شخصيات العيلة

kma · **مرسل:** الخميس مارس 19, 2009 8:11 pm

صحي الناس مختلفة عن بعضها و صحيح لما يجي واحد يفهمك هالشغلة بيقلك مو كل اصابيعك متل بعضها بس ولا يمكن الا ما تلاقي تشابه في نمطية الشخصيات

بكل عيلة بتلاقي اشخاص بيتكرروا

الشخص الخفيف الدم اللي بيسلي القعدة
و عادة بيكون لسانه زفر شوي و مسمحله يحكي شو ما بده
طول ما هوة عم بيضحك بالبشر
و هو بروح لعند لمية وببلش حكي بخطيبها زياد
وهيه بدورها بتقول لزياد
لو تشوفي ابن عمي خالد نهفة بموتك ضحك
و بيجي زياد عالقعدة نافخ ريشه لانه عارف شو بينحكى وراه
و شو ما حكي خالد الكل بيضحك
حتى لو حكى صباح الخير

كاتب العيلة او شاعر القعدة
بيكون عادة زلمة شوي كبير بالعمر من اللي بيعرفوا شو يعني كتب و قراءه
الزغار بيشوفوه ممل لانهم مش فهمانيين شو عم بيحكي
و الكبار بيقعدوا حوالية متظاهرين انهم مهتمين و مبسوطين
بس بيكونوا عم يتمنوا لو خالد يجي
***
نمامة العيلة
و هاي عادة بتكون زوجة احد الاعمام او اولاد العمام
ما بعرف ليش ما تسالوني
هاي اللي عندها الاخبار دايما
و اخبارها لازم تشيل نصها و تصدق نص اللي شلته
مشان توصل للحقيقة بتبهر و بتفلفل على كيفها
و بتضيف من عندها وبالتالي بعض النسوان بيحبوها
و بيكرهوها و بنفس الوقت بخافوا منها
بتحس هيه باهميتها لما حدا يسألها شو الاخبار
و بتفرد حالها و بتبلش تذيع و بالاخر بتقولك بالله ما تجيبي سيرة
اني قلت لك انا شو خصني دع الخلق للخالق
بتعرفيني بمشي الحيط الحيط و بقول يا رب السترة أو الجاكيت)
ودائما بنهاية كل حديث الها بتقول دع الخلق للخالق
***
غنية العيلة
كل عيلة فيها واحد بيكون اغنى من الكل
و بكل عيلة بتكون مرته مركز نظر النسوان شو لبست ووين راحت و شو عملت
و بتكون نمامة العيلة متل الدنب الها مشان تجبلهم الخبر اليقين
بتحكي من طرف مناخيرها
و بتقعد عطرف الكرسي كانها قرفانة
و اذا بتضيفها شي يا بترفضه او بتاخده بس ما بتاكله ع اساس انها شبعانة ببيتها
كلامها و احاديثها لا تتعدى شو عملت الفلبينية
و كيف تخانقت مع السيرلنكية
و اديش الشوفير منشف دمها
يعني كمان شوي بتحزن عليها
****
مصرف العيلة
بيقولك كل عيلة زي الحمام اله مصرف

( موقصدي بنك قصدي بلوعة)
و مصرف العيلة هوة الشخص اللي بيجيب العار للعيلة بعمايله السودا
بيستعيروا منه بس كمان بخافوا منه لانه بايعها و مش فارقة معه
بيكون عادة صحبة مع خالد اللي بيشوف فيه مصدر هام للتنكيت
***
كبير العيلة
و هذا اللي بدك تسد بوزك و تسمعه و هوة بيعيد القصة مرة ورا مرة
بحكيلك قصص ايام الزلزال و الثلجة الكبيرة
و لما كان بالجيش
نص قصصة كذب بكذب
مو بقولو ما اكذب من شاب تغرب الا ختيار ماتت اجياله؟
كان رح يشتري نص الشريعه(منطقه بحماه)
والوادي إنعرض علية بالف ليرة
لما كان كيلو اللحمة بعشرين قرش
***
متغرب العيلة

كل عيلة فيها على الاقل واحد بالخليج
بيجي بالصيف و الكل بيكون عم يستنى الهدايا
لما يوصل بيلاقي الكل مجتمع و الكل بيسلم علية
و بتكون امه عاملتله ورق و كوسى وسختوره
و شباب العيلة بينلموا و اشتقنالك يا ابو الزوز
و شفلنا شغل معاك و الله ما عم لاقي آكل
كانه المسكين صاحب شركة
طبعا والحق عليه لأنو بيضل يكذب
بحكي عن سيارته البورش و بيته و بيكون عايش مع تلاته بغرفة
المهم بعد يومين بتلاقيه قاعد عالبلكونة
لحاله بيشرب شاي
ولا حدا سائل فيه
و امه بالمطبخ عم تعمل مجدرة

****
عزابي العيلة

او الدون جوان النسوانجي
بيكون حليوة (نسبيا طبعا)
و بس يزور حدا من القرايبين عندهم بنات بينضبوا
و بيصيروا يبصبصوا علية من بعيد و بتشتغل المسجات
هدا بيكون عنده شوية غرور على شوية عجرفة
بقعد و بيحط اجر على اجر و عادة بيصير عمرة فوق الاربعين و ما بتجوز
و بضل يشتري سيارات بي ام على امل انها تصيد
بكل قعدة بحكي عن غرامياته و بيتجمعوا حواليه شباب العيلة

و بيصير يورجيهم صور و مسجات
كمان بيكون صحبة مع خالد و مصرف العيلة و بيسهروا سوى

شقفة العيلة

احلى بنت بالعيلة
بتكون محط انظار اولاد العم و الخال بس هيه طموحها أكبر من هيك
بتمشي يا ارض اشتدي ما حدى قدّي
و بتقعد مع نسوان العيلة مشان يصيروا يمدحوا جمالها
كمان متل دون جوان العيلة ما بعجبها العجب و بتطول لتتجوز
اذا تجوزت اصلا
ما بتكون صحبة مع بنات العيلة و بتلاقيها دايما في الاعراس بتتلقط عريس من بعيد
من مبدأ نفسي فيه و تفو عليه

***
دكتور العيلة
و هذا المسكين اللي ما بتهنى بقعدة
بس يوصل لمحل بنلموا علية و يا ميمتى خواصري عم توجعني
و شوف يا ابني مبارح و انا لما ( و بيصير يوشوش)
و اللي بتنادي ابنها تعال ورجي الدكتور حلقك
هاتي معلقة يا غدير خلية يشوف حلق اخوكي
و اللي بيعرض علية راشيتات دكاترة تانية
و اللي بيجيبله صور اشعة
و االلي بقولوا شوفلي ظغطي
طبعا كل القاعدين بفحصوا ضغطهم بعده
و كل حياته بتكون هيك بغض النظر اذا كانت زيارة او عرس او حفلة
طبعا هوة ما بيقصر
و ممكن يصير يقولك مين الحمار الي اعطاك هذا الدوا شلفو بخلقتو ورح اكتبلك غيره
***
كمبيوترجي العيلة
هذا طبعا بعد طفرة الكمبيوتر صار له اهمية كبيرة
بالاول كان الفاشل التافه اللي ما بيعرف شي
وضعه متل دكتور العيلة
و بتقول امه
بس يجي علاء بيزبطلك الكومبيوتر
و الله ما في اشطر منه
مبارح خلانا نشوف عمرو دياب
و بيجي علاء المسكين
شوف كمبيوتر ابن خالتك ريم اللعبة ما عم بتشتغل
و بيجي حمودة ابن ريم و بيقعد يتفرج على علاء
مثله الاعلى بالحياة و هوة بيشغّل الكومبيوتر
و ينبهر حموده
و بيفهمه علاء انه مشان تقدر تلعب اللعبة لازم بالاول تشغّل الكومبيوتر

***
طفل العيلة الموهوب

هذا اللي بكل لمة بنادوه يغني
تعال عبود غني لعمو غنية اليسا لو تشوفو كيف بغنيها
و طبعا في نوعين من عبود في عبود اللي ما بستحي
و بتلاقي بطالع روحك و هوة بيعيد بالغناية
و امه فرحانه فية و كل شوي بتقول ما شاء الله
كأنه ما حدا خلّف غيرها
او النوع اللي بتطلع روحك و امه عم بتقنعه يغني
و ياللا ورجي العمو اديش انت شاطر
و بتصير انت بدك تخلص
بتقوله غني حبيبي بعطيك شوكولاطة
و بيكون بجيبتك شوكولاطة معفوسه من عرس قديم
بتورجيه اياها كنوع من الاغراء
و في حالة كان دكتور العيله قاعد بيجي التهديد المباشر
اذا ما بتغني الدكتور بضربك ابرة
بتلاقيه صار يغني و نص اصابيعه بتمه
و بتصير امه تعطي اعذار و بتعصب عليه
بالبيت طول النهار صارعني روح أنقلع هلق

أوركيدا · **مرسل:** الخميس مارس 19, 2009 8:42 pm

زكرتني بكبير العيلة وكزباتو .. قال في واحد إجو دبانتين أخدو شماغو من فوق راسو وطارو

ودكتور العيلة يا قلبي عليه ... بعد القرف والتشريح بكلية الطب بيتخرج مشان يشوف يومين حلوين .. ما بيقعد قعدة بلا سير معتة وأوجاع والتهابات ودوا

فعلاً الولد بس قلو غني بيصيرو نص أصابيعو بتمو والبزاء عم يشرشر وبين الحرف والحرف بياخد نفس..
متل لما كنا زغار وتقولنا الآنسة سمّع وببلش أخد النفس وبلع الريق لبين ما يروح وقت الحصة وما نسمع

a7mad alsibai · **مرسل:** الخميس مارس 19, 2009 9:26 pm

موضوع حلو كتير .
فينك تقول إني من أول صنف

مشكوووور kma,

Hidding Rose · **مرسل:** الجمعة مارس 20, 2009 3:19 am

و الله موضوع حلو كتيير .......
و الله أغلب هالأنواع موجودة ...

عم بسأل حالي ... هي الأنواع بدرسوها عندكن بالكلية ؟؟

يسلمو ايديك اخي .... عن جد ضحكت من ألبي و احلى شي و انا عم اقرا هالانواع صارت ببالي قائمة من الاسماء لكل نوع

عبدالله · **مرسل:** السبت مارس 21, 2009 12:02 am

اقتباس:

متغرب العيلة

كل عيلة فيها على الاقل واحد بالخليج
بيجي بالصيف و الكل بيكون عم يستنى الهدايا
لما يوصل بيلاقي الكل مجتمع و الكل بيسلم علية
و بتكون امه عاملتله ورق و كوسى وسختوره
و شباب العيلة بينلموا و اشتقنالك يا ابو الزوز
و شفلنا شغل معاك و الله ما عم لاقي آكل
كانه المسكين صاحب شركة
طبعا والحق عليه لأنو بيضل يكذب
بحكي عن سيارته البورش و بيته و بيكون عايش مع تلاته بغرفة
المهم بعد يومين بتلاقيه قاعد عالبلكونة
لحاله بيشرب شاي
ولا حدا سائل فيه
و امه بالمطبخ عم تعمل مجدرة

:lo والله موضوعك هاد أو بالأحرى كلن ظراف يسلمن

Safa alaasi · **مرسل:** السبت مارس 21, 2009 12:17 am

kma, موضوعك حلو ,هلئ انتي صحي حاطتو بآرتين كافيه

بس مليان نقد اجتماعي ساخر

وبيني وبينك معك حق بكل كلمة قلتا
بس أكتر شي اضحكت عالدكتور والولد

و طبعا مشكور على هالموضوع

kma · **مرسل:** السبت مارس 21, 2009 2:14 pm

أوركيدا, معلوماتك الدكتور بينبسط لما حدى بيسألو
أنا مرّه حسنت أتهرب من التسميع وقلتلها صوتي مبحوح

a7mad alsibai, أهلا وسهلا فيك أحمد
Hidding Rose, لأ نحنه بدرسونا طرق التعامل مع شخصيات الدكاتره
بس لازم كل واحد يقول هو من أي شخصيه

عبدالله, أهلا وسهلا فيك بهاد وبكل المواضيع
Safa alaasi, أهلا وسهلا فيكي ..بس لازم كل واحد يقول هو من أي شخصيه

عاشق مشتاق · **مرسل:** الثلاثاء إبريل 07, 2009 10:44 pm

Asyl · **مرسل:** الأربعاء إبريل 08, 2009 9:12 am

kma,

تســ*1 ـــلم إيدك أخي الكريم كتير حلوين ...بس إنت من اي نوع

LATEST_POSTS

شخصيات العيلة

الموجودون الآن