السلام عليكم
معكن سليمان رئيس رابطة مقرقعي المتة بحلب
وعميد المقرقعين العرب
والامين العام لاتحاد روابط مقرقعي المتة حول العالم
وناشط متاوي في مجال حقوق المقرقعين
بدي قدم مساهمة شعرية عن المتة للي انا من وجهة نظري بعتبرها أعظم شي اكتشفتو اليد الانسانية
وعلى قولة الفقيه والمقرقع الكبير سليمان سليمانوفيتش الذي قال(قرقع المتة ولا تبالي فشرب المتة من شيم الرجال)

معشوقتي . . .

قد جئت أوصف نبتة" عسى أعطيها حقّها
خضراء ذات طلة ما أحلاها ما أرقّها
**********
خضراء بلون بديع منقوعها جد"ا نفيع
تهب كل من يشربها القمة في الذوق الرفيع
*********
كانت مجرّد نبتة في أرض الأرجنتين تفيع
قد صار صيتها لاحقا في شاسع الأرض يذيع
**********
رفاقها مصاصة بسيطة دون رتوش
وكأس بلّور صغير مزيّن بأحلى النقوش
***********
أضف لها ماء ساخنا واستمتع بالطعم اللذيذ
صارت لدربي رفيقة وأنا لها جدا عزيز
*********
رفيقتي اسمها المتّة ولاسمها دلائل شتى
الميم محبّة والتاء تواضع واّخر تاءها رفعة ومودّة
********
تعطي لشاربها الحياة تمنحك شعورا بالأمل
تحسب عمرك ناقصا بوجودها العمر اكتمل
بوصالها لامندوحة وهجرها لا يحتمل
المتّة هي معشوقتي أأحبها ؟ جوابي أجل
معها قمة سعادتي فراقها دنو الأجل

هي القصيدة تأليفي وفي عندمساهمة تانية

نمنماااااااااااااااااات

الناس سألتني مين هيّا
خضرا حلوة ما في زيّا
لا هي سكينة ولا هي ريّا
تبعث أمل وتشفي العيّا
لما تسكب فوقا ميّا
لعالم تاني تقلك هيّا
* * * *
غاصت بالكاسة تلاقيها
ومصاصة حلوة توافيها
والميّة السخنة تسقيها
والسكر يجمّلها ويحليها
* * * *
تشوفا مرة تريدا دوم
محبوبة مهضومة عند كل القوم
كل الناس عندي كوم
وهي وحدا والله كوم
* * * *
هذي الحلوة اسما متّة
درت العالم زنكة وحتّة
وشربت مشروبات شتّى
ما عجبتني الا المتّة
* * * *
أشربها وأتغزل بيها
وحياتي مندورة ليها
لو درت الأرض بعاليها
وحتى دورت بواطيها
المتّة أحلى شغلة فيها
* * * *
المتّة بنية لونا الوفا
أمشي وراها لو حتى حفا
تاخدني لجنة مو عالهفا
كلها نقاوة كلها صفا
تعطي حنان وتبعث دفا
أعطي كل العالم جفا
وجلسة معاها حاجة وكفى
* * * *
لو درت الأرض بعاليها
وحتى دورت بواطيها
المتّة أحلى شغلة فيها


بتمنى تنال مساهمتي اعجابكن ونداء مني لكل الشباب والصبايا ان يواظبوا على القرقعة وان يساهموا في نشر الفكر المتّاوي
وأجرهم وثوابهم عند الله_
انتظروني مع كل جديد

سليمان231,
إي بذمتي كاسة متة مع نفس أركيلة وهيك قعدة رواق شغغغغغغغلة
اشتقنا لهالشغلات
مشكور أخي عالموضوع

اختي
سيلينا اول شي مرحبا
ليش ما منجتمع نحنا اللي منحب المتة ومنعمل يوم جمعة اسمو جمعة المتة
ومنضل عم نقرقع متة لنقول حاجة ويوصل صوت القرقعة ع البارغواي والارجنتين
-من جهة تانية انا بطلب من شركات تعبئة المتة في سوريا تحسين نوعية المتة اكتر شوي لانو نوعية المتة الموجودة عنا من النخب التاني والتالت
يعني والله نحنا شعب ذواق وصرنا خبرة في مجال القرقعة وماعادت المتة شغلة غريبة عنا
شو رأيكن

سليمان231, حلوة الفكرة

سليمان231,
بعمري ماشفت حد بحب المتة متلك
حاسستك بس تجيك بنت رح تسميها متة
وفعلا قعدات المتة إلها نكهة خاصة..يعني عنجد لما بشرب متة مع حدا بحسها أطيب من اللي بشربها وحدي
وهاد دليل إنو السرّ بالقعدة الحلوة مو بالمتة بحدّ ذاتها...
وعفكرة للمتة فوائد كتيييييرة..وأهمممممممممم شي إنها منبه قوي للطلاب مشان يقدروا يسهروا ويركزوا بدراستهن
بس المشكلة بضيع كل الوقت بتسخين ابريق المي
وشكرا عالموضوع الظريف

جمعة المتة

ههههه والله معك حق
مسكين يوم الجمعة صار إلو مية اسم
بس أحلى اسم يوم المتة لأن فيه محبة أخوة هدوء طمأنينة ما ...... :cry:

على كلٍ المتة حلوة بس مع الجَمعة ولوحدوا الواحد بتعز عليه الدنيا
اسأل مجربة
صحة وهنا إن شاء الله

سليمان231,
بما انك بتحب المتة كتير نزلنا فوائدها يمكن نصير نحبا

انسة فطوم شومنشان انو أنا نزلت موضوع عن فوائد المتة بس مابعرف ليش مانزل ضمن المواضيع الجديدة
دورت عليه كتير ومالقيتو
بذمتك وين اختفى الموضوع؟؟؟
عم فكر اسأل عنو ببرنامج خبرني ياطير
لأنو الشي اللي صار شلشني موضوع بيختفي فجأة؟؟؟
على فكرة الموضوع خالي من السياسة
وكمان خالي من دهن الخنزير والمواد المعدلة وراثيا؟
فهل من رد ؟