eagle12, محمد الصالح,
أهلا وسهلا

شكرا لك زميلي محمد

أنا طالبة لغة انجليزية...وحتى لدكاترة اللغة الانجليزية..لطالما كان اهتمامي بالنواحي الشخصية
الحياة شخصية للدكتور...وجوانب شخصية الدكتور
ولهيك رح حط مجموعة من الأسئلة اللي بتمنى تسألوه اياها لهالانسان اللي ما سمعت عنو إلا كل خير
ومواصفاة استحثتني أكتب كل الأسئلة ببالي ليقدر أي شخص يقرا الحوار حتى لو ماكان طالب لغة عربية
ونقدر نتعرف على شخصية نالت شهادة الدكتوراه وكان لطلاب البعث شرف الدراسة عندا


منبدأ من الطفولة:
1- دكتور حضرتك وين انولدت وبأي سنة؟
2-هل أحد والديك دارسين؟ وشو مجال الدراسة؟
3- كيف كان مستواك الدراسي العام بالمراحل المدرسية؟ وهل تفاوت؟
4- دخلت الأدب العربي برغبة أم لأ؟
5- إذا كان عندك رغبات أخرى..فهل حققتا بعيداً عن مجال الدراسة؟
6-كيف بتوصفلنا حياتك الجامعية؟ أو يمكن معاناتك الجامعية؟
7-أديه كان معدلك وقت تخرجت بالجامعة؟
7-سلسللنا خطوات دراستك العليا...وبأي جامعة؟
8-هل كانت تجربتك بالتدريس بـ عبد الرؤوف سعيد ممتعة إلك متل ما كانت لطلابك؟
9- هل كان أول تعيين إلك كمدرس بعد نيل شهادة الدكتوراه هو بجامعة البعث؟
10- اوصفلنا شعورك بعد نيل هالشهادة؟ مع وصف اختلاف الحياة معك أيضاً
11-التدريس بالجامعة أحلى أم بالمدرسة؟
12- الزواج من أولويات الرجل التلاتيني..فهل توفقت بهالمجال؟
13-أكيد صعبة المعيشة بالشام والتدريس بحمص.. فهل هذا نذير بمفارقتك لحمص يوماً؟
14- شو سبب اختيار حضرتك للبلاغة في القرآن الكريم كموضوع رسالة الدكتوراه؟
15-سمعت عن تعاملك مع الطلاب وكأنن أصدقاء وأخوة..فهل السبب روحك المرحة؟أم صغر سنك وبالتالي هالشي رح يختفي بعد سنوات قليلة؟

16-شو أحلامك بعيدة المنال وقريبة المنال اللي لسا ناوي تحققا؟
17-بعد نيل الدكتوراه والتدريس بالجامعة والخطبة..أديه بالمية حققت من أحلامك؟
18-بتنصح طلاب الآداب يكملو دراساتن العليا..أما بتعتبرا تجربة صعبة وشبه مستحيلة؟
...........أكاديمياً هلأ.............
19- شو المادة اللي بتحب تدرسا أكتر؟
20-شو السنة اللي بتستمتع بالتعامل مع طلابا أكتر؟
21-هل شرحك خلال المحاضرة يطابق امتحانك (برأيك)؟
22-بتتساهل مع الطلاب بالتصيحيح؟

(أرجو الاجابات المطولة)


فارس بتسألو للدكتور كل هالأسئلة...ولولا الخجل كنت سألت أكتر
حابة اتعرف على كل دكاترة العربي وكل دكاترة الجامعة

وشكراً كتييييييييييييييييييييير
(ما تخافو من طول الأسئلة..انتو بس حددو موعد طويل مع الدكتور )

الملاك, حطيتي الشخصي لكن .. هي انجليزي وهيك كيف اذا عربي كان بدنا قد شي محاضرتين لنخلص
طيب رح حط العلمي ..دوري هلأ
1- حسب ما منعرف إنك عم تعطي طلاب السنة التالتة مقرر تحليل شعر ونثر أندلسي ، وكلنا منعرف تعدد مناهج التحليل ،
دكتور خلدون على أي منهج بيحلل ؟
2- وشو رأيك بتعدد مناهج التحليل ، وأي منهج بتحب تستخدمو أكتر؟
3- ادي نسبة ترابط البلاغة بجميع أقساما مع التحليل ؟
4- هل بتلمس ضعف الطلاب بتحليل النص الأدبي ، وشو السبب ؟ وهل تعدد المناهج هو اللي عم يضيع الطالب ؟
5- أي قسم من البلاغة بتحب ؟
6- شو رأيك بطبيعة الأدب الأندلسي ؟ وشو اللي بميزو عن باقي عصور الأدب او شو هي سماتو المميزة ؟
7- شو سبب اختيارك ليكون هو تحديدا محور دراستك برسالة الدكتوراه بما إنو الرسالة عن التفسير الأندلسي القرآني ؟
8- وأي كاتب أو شاعر اندلسي بتحب كتابتو اكتر ؟
9- كيف ممكن الطالب تكون قراءتو للقصيدة بمكانا ؟
10- عندك شي كتابات خاصة؟
11- هل شاركت أو بتشارك بالمجلات الثقافية أو إلك زاوية محددة ؟
12- مع غياب مشجع الطلاب على القراءة شو الكتب اللي بتنصح طلاب الأدب العربي تحديدا يقروا أو يقتنوا ؟
13- مين هو أكتر دكتور أثر فيك بحياتك الجامعية ؟
14- في سؤال كنت بتتوقع إنو نسإلك اياه وما سألناه ؟

بس هدول

يا لطيف يا هدى شو عجبني هالسؤال
لك كتيييييييييييييييير حلو ومهم..وحابة من قلبي أعرف جوابو

هدى ما بس بتسأليه إذا بيكتب..شو بيكتب وأديه ووين بينشرن
مشان نقرالو *Thanx

ملا حظة اصدقائي:
الدكتور خلدون من النوع المرح جدا..
اضف انه عندما كان يغضب من احد الطلابو ويعصب بعد ان يكون الطالب استفزه بشكل كبير جدا....
فان مدة التعصيبة لا تتجاوز ال30ثانية وتعود الامور لمجاريها وكان شيئا لم يكن...
كان الدكتور خلدون يدرس الشعبتين الرابعة والسادسة

ويا لحظه السيء فالشعبة السادسة كانت أشهر من نار على علم بالشغب والتفجيرات(تفجيرات الصوبية) وعندما كان ياتي الى شعبتنا الدكتور خلدون يكون ملونا بالطبشور والشحوار وما الى هنالك...

لكل سؤال في اللغة العربية كنا نجد عنده جواب له طبعا نحن كنا نسال من باب التعجيز لا من باب التعلم ولكن كل الاجوبة التي كان يجيبها ما زلت أحفطها الى الان

ليش الدكتور خلدون مادرس في التعليم المفتوح لحد الان