السلام عليكم
تحية مني أنا سليمان رئيس رابطة مقرقعي المتة بحلب,وعميد المقرقعين العرب
اليوم يا جماعة رح نرجع نحكي عن المتة,هلأ في ناس بتشرب المتة هيك على حالها بدون أي اضافات
أنا اليوم رح خبركن عن شوية أنواع عطرية من الأعشاب الطبية اللي ممكن تضيفوها للمتة وتعطيكن طعم رائع وفايدة كبيرة
ورح أعرض المساهمة على شكل أمتال وقوافي

- اذا بدك الهم عنك تزيح,قرقع متة مع شوية شيح . والشيح مفيد كتير بس طعمو مرّ
-اذا كبرت وجارت عليك السنون ,قرقع متة مع اليانسون
-المتة طيبة كيف ماتكون,وبتصير أطيب مع عصرة ليمون
-اذا كنت مريض أو عليل,دواك ضرب متة مع الاكليل .والاكليل هون كناية عن اكليل الجبل,فوايدو لاتعد ولا تحصى
-لا تتلبك لا تحتار,قرقع متة مع ورق الغار
-اذا كنت مهموم وحياتك تعيسة,قرقع متة مع المليسة
-بدك وصفة بمفعولا قوية,قرقع متة مع الميرمية
-العاقل والفهمان والنبيل,هو اللي بيشرب متة مع الجنزبيل
-صب المتة بالكؤوس,وضيف عليها عيدان العرقسوس
-قوي قلبك وصفّي البال,بضرب متة مع حب الهال
-بدك نصيحة ياحبيب,قرقع متة مع جوزة الطيب
-نصيحة تانية يا حبيب,ما في اطيب من المتة بحليب(هون منحط بدل المي حليب)
عزيزي القارئ يعني اذا بتتقيد بهالوصفات صدقني لن تحتاج الى طبيب طول العمر طبعا باذن الله تعالى
جربوا هالوصفات ولاتنسونا من الدعاء
انتظروني مع كل جديد

السلام عليكم :

سليمان231,

كان لازم يكون اسم المستخدم الك هون

( عاشق المتة )



حلوة هالقصيدة النهفة من العاشق المغرم بالمتة

والله حلوين هالأمثال ولا الأشعار

إمم كمان حط بالمتة قشر ليمون لتعطيها نكهة

يسلمو أبو متة