عندي سؤال بخصوص هالمادة سمعت انو الدكتور مسافر و بظن المعيدة لانا هيي يلي بدا تصلح و تحط الاسئلة صحيح هالحكي ولا اشاعات طلاب ..
وكمان شفت فارس مبارح منزل اسئلة هالمادة بس مو لنفس الدكتور يلي كان يعطيها الفصل الماضي و انا نسيانة شو اسمو حتى
مشان الله قلولي اخبار هالمادة لانو هي اخر دورة و الدورة يلي جاي رح ينعطا منهاج جديد و انا لازم طالعا هالفصل .
صحيح كمان يلي عندو اسئلة الدورة التكميلية تبعة هاي السنة كمان يعطيني ياها بليز ..
شكرا

السلام عليكم :
Rama_n

الدكتور فؤاد موجود و مو مسافر و عم يعطي طلاب الماجستير , على ما اعلم

.......

وعليكم السلام Portia,
وشكرا كتير لردك ..
بس اذا حدا من هالطلاب يلي حاملين المادة او بيعرفوا الاخبار يلي عم اسأل عيها يا ريت يخبرني لانو الموضوع صرلو فترة منيحة و ماحدا عبرو ؟!
اذا بتريدو يا جماعة فارس او اي حدا مشرفين او طلاب بليييز مضطرة .
ناطرتكون

Rama_n,
و انا كمان على حد ما اعلم انوا الدكتور فؤاد موجود هون و عم يدرس طلاب الماجستير

و ان شاء الله رح حاول مر جنب مكتبو و اذا شفتو رح اسألو
موفقة

Obada Arwany,
والله يا ريت انا ناطرة ردك لانو متل ما قال RaedStar, اجت لانا و كمات علينا لانو انا كمان راسبة على 49 فياريت الخبر اليقين من حدا ..
RaedStar,
صحيح اخي انت كأنو قدمت التكميلية فياريت منك تنزل الاسئلة هون اذا ممكن لانو من زمان عم اطلبون بس ماحدا نزلون لسا
وشكرا الكم

السلام عليكم : حجوابك جواب سريع

هلأ فيه محاضرات الدكتور بتدرسيهم منيح و فيه نوتة منزلها اسمها

From Ibsen To Brechet

فيها عن حياة الكُتَاب : Ibsen , Chekhov , و الكاتب الايرلندي ( نسيت اسمو ) و عن اعمالهم

هلأ بامتحانات الفصل التاني الدكتور جاب الاسئلة من المحاضرات , و بذكر كانت مواضيع

اما بالتكميلية متل ما سمعت جاب من النوتة و عن حياة هالكتاب

المهم انت ادرسي التنين منيح , و صدقاً اي مادة بتعطيها حقها و بتدرسي كل شي فيها , بإذن الله ربك رح يسر

ان اتيحت لي الفرصة سأعود و اعطيك تفاصيل اكثر

بإذن الله سأعود

موفقة و موفقين الجميع

........

السلام عليكم :

هلأ مين بدو يحط الأسئلة : بعتقد الدكتور لأنو موجود و المادة مادتو , بعدين حتى نمط أسئلة التكميلية شكلها هو حاططها .....مين بدو يصحح , فهي صعب الواحد يحزر , لأنو ممكن يستعين الدكتور بالمعيدة حتى تساعدو بالتصحيح , و الله أعلم .

هلأ كنصيحة بننصح بدراسة المسرحيات , و الكلام اللي كان الدكتور يمليه عنهم , هي نقطة

النقطة التانية : الدكتور ما حدد على المسرحيات غير شي بسيط , Ivanov & A Shadow of a Gunman , بإمكانكم تقرأوا هالتحديد بالاضافة لتحديد المعيدة لانا بحلقات البحث عن Ivanov , لأنها كتير بتغني فكرتك عن المسرحية , اما بالنسبة ل ظل محارب , فتعينات الدكتور بالمسرحية كانت عن تعريف الشخصيات و كمان كتير بتعطيك فكرة عن الشخصيات الرئيسية بهالمسرحية .

هلأ في محاضراتي كاتبتهن ورا الدكتور و ما درست غير منهم و من النوتات اللي نزلها و الحمد لله طلعناها , فإذا بتحبوا تاخدو الدفاتر لتستفيدو منهم , مية اهلا و سهلا , بس طبعاً بترجعوهم وقت تخلصو . .. و حتى اذا بتحبو النوتات مترجمات , كنا اشتغلنا عليهم مجموعة لترجمتن .

........................

على الهامش :

ايــــه رجعوتنا لهديك الايام , و الله كانت ايام حلوة و عنجد اشتغلنا فيها ......و هالمادة كانت من المواد اللي استمتعت بحضورها و بالشغل فيها و حتى انو هالمسرحيات فيهم افكار كتير كنت لائي انهم بلامسوا الواقع اللي نحنا عايشين فيه , و حتى عندي رغبة كبيرة اني اطرح المواضيع و الافكار حولهم و علق عليهم , هنا .

بذكر كمان وقت كان الدكتور يتضايق بالمحاضرة من سوء تهوية و تصميم المدرج , اللي معو حق فيها , لأني كمان كنت من الطلاب اللي بيضيق نفسن من الزحمة و حتى اني اشعر بالدوار ...لسبب بسيط هوي سوء التهوية و قلة الاوكسجين . ففي مرة رحت مع رفيئتي و عملنا "تشك" عمدرجات العلوم فلئينها : اوسع و اكبر بكتير من مدرجاتنا و حتى فيها من اعلاها نوافذ كبيرة بتيح اضاءة طبيعية , فكنت فكرت احكي مع مراقب الدوام لينقل محاضرة المسرح لمدرجات العلوم , مشان الدكتور و مشان العدد الكبير من الطلاب اللي كانوا يحضروا . لكن للأسف هالشي ما صار .

بس بالنسبة لمدرجاتنا , يعني تعديل هندسي بسيط بصيروا كويسين : انهم اذا بيفتحوا شباكين كبار ( نوافذ ) من على جنب من فوق متل تماماً بالعلوم , و انهم يكونوا بينفتحوا حتى يتيح تغيير هواء المدرج ...و اكتر من هيك , في ميزة بمدرجات الآداب اذا بيستفيدوا منها بصير شي احسن و احسن ....انو اتجاه المدرجات قبلي , بمعنى اذا بيفتحوا شباك كبير بصدر المدرج من فوق ( شباك بانورامي ) يعني حيتيح اضاءة طبيعية رائعة للمدرج , هاد غير انو حيكون دافي بالشتي لأنو الشمس بتدخلو و بتعمل انارة طبيعية , و بالصيف معتدل لأنو الشمس بتحيد عنو . وهيك بوفروا انارة و تكييف كهربائي ( توفير طاقة ) . واذا حبوا يشغلو ( البروجكتر) بشي محاضرة بالمدرج الاول , فيهم بكل بساطة يحطو برادي غامقين و يغلقوهم وقت العرض .

المدرجات المقصوردة هي : الأول و الثاني و الثالث .

فشلوني معكم , مو حوينة الآداب فيني ....وحدة من احلامي وقت كنت صغيرة اطلع هندسة عمارة ...بس عكلن الحمدلله الآداب حلو وفيو ميزة ما بلائيها بغيرو من الفروع الأخرى و ألا وهي ( الشفافية ) اللي العالم هو أشد ما يحتاج اليها في الوقت الراهن .

يالله كترنا حكي , بس صراحة كلام كتير كنت حابة احكيه , عساه يلاقي آذاناً و نفعا .

........

و مشان المسرح , اذا بتحبو اي مساعدة , فجاهزة , حتى لمناقشة المسرحيات , بلكي بإذن الله بستفيدو و بطلعو المادة وهالمرة بمعدل بإذن الله .

و بكل الأحوال لنا عودة , ان شاء الله لمناقشة بعض الأفكار و المواضيع التي مرت معنا في دراستنا لبعض من مسرحيات ( المسرح الحديث ) .

.........