يقول ( دينس ويتلي ) :

"الفشل ينبغي أن يكون معلماً و ليس مقبرة لطموحاتنا , و الفشل ما هو إلا حالة تأخير و ليس هزيمة , إنه تحول مؤقت عن الوصول إلى الهدف و ليس نهاية مميتة , و هو شيء يمكننا تجنبه فقط بأن لا نقول بل نفعل " .

فالحياة عبارة عن سلسلة من التجارب و الخبرات , بعضها جيد و الآخر سيء , و كل واحدة من هذه الخبرات تجعلك أكثر قوة على الرغم من أنه غالباً ما تغفل عن إدراك ذلك ! فكما يقول المثل :
( الضربات التي لا تقصم الظهر تزيده قوة ) .

في ضوء ما ذُكر أتوجه للأعضاء الكرام بما يلي :

1_ لو سألتكم تعريف الفشل من وجهة نظركم .... ماذا تقولون ؟؟

2_من هم صُنّاع الفشل ؟؟

3_ هل ثمة ارتباط بين الفشل و ضعف الشخصية ؟؟

بانتظار آرائكم و مشاركاتكم

سمحيلي اولا اني هنيكي على الموضوع مقولة رائعة
الفشل ممكن يكون صدمة او خيبة امل بتأدي لحالة نفسية من الحزن والاكتئاب والجمود
اهم صانع هو
1 -ضعف الارادة لي بيتضمن
-هدر الوقت (تاجيل عمل اليوم لبكرا)
-الاستهتار

2-المحيطين :الاشخاص المحيطين بياثرو باغلب الناس اذا كانو من النوع المكتئب (لان الاكتئاب مرض سريع العدوى)
في نوع تاني من الناس لي هني بيحبو احباط الهمم ليظهرو انن الافضل على حساب الشخص لي قدامن

اكيد مية بالمية لان قوة الشخصية وحدها هي لي بتصنع من الفشل نجاح
وقوي الشخصية وحدو هو لي بيتجنب صناع الفشل


سيرين

سيرين,
كالعادة موضوع مميز بينضاف لمواضيعك... الفشل:هوعدم قدرة الانسان على تحقيق الشيء المراد الحصول عليه ثم اليأس والاحباط وعدم المحاولة مرة تانية وثالثة وعاشرة....الخ اولا الاشخاص انفسهم لما بكون ماعدهم امل وضعيفين الارادة...
ثانيا البيئة لما انسان يفشل شي مرة وكل الناس الي حواليه يزكروا ويهتو بفشلو اكيد ....انا برأي مافي انسان فاشل....
في انسان قليل الحيلة...
انسان جبان غير قادر على المغامرة بعد اول تجربة غير ناجحة...

LILAC,

تسلمي يا ليلك هاد من ذوقك


نورتي ليلك و شكراً كتير على مشاركتك المميزة و يا هلا فيكي دائماً و كتير أسعدني مرورك

fofo star ,
هاد من ذوقك فوفو و المميز هو حضورك و تواجدك الدائم بساحة حوار هاد الشي كان الحافز و المحرض لكتير من الأشخاص ألي قدرو بعدين أن يتغلبو على هاد الشي و يثبتوا ذاتن .. يعني صار نوع من التحدي .


نورتي الموضوع فوفو و شكراً كتير على مشاركتك و بانتظار كل شي جديد منك

ثائر ,
شكراً كتير ألك أخ ثائر هاد من ذوقك و متابعتك لمواضيع ساحة حوار بتسعدنا و بيسعدنا أكتر مشاركتك بالمواضيع المطروحة .

رأيك بهمنا أخ ثائر , و عموماً الأسئلة عم تنطرح لحتى الأعضاء ألي بدن يشاركوا يعرفوا من وين بدن يبلشو بالإضافة لأنها بتساعد في اكتشاف وجهات النظر المختلفة للأعضاء من خلال الرد على الأسئلة المتعلقة بالموضوع
للأسف أخ ثائر في أشخاص كتير الفشل بالنسبة لألن مقبرة لطموحاتن ... خلينا نحكي على صعيد الدراسة ... في كتير شباب و صبايا ما تابعو دراستن و السبب هو عدم محبتن للدراسة بشكل عام و بالإضافة للتقصير في المتابعة و الفهم و غيرو , هالأشخاص أول ما دخلو المدرسة كل واحد فين اختار مهنة المستقبل بين مدرس و طبيب و مهندس و غيرو .... بس فشلن بعدين بالدراسة كان السبب في عدم تحقيق طموحاتن .. طبعاً عم نقول فشلن بالدراسة فقط, لأنن يمكن يكونو بالمقابل أشخاص ناجحين بالحياة العملية ... و أنا أبداً مو مع أن يكون الفشل مقبرة للطموحات , بالعكس تماماً و أني أفشل مرة و مرتين و حتى أكتر مو مهم المهم أني أتخطى هاد الفشل و غير هيك يكون الفشل دافعي لإثبات ذاتي وأني شخص قادر على الانجاز و التقدم .
هلق بالنسبة لقوة الشخصية , ما فينا نقول أنو الفشل مانو مرتبط بضعف الشخصية ... لأنو ضعيف الشخصية بكون عندو خوف دائماً من تحقيق أي خطوة في مسيرتو الحياتية و خوفو هاد رح يخلي دائماً متأخر عن غيرو و يمكن كمان يكون السبب الأساسي لفشلو في الحياة و قت بيقعد و بصير يقول على ما فيني , و صعب كتير , و مستحيل .و هون بصير شخص باني حياتو على مبداً الفشل بامتياز و ألي هو : ما فيني , صعب كتي , و مستحيل .

و قوة الشخصية مطلوبة كجزء أساسي من أساسيات النجاح , لأنو النجاح بأي مجال هو انتصار و لحتى حقق هالانتصار في مرحلة لازم اجتازها و هي مرحلة الفشل و مجرد اجتياز هي المرحلة هو انتصار بحد ذاتو و الشخص الضعيف الشخصية أكيد ما رح يكلف حالو هالعناء هاد .

هاد الرد ما بقولو غير شخص قوي الإرادة و لاحظ ذكرك لكلمتين أساسيتين في الشخص صاحب الشخصية القوية : " صعب " و لكن " ممكن " يعني ما عندو شي مستحيل على عكس الشخص الفاشل تماماً .
كلام جميل جداً
ألا ما يكون في عوائق على اختلاف أشكالها بطريق النجاح , بس بالتصميم و الإرادة القوية أكيد ما بعود ألها وجود .

لا بالعكس أخ ثائر , و أنا كتير انبسطت بمناقشتك
بدي أشكرك كتير على مشاركتك المميزة و أكيد نورت الموضوع
و بتمنى أسمع آراءك دائماً بساحة حوار
و تقبل مني

كلام حلو كتير بس شوي نظري
الفشل اكيد حالة تاخير
والفشل فشل بس مانو هزيمة حسب الشخص
وهوي تحول مؤقت عن الوصول للهدف بس مافينا ننكر انو احيانا بكون دافع لترك الهدف متل ما بيكون احيانا دافع للشغل من جديد للوصول
برأيي كل الكلام عن الفشل نسبي يعني حسب درجة هالفشل وباية مجال بحياتنا
يعني الفشل باشيا ومواضيع مصيرية مابينطبق عليه هالتهاون بتعريف الفشل
اذا مدرس فاشل بايصال المعلومة هوي فاشل
واذا اب ما بيعرف يزرع بولادو الاخلاق الطيبة والتريبة الحسنة هوي فاشل بدورو بالحياة
واذا طالبة دريسة وحفيظة وشاطرة بالرياضيات وطلعلها طب بس بتخاف من شي اسمو دم وتشريح هي بفشل كبير وهالشي موجود عنجد بين طلابنا

يعني برايي هالمواضيع مانها عقبات سهلة ليرجع الواحد يقدر يصلح فيها
يعني المدرس يا بيخلق وعند حب للاعطاء وايصال المعلومة بصورة واضحة يا بلا ..حتى ولو اتعلم مية وسيلة ايضاح بدبلوم او غيرو
ونفس الشي الاب يلي مانو قادر يكون لولادو القدوة ويعلمهم الصح من الغلط ..مافينو يصلح شي الو وقت معين بحياة وتربية الولد
فينا بامتحان نفشل ونعيدو ننجح
وفينا نكون ضعاف بنواحي معينة ونركز عليها ونرجع نقوى فيها
كلو حسب نوع الفشل وباية مجال بحياتنا

سيرين تقبلي مروري مع اني ما جاوبت ع الاسئلة

Maya ,
كلامك صحيح مايا و هاد متل ما سبق و قلنا بيتبع قوة و ضعف الشخصية و ما بدنا ننسى الإرادة و الرغبة بتحقيق شيء ما أو لا ... يعني في ناس ما عندها رغبة لأنها تحاول و لو مجرد محاولة أولية للقيام بعمل ما و السبب هو عدم الرغبة عندن ببلوغ شيء ما , و كتير منشوف أنن بيرمو السبب على الظروف و الأساليب المتبعة حالياً و هاد بكون عذرن و تفسيرن لفشلن و غياب الرغبة بالانجاز لديهم . قد يكون فاشل بإيصال المعلومة لكنه بالمقابل ممكن يكون مدرس فهمان كتير منيح بمجال دراستو و لكن ينقصه الأسلوب و طريقة إيصال المعلومة للطلاب . أنا معك بهي النقطة ... بس ما بدنا ننسى أنو كثرة الممارسة مع وجود الإرادة بالتغلب على هاد الشي ممكن تلعب دور كبير في تخطي الطلاب لهي المرحلة . مجرد أنك تشاركي معنا هاد لوحدو بيسعدنا مايا

شكراً كتير ألك على مشاركتك المميزة و يا هلا فيكي دائماً بساحة حوار
و نورتي الموضوع

سيرين,

ولو إني جيت متأخرة ..... أول شي سيرين بدك تسمحيلي أنو قول أنو في موضوع غير قابل للمناقشة و هو إنك صاحبة مواضيع راااااائعة و الأسئلة يلي بدور حولنا غالبا عم تطرحيها للمناقشة ...
بالنسبة لموضوع الفشل ..بعد اللي قالو كل الزملاء وما شاء الله ما قصرو ..موضوع ملازم لحياة البشر و لا يمكن نشوف إنسان وصل للقمة إلا بعد سلسلة من الفشل و الإحباطات ولحد هلق ما سمعنا عن إنسان ناجح نجح بدون أي عقبات وبالمناسبة هناك مقولة لأحد العظماء عندما أخبره بعض الناس أن إبنه تعثر ووقع أثناء صعود إحدى الجبال ..فقال لهم : هل وقع و بقي على الأرض أم حاول من جديد ؟؟؟فقالو له: بل حاول من جديد ...فقال : فلا داعي للخوف إذا ..
وبالنسبة لتعريف الفشل ..عادة ينصح بعدم تسمية الفشل بهذا الإسم و إنما هو إخفاق في تجربة ما و الفشل الإيجابي هو الفشل الذي يعطي صاحبه حافزا للتقدم على عكس الفشل السلبي
وصناع الفشل هم (بالإضافة لكل الذي قاله الزملاء ) :هناك المجتمع لأن مجتمعنا محكوم بطبيعته لعادات و تقاليد ترسم حياة الإنسان منذ ولادته أي التعليم ثم العمل فالزواج ثم الأولاد ....إلخ و لاتترك فرصة للإبداع و الدليل على هذا رفض المجتمع لأي تغيير في حياة أفرادها و هذا المكون الأساسي الذي يعيق التقدم في حياة الإنسان
و هناك أيضا المقارنة و التي تعد عامل مهم من عوامل الفشل و تسمى أيضا قاتل النجاح فمن الطبيعي أن لكل إنسان ظروف و طبيعة مختلفة عن انسان آخر لذا كل واحد يجب أن يبرمج حياته بشكل يتلائم مع الهدف الذي يريد تحقيقه مع الأخذ بعين الإعتبار أنه كلما كانت الظروف أقسى كلما كانت المعوقات و إحتمالات الفشل أكبر
إن الرابط بين الفشل و ضعف الشخصية رابط قوي لأن الإنسان ذو الشخصية الضعيفة يصبح كالريشة في مهب الريح لذا فلا يكون له هدف محدد و يهتز عند أول نسمة أما الشخصية القوية تتجه نحو هدفها بغض النظر عن قبول الناس أو رفضهم
وهذا رأيي المتواضع و مشكورة عالموضوع يا سيرين

ranoo.sh ,
المهم أنك نورتي الموضوع و لو كنتي متأخرة
و الرائع هو حضورك و آرائك المميزة دائماً يا رنا
هاد الشي أكيد كلنا منتفق عليه , بس المهم هو وجود الإرادة و التصميم على المتابعة و ليس الاستسلام أمام أول عائق .
برأيي الفشل فشل رنا و ما فينا نقول فشل سلبي و فشل إيجابي , متل ما الشر شر و كمان ما فينا نقول أنو شر أبيض أ و إيجابي , سببو الظروف المحيطة من ظلم و غيرو , و شر سلبي أو أسود .
بس في فشل يمكن تجاوزه و تخطيه بأقل قدر ممكن من الخسائر المادية و المعنوية , و هناك فشل قد يؤدي بصاحبه الى الزوال و الاضمحلال .
و هذا بالمجمل يتوقف على طبيعة الأشخاص و على نوع الفشل و مدى تأثيره بالدرجة الثانية .

بدي أتشكرك كتير رنا على مشاركتك الحلوة معنا و انبسطت بمناقشتك و انشاء الله بشوف مشاركاتك على طول بساحة حوار و يا هلا فيكي