[align=center]بسم الله الرحمن الرحيم

السلام عليكم :





أولاً: الحكي الحموي مقارنة بالشامي

الحموي & الشامي
نحنه - نحنا
سودِه - سودا
لحمة بالصينية - لحمة بالصحن
شختورة - أشة
داني - إدني
حديه - حدا (شخص)
أترة أو أتورة - شوي (بمقدار صغير)
علِّق الضو - شغِّل الضو
آظان - سخان حمام
نتدرج - نتمشى
كماجة - مرقدة "القاف تلفظ همزة" (رغيف خبز)
نربيج - بربيش (خرطوم مياه)
جنأ - صحن
أرواح (بتحداكن إذا حدا بئولها غير الحموية) - مشّي (اذهب معي)
من كعب الدست - أخت أختا "يعني شغلة كبيرة"
صحْلو - ناديلو
مسَخَمة - مشَحَرة
بغضر -بقدر "القاف تلفظ همزة"
ما بغضر -ما بقدر "القاف تلفظ همزة"
غنّاية - غنيّة
أبو فريوه - كستنا (ثمرة الكستناء)
أتناوأ - أتطلع (أنظر)
أبوع - بوري البوظة أبو البوشار
يئطع خَمَلك - يحرء حريشك
ركوة - دوله ئهوة
بلا مرائة - بلا سئالة و مياعة
لا تنحرني- لا تنكشني


ثانياً: معاني و مصطلحات


جأمتني: أي طعجتني بكلامك
برطاش: هو الرخامة التي تكون أمام باب الحمام
الشمندور: وهو أول ما يُحلَب من البقرة بعد أن تلد ويعرف في اللغة العربية الفصحى وطبياً بـ اللبأ
يؤكل مع القطايف والقطر
حملت درب طْريقي: (بسكون الطاء) أي مشيت في طريقي
رحت لعند المنّو: أي ذهبت اليه
لا ياااااااااااا: اسم فعل مضارع بقصد الاستنكار معناه بالله عليك مع مراعاة مطّ الألف قدر المستطاع
السنفور: حيث أُستخدم هذا المصطلح للسيرفيس لصغر حجمه .....
بغو: يُستخدم هذا المصطلح للشيء الصغير و الطري بحيث لم يكتمل نموه بعد أو لم يصبح قاص بعد ...


هبَرلو: سماعات الستريو.
شيعانين: بمعنى عمرو ما حدا يرت.
حئّاااااا؟: (بتشديد الهمزة) اسم فعل مضارع يفيد الاستفهام بمعنى هل هذا صحيح؟
ترِّك: (مع تشديد الراء) اترك من يدك
لأ إي: وتلفظ بسرعة "لئّي" بمعنى مبلا




ثالثاً: أكلات حموية


حلاوة الجبن:
مشهورة ..بدون ما احكي عنها

شعيبيات:
عجينه محشية قشطة حموية ومنحط فوقها قطر

سيالات:
عجينة القطايف عصافيري نفسها بس بحجم أكبر منحطهم فوق بعض بعد تسخينهم بالسمن الحموي ومنرش فوقهم سكر وقرفه وجوز

مغطوط:
خبز تنور منغطه بحليب سميك شوي ومنرش فوقه سكر.

باطرش:
متل المتبل العادي بس منضيف فوقه صلصله بندورة مع لحمة ناعمة .

ملاحظة: جميع الأكل بينعمل بالسمن الحموي مشان هيك الجلطات وعمليات القثطرة شغالة على ابو جنب بحماة

ملاحظة تانية: معروفين الحموية بشرب اللبن كتير



مشان هيك كلون ريلاكس وابداااااا ما بعصبووو ابدااااااا



.......................................................[/align]
منقول من الايميل

السلام عليكم :

وبالحمصي : " عيطلو "
نيااااااااااالكن يا عمي .

......................................

كلون صح عدا المغطوط.. لأول مرة بسمع بهالأكلة بحمص و في محل مشهور بعالأكلة بحمص .. والشي الغريب انو هالأكلة كتير بتتاكل بس بكير .. يعني اذا رحت عالمحل الساعة 6 الصبح بتلاقيه ماضل عندو .. أنا مرة أكلتها عند الجلبجي بالسنة التالتة ..

Portia, سختورة مو شختورة و جمعها سخاتير .. لا نحن منقول حدا ما منقول حديه لا هي الكلمة مو حموية و غير متداولة ابدا نحن منقول كستنه يا محمد و الله شهيتيني عليه هلق .. منين بدي جيب و راح موسمه هلق هي حلبية يا شباب يا ويلي حلاوة الجبن بالقشة غير شكل
ولا حلاوة الجبن السادة مع نمورة سمن غنم ولي و الله مبارح صار السكر بالدم معي شي مليون كتر ما اكلت نمورة و حلاوة الجبن كنت جوعان و نزلت فيي و ما فيي و شوية سمنه للتقلاية و الله مو هاد السبب ابدا .. و انا أتحدى انوا السمن العربي هو الصحي اكتر من الفشتمين ( النباتي ) و هاد بحسب دراسات بريطانية يمكن ..
و السبب انوا مشتقاته سهلة الهضم و مدري شو
بس السمن العربي صحي اكتر للأكل و هالشي هاد واضح
بس قصة الصحة هي من لله و السبب فينا مناكل لحتى ننتخم
سنا, المغطوط اكلة حموية بس ما بتتاكل الا بعد الفجر حصرا
و انا صغير ما كنت اعرفا بس لما كبرت عرفتها و بعد الفجر بتتاكل للساعة 6 او 6 و نص بالكتير

السلام عليكم :

سنا :

المغطوط : ( أو المغطوطة ) بالحمصي :

نحنا بنعملها مع القطر مو السكر , أطيب

مبارح مبارح أكلناها , من تحت ديات امي ,الصبح
لأنوبجيبو الحليب و بيسطحو بصدورة و بحطوه عالطاولة طول الليل , من دون ما حدا يقرب او يدئرهم , حتى تتشكل طبقة عالسطح
متل ( القشطة ) او القشوة و بعدين بجيبو الخبز التنوري و بيحطوه شوي شوي عطبقة القشطة المتجمعة فوق

بحيث ياخد الوجه عالخبزة ......وهيك وبعد عمل الخبزات حتى تخلص القشوة عالسطح

بعدين بتتاكل المغطوطة الخبزة بعد اللك بالقطر , مشان هيك بلقو يعملوها الصبح لأن ما بينفع بعدين

و صحتين ........

وهيك ما بئى فيه سر للمغطوطة

......................

السلام عليكم :

Obada Arwany :

الشمندور : ليه البقرة الها وقت بالسنة للإنجاب

عموماًبحس وسط حماة بيغلب للرعوي

يعني فيه اهتمام بالرعي : غنم و بقر و ماشية

وهي شغلة لصالحكم بتاكلو سمن عربي و لهيك كمان بتشربو حليبب كتير يلي الومنافع كبيرة

...

والله من فترة حابة اعمل زيارة لحماة بحيث نشوف فيها احلى المعالم , و بلائيها حلوة لأن نهر العاصي واضح فيها و نواعير و مي و يا سلام

أحلى شي مبارح وقت عم اتصفح الايميل بلائي رفيئة عالماسنجر , دخلت من الموبايل و كاتبة رايحة عحماة , بسألها :وينك , بتقلي بالبولمان طالعة عحماة مع بعض الصديقات .......و بشوف هادالايميل

سبحان الله عالصدف , فاجى عبالي نزلو هون , وحتى وقت عمااكتبو شفت رفيئتي من حماة عالماسنجر و كنت عم احكي معها و نسقو

عبادة :

شكراً لمرورك وللتعقيب اللي أثرى الموضوع

و بالنسبة للمصطلحات التانية فنقلتو كما هو من الايميل

..............................

السلام عليكم :

يارا العلي :

شكراً لمرورك , وشكلك عمتستغلي صيفتك كتير منيح

عفكرة انت وحدة من العضوات اللي تمنيت اتعرف عليهن

حتى اني فكرت انزل عالجامعة بشي امتحان عندك وسلم عليكي



.....................

و الله صح انا حموية بس في شي ما فهمتو و شي طلعت بقولو متل الشوام
لا كون مخربطة اني حموية
بس ما بقلكن مو كلن بقولن في شي بقولو
صحي زكرتوني وحدة من رفقاتنا شامية تزوجت حموي قلنالا بكره بقلك كماجة قالتلنا لااااا ما بدي مسبات

Portia, تسلميلي ياحبيبة قلبي..وطبعا هالشي بيسعدني..كلك ذووووووووق