LILAC,

أنا عم اقرا كلشي عم تكتبوه .. و عن جد تأثرت جدا جدا بهالطفل .. و حز بقلبي هالحدث:
هالحدث هاد لحالو ببين حجم المعاناة الداخلية الي عم يعيشا هالطفل .. بتصدقي انو دمعو عيوني و انا عم اقرا هالحدث هاد؟؟
جد الله يعينك .. و هاد الطفل أمانة برقبتك يا ليلك .. لا تتخلي عنو و بذلي كل جهدك معو ..

بانة,
آسفة ع تأخيري بالرد
فهمت من حديثك انو موضع التمثيل هو فقط لنوصّف حالتو ، وعلى هالشي منحل المشكلة
شكرا كتير لتوضيحك الحلو

LILAC,
وصفك لمواقفو ممكن يخليكي تلاقي حل متل أنو تفكير بصوت عالي .
هلأ هو أكيد حاسس انو انت مهتمة فيه بس ما بيقدر يعبّر عن هالشي لأنو ما بيعرف غير العدوانية
لهيك حاولي تتعاملي مع الطلاب برفق قدامو ، او تخلي هالطلاب يمثلو هالشي ببعض مسرحياتن مثلا بالصف عن الصدق والتعاون يعني هالأخلاقيات لحتى يشوف انو هالشي موجود بحياتو وبين كل العالم

شغلة تانية .. حاولي تجربيا
شوفي من أكتر واحد من أهلو عندو اهتمام فيه .. ابو أو أمو، وخبريهباللي عم يصير معو لحتى يتابعوه أكتر ، لأنو متل ما ذكرت الملاك لازمو حنان من البيت ، فحتى تقدري تلاقي نتيجة من شغلك ومتابعتن

من قلبي موفقة .. وانا عم تابع معكن كل شي ولو بلاقي اي ملاحظة ما رح قصّر

يعطيكي العافية يا ليلك قصة الطفل ما راحت من بالي
شو صار معك بس انا بتوقع انو في مشاكل بين الام والاب لحتى الطفل هيك عم يتصرف يعني الاب بيضرب الام

سلامي للجميع
هالاسبوع كان فيه تطورات مهمة
مارح اقدر احكيكل التفاصيل بس رح احكي الاهم
اولها رح بشركن بتحسن كبير والحمد لله متل ماني متاملة
الطفل صار اهدا شوي
ممكن يكون تعود على جو الروضة
او ممكن تحسنو اجا نتيجة مبادرة رفقاتو بلعب معو
صار عم يتفاعل اكتر
وفكرة المرغبات ساعدتني كتير كتير معو ومع غيرو
شكرا الملاك
طبعا هو صار اهدا بس ما بيخلى الامر من حالات تمرد عم تصير بين الحين والحين
الاهل ما بادرو بزيارة

ولانو اخيرا صار عم يرد على اسئلتي (بس طبعا حسب مزاجو
) عرفت منو انووحيد على اربع بنات
وانو امو مسافرة (مابعرف اذا كان هالكلام صح ولا الاب قايلو هيك)
وانو ما بيلعب مع حدا بالبيت
اهم نقطة اني اكتشفت ان الطفل موهوب
بيعمل حركات جمبازية من دون ماحدا يدربو عليهن
ما بتتخيلو فرحتو وهو عم يعمل هالحركات قدام رفقاتو
هلشي عزز علاقتو مع رفقاتو كتير
والنقطة التانية هي القصص لي عم اخترعها كل يوم واحكيلهن ياها
ولي غالبا كان موضوعها عن الصداقة
عدوانو على رفقاتو خف بنسبة 60 بالمية من دون مبالغة
نتيجة رائعة خلال اسبوع

الف شكر الكن جميعا
من كل قلبي على افكاركن ومبادرتكن
شكري الخاص لبانة
بانتظار بقية البرنامج

الحمد لله يا ليلك أني بديتي تلاحظي التحسن
وأنو الفرق عم يتم بسرعة...اتخيلي أسبوع الماضي كان بقمة الشغب والأذى

وواضح أنك وصلتي لأهم نقطة عندو...وهي عواطفو
وقدرتي تأثري بعواطفو

أنا واثقة أنك صرتي بتعنيلو بحياتو كتير ومتل وما سبق وقلتلك...ما رح ينسى كلمة قلتيلو اياها
استغلي هالشي ومرقيلو كل الأفكار المسالمة والحلوة...وحببيه برفقاتو وحببي رفقاتو فيه

والرائع هو حركات الجمباز اللي حكيتي عنا...ضلي أبدي اعجابك وانبهارك فيا
هو بيتشجع يقدم حرات حلوة ومميزة ومسالمة
وباقي الأطفال بيتشجعو يكونو مرنين ورياضيين
وفرحة الثناء ما رح تخليه يقدر يزعج حدا أو يشاغب

وبأكد عليكي أنو وقت بيغلط عاقبيه....أولاً هو لازم يتعاقب ويحس بألم العقاب وممكن عقاب مؤلم يردعو يكرر خطأ معين
وتانياً الأطفال حواليه ما لازم ينضرو بأنن يشوفو قدامن طفل مخطئ وما تعاقب

والله يقويكي....ويجعل تعاملك مع هالطفل وحتى باقي الأطفال بميزان حسناتك

LILAC,
أسعدتني النتيجة اللي وصلتيلا جد برافو عليكي ومافي مانع انك تكتبي تمثيليات صغيرة لحتى الأطفال يمثلوّا وتصير ع أرض الواقع

يعطيكي ألف عافية ويقويكي