ويندوز 7 يتفوق على الفيستا

عصام · **مرسل:** الجمعة أغسطس 27, 2010 1:21 am

قالت مؤسسة "نت ماركت شير" Netmarketshare المتخصصة في البحوث التسويقية أن نظام Windows7 استطاع في أقل من عام أن يتفوق على النظام السابق Vista من ناحية عدد المستخدمين.

وأوضحت المؤسسة أن Windows7 كان النظام الأساسي لنحو 14.46% من الأجهزة التي قامت بالدخول على الإنترنت بالمقارنة مع الأرقام التي حققها Vista والتي بلغت 14.34% من إجمالي الأجهزة المتصلة بالإنترنت، ما يجعل Windows7 يتفوق للمرة الأولى على Vista. وكانت مايكروسوفت قد أعلنت مؤخراً أنها باعت من نظام Windows7 نحو 175 مليون نسخة منذ توافره في الأسواق.

وبالرغم من الأرقام الإيجابية التي حققها Windows7 إلا أن نظام Windows XP ما زال يحتل موقع الصدارة بإجمالي 62% من الأجهزة التي تتصل بالإنترنت ما يفوق مجموع حصتي كل من Vista وWindows 7. أما بالنسبة للأجهزة الأخرى فقد حصلت الأجهزة التي تعمل بأنظمة Mac على نسبة 5%، فيما حققت الأجهزة التي تعمل بأنظمة iPhone وLinux والأنظمة المعتمدة على الجافا نسبة أقل من 1%.

وقد نجح Windows7 بالفعل في تحقيق معدلات استخدام جيدة فيما يتعلق بالأجهزة المتصلة بالإنترنت ففي شهره الأول استحوذ على نسبة 4%، وهي النسبة التي حققها نظام Vista بعد أن قضى في الأسواق نحو سبعة أشهر.

من ناحيتي منزل ال7 وشغلة رهيبة والله
وقبل مني منزلو فارس وهو اللي حببني فيو
بقا نصيحة اللي بعدو ناطر يروح ينزلو ويتوكل عالله
وحلاوتو مابدو تعاريف بنوب لانو بتنزل نسخة معرفة كاملة وابقا انتبهو وانتو عم تنصبوه نزلو 86 مو 64 لانو ال86 هي 32 وهي مابتعمل مشاكل بتنصيب البرامج وتوافقها بينما ال64 بجوز تعمل شوية مشاكل ببعض البرامج اللي ماتدعمها

ابراهيم محمد · **مرسل:** الجمعة أغسطس 27, 2010 3:41 am

أبو وسام .. يطعمك الحج والناس راجعة

يعني بالله مين ناطر رأي شركة شير مار وير أو مدري شو حتى يقول انو وندوز سفن أفضل من وندوز فيستا

خيو يا خيو لا مجال للمقارنة ما بين التنين لأني برأيي بعتبر انو كل نظام منهن بيتبع لجيل خاص فيه وبينهن ما لا يقل عن مليون عام لأن التطورات اللي صارت على الوندوز فيستا حتى صار سفن تكاد لا تحصى والتحسينات كمان هيك

وأنا بضم اسمي لاسمكون بانو الوندوز سفن أفضل ما يمكن اقتناؤه من معسل قصدي نظام

يسلمو ع النقل يا حبيب والله يبعتلك حدا يهديك شي نسخة وندوز سفن أصلية 100% من دون لودر ولا وجع راس

Golden RoSe · **مرسل:** الجمعة أغسطس 27, 2010 3:44 am

هلا بستخدم ونيدوز 7 وقبله كان الفيستا

مدري ليش كنت مبسوطة بالفيستا أكتر

والله يبارك بالـ XP

فادي · **مرسل:** الجمعة أغسطس 27, 2010 5:17 am

المشكلة انو كل ما بنزلو برنامج جديد
بدو الواحد ينسى كل شي عن الي قبلو ويبلش من جديد
انا نزلت الفيستا بس ما هضمتو فرجعت للـ XP
و نزلت السفن بس كمان ما هضمتو

NOOR TALEB · **مرسل:** الجمعة أغسطس 27, 2010 5:46 am

السلام عليكم ورحمة الله وبركاته

مابدا 2 يكوا فيها اخ عصام
لأنو الـ7 أحسن من سبعين فيستا . بكتير شغلات ومن ضمنها يلي ذكرتها من خلال موضوعك

بس بتم عندي شغلة بدي أسألك عليها !

اقتباس:

نزلو 86 مو 64 لانو ال86 هي 32 وهي مابتعمل مشاكل بتنصيب البرامج وتوافقها

شو المقصود فيها ؟!

ولك جزيل الشكر

ابراهيم محمد · **مرسل:** الجمعة أغسطس 27, 2010 9:14 am

صديقي NOOR TALEB,

الموضوع بكل اختصار هو التالي

الفرق بين 32 بنت و 64 بت هو كمية أو حزمة البيانات اللي بيقدر الجهاز يعالجها دفعة وحدة

لا تقلي ما فهمت رح أعطيك مثال أعطاني اياه اللي شرحلي الموضوع من شي سنتين تلاتة

تخيل انو عنا بابين واحد عرضو 32 م والتاني عرضو 64 م وهيك شي طبيعي انو الباب اللي عرضو 64 م بيقدر أشخاص أكتر انو يمرو فيو دفعة وحدة وبالتالي لو كان عنا مثلاً (1000) شخص - كمية بيانات - بدون يدخلو من البابيت فشي طبيعي انو يدخلو من الباب اللي عرضو 64 م بشكل أسرع وينتهي دخولهم قبل الباب التاني

ونحنا بما انو شبهنا الأشخاص بالبيانات فلهيك اذا كان عنا نفس الكمية من البيانات وبدنا نعالجها معالج 64 بت بعالجها بنصف الوقت اللي رح يعالجها فيو معالج 32 بت ..

بتمنى تكون وضحت الصورة عندك

وفكرة تانية انو حتى نستفيد من قدرة نظام 64 بت لازم يتحقق 3 شروط اللي هنن:

1- معالج داعم لأنظمة 64 بت
2- نظام تشغيل 64 بت
3- برامج داعمة لل 64 بت ( يعني لو شغلنا البرامج العادية ( 32 بت ) على نظام 64 بت ما رح نلاحظ الفرق بسرعة معالجة البيانات إلا حتى نجيب برمجيات داعمة لل 64 بت )

وتعقيب على هالشرح :

خيو عنا ولأنو كتير من برمجيات بلدنا ما بتشتغل على أنظمة 64 بت فينصح انو نستخدم أنظمة 32 بت لأنو ما شاء الله عنا شركات اذا نزلت شي برنامج أو أي شي كان ما بيعرفوا ينزلوه غير لل 32 بت فقط

آسف ع الاطالة

تحياتي

NOOR TALEB · **مرسل:** الجمعة أغسطس 27, 2010 3:12 pm

ابراهيم محمد,

عراسي والله أحلى ابراهيم ,

كفيت ووفيت .

بشكرك من جوا قلبي ، الامور كلها وضحت هلأ.

تقبل تحياتي دمت بخير

LATEST_POSTS

ويندوز 7 يتفوق على الفيستا

الموجودون الآن