع حبيت أنو حط مشاركتي موضوع مستقل ... حتى يدخل عليه أكبر قدر من الأشخاص ويستفيدو منو بإذن الله

// وقبل ما أبدأ ... ترا كلشي مكتوب بهالموضوع هو ناتج عن خبرتي الذاتية وكل اللي كاتبو مجربو بنفسي ... وبتمنى اللي عندو أي اضافة أنو يفيدنا //

بس الله الرحمن الرحيم نبدأ ....


بالبداية الفرق بين مسطلح فرمتة ومسطلح سوفت وير بما يخص الجوالات تحديدا
الفرمتة:هي تماما عملية استعادة ضبط المصنع للجهاز / يعني لما منفرمت الجوال برجع كأنو هلأ مشترينو بدون ما يتغير فيه ولا شي /
وللقيام بهالعملية في عندنا طريقتين راح أشرحهم بعد شوي .

السوفت وير :هي عملية إزالة نظام الجهاز الموجود عليه إزالة تامة ... ومن ثم تنزيل نظام جديد / يعني بوضوح متل عملية الكومبيوتر تماما . شفتو لما بنفرمت جهاز الكومبيوتر . بالأول بنحذف النظام وبعدين بنزل النظام من أول وجديد / وهوني الفرق بين الفرمتة والسوفت وير

باختصار:
الفرمتة : تحديث لنظام الجهاز / وهالعملية بنقوم فيها لما بكون مثلا نازل فيروس عالجهاز ، أو مثلا إعداداتو ملخبطة ... وفي ملاحظة مهمة كتير بدي قلكم ياها أنو عملية الفرمتة ما بتشيل الباسوورد إذا ضاع .
أما السوفت وير : تغيير النظام / وهي العملية بنقوم فيها لما بكون في اخطاء برمجية موجودة بالجوال .. أو إذا كان الجوال عم بعلق كتير ... وإذا كان نازل عالجوال / الفيروس الأخضر / وهدا أقوى أنواع الفيروسات اللي ممكن تصيب أجهزة الهاتف المحمول ... / يعني باختصار عملية السوفت وير بنقوم فيها بحالتين وهي أنو يا أما بكون نظام الجهاز منصاب بعلة كبيرة ... يا أما إذا نحنا حابين نحدث نظام الجهاز ... وهالشي في مثال واضح عنو عم بصير بالسوق .. وهو قيام بعض الأفراد ممن يملكون جوالات n73 بتغيير نظام جوالهم من نظام عادي لنظام ميوزك المتطور .

هيك بنكون عرفنا الفرق بين الفرمتة وبين السوفت وير
طيب ....
هلأ منجي لناحية اللخر وهي متطلبات القيام بعملية الفرمتة ومتطلبات القيام بعملية السوفت وير
بالنسبة لعملية الفرمت:هي راح فصللكم ياها على قسمين :
1- فرمتة الجهاز : بتلزمك أيديك بس
2- فرمتت الكرت / الممري كارد / : بلزمك جهاز كومبيوتر + قارئة ذواكر للكرت اللي عندك

بالنسبة لعملية السوفت وير:بلزمك لهالعملية جهاز سوفت وير / وهدا الجهاز ما بنوجد إلا بمحلات الموبايلات/ وثمنو غالي شوي + توصيلات للجوال اللي عندك + نظام جديد للجوال + جهاز كومبيوتر واللي من خلالو راح تنقل النظام / يعني النظام اللي راح تجيبو عبارة عن ملف بدك تحطو على جهاز الكومبيوتر وتنقلو من خلال جهاز السوفت وير على جهازك الموبايل / ............. وهالعملية إذا ماكنت محترف فيها مية بالمية وواثق من النظام اللي راح تحملو لا تبلش فيها ............ أصلا كلها لوشة بلوشة .. يعني معقول أشتري جهاز سوفتوير حقو 4000 ليرة / حق أعطل نوعية بالسوق / منشان أعمل سوفت وير لجوالي مرة وحدة ؟؟؟؟؟؟
هيك منكون أنا وياكم اتفقنا أنو مالنا بشغلة السوفت وير من أساسو


هلأ منجي لشرح عملية الفرمتة لجوالات النوكيا:
بالنسبة لجوالات الجيل الثاني متل 6020 - 6030 - إن كيج العادي - وهالأنواع اللي مالها كرت / #0002ffفرمتتهم استعادة ضبط المصنع بس/

بالنسبة لجوالات الجيل الثالث متل : الباندا - الدمعة - الهمر - الشيطان - n70 - n71 - n72-n73 وباقي الجوالات

اتبعو الطريقة كالتالي:
1- سمو بالله
2- شيلو الكرت من الجوال
3- نسخو أسمائكم على السيم / شريحة البطاقة /
4- خلو الكرت برا الجوال وفرمتوه على الكومبيوتر لحالو ... / سهلة متل ما بتفرمتو الفلاش ممري أو أي هارد خارجي /
5- هلأ فرمتو الجوال ... واتبعو التالي :
- طفو الجوال
- اضغطو ضغطة واحدة على الرموز الثلاثة / * 3 اتصال / وبعدين شغلو الجوال .. ولا تشيلو أيدكم من على الأزرار التلاتة
- هلأ بعد هالعملية بتلاقو في جوالات متل الدمعة وقاهر الدمعة هي بتطالع شريط أسود على كامل الشاشة مكتوب فيه فورمات ... وهوني بكون عم بتفرمت الجهاز .. انتظرو للآخر بكون مشي الحال ...... وفي جوالات تانية متل الهمر وال n70 هدولي ما بطلع فيهم هالشريط ... هدولي بتحس أنو الجهاز بعد ما بتكبس الزرار التلاتة أنو علق .. وبعدين بشتغل وهوني بكون تفرمت لحالو ... وبتلاقيه طلب منك تعمل إعدادات رمز الدولة والإعدادات التانية ....
- // ممكن نستعيض عن هالعملية السابقة إما بالدخول إلى الضبط ومن ثم استعادة ضبط المصنع .. أو بإدخال الرمز التالي *# 0737# // .
- هلأ بعد ما بكون تفرمت الجهاز وتفرمت الكرت كل واحد منهم على حدا .. منرجع الكرت لجوات الجهاز .
بعدين مندخل على الأدوات ومن ثم الكرت وهوني بطلعلك عبارة مكتوب فيها أنو الكرت تالف ... بتجي بتحط خيارات ثم تهيئة للكرت .... وبمشي الحال / بهالعملية بتكون قسمت الملفات ضمن الكرت /
- هلأ بندخل على الأسماء وبنحط على دليل سيم ومنرجع ننسخ الأسماء من السيم للجهاز
- بعدين ظبط إعدادات اللغة والوقت والتاريخ متل ما بتحب

وهيك بكون رجع الجهاز فلة


هدا كل شي حالياً

وأي سؤال بدكم ياه بخص الموبايلات والكومبيوتر والبرمجة أنا جاهز

تحياتي للجميع
أخوكم أنس

يسلمووووووووو كتير أخي
والله أنا كنت بدي روح فرمت جوالي عند المحل بعد يومين بس هلأ رح حاول
فرمتو بنفسي وان شالله بيمشي الحال

@أواخر الشتا@,

شكرا أخت ملاك

جربي بنفسك واكيد نشالله راح يمشي الحال
وإذا صادفتك أي مشكلة وحابة مساعدة لا تترددي تراسليني

وشكرا جزيلا عالرد

مشكور عالرد أخ عفوا دمعتي

The Shadow,

شكرا جزيلا عالرد

@أواخر الشتا@,
الله يعطيك العافية يا رب الشرح حلو و بسيط

بس انا عرفت انوا في فرق بين السوفتوير و الفرمتة هيي اللي منعملها نحن

السوفتوير الو اله خاصة و حقها غالي شوي يعني بس بيضل في اصحاب محلات بيقلولك انوا عملولو سوف وير و هنن بيكونوا فرمتوا فرمتة
الله يعطيك العافية اخي

العفو أخي ومشكور عالرد

في عندي موبيل نوكيا 3310 وبدي فرمتو ماعم اعرف كيف شو هي الطريقة ؟؟؟؟؟ يسلمو كتير عم امزح ...... فعلا المعلومات مفيدة الله يعطيك العافية