" الموضة "

كلمة أصبحت تتناقلها الألسن في شتى المواقف و المناسبات , حتى أصبحت العنوان البارز لأغلب الجلسات على اختلاف المواضيغ و حتى الأعمار ...

فأصبح الطعام على " الوضة "
و طريقة اللباس على " الموضة "
و قصة الشعر و ..........إلخ كلها تندرج تحت عنوان واحد هو " الموضة "

و المثير هنا أننا أصبحنا نرى الكثير الكثير من عشاق " الموضة " في وقتنا الراهن , و المثير أكتر هو " التقليد الأعمى " لهذه الموضة ..

هل تناسبني هذه الموضة ؟؟
هل تنسجم مع البيئة التي أعيش فيها ؟؟
هل اتباعي لهذه الموضة قد يؤثر علي سلباً؟؟

أسئلة غابت عن ذهن شريحة لا بأس بها من الناس ممن أصبح لديهم هاجس اسمه " الوضة""

أنتم :

1-كيف تنظرون للموضة ؟؟

2-هل أنتم مع أم ضد الموضة ؟؟

3-و ما هي مرتبة " الموضة " في اهتماماتكم ؟؟

4-و هل كل موضة هي موضة و تستحق منا أن نتبعها ؟؟

بانتظار مشاركاتكم و آرائكم ..

*************

سيرين,


بحييكي من كل قلبي على هالفكره الجديدة و الممتعة و إلي كمان الحكي بكون شيق فيها جدا..

الموضه ما في حدا ما بيحكي عنها و الصغار قبل الكبار.. كلمه بتسحر عقول كتير عالم بغض النظر صح أم خطأ و للأسف المهم إنها موضه و بس..

انا كبنت كتير بتهمني الموضه و كتير بهتم لأمورها بس على شرط إنها تكون بتناسبني.. و ما بصير كل شي موضه إنو نعملو لإنو مو كل شي بيلبقلنا..
فعلا معك حق كل شي صار عند العالم موضه و أنا متأكده إنو بنسبة 90% تقليد مو أكتر يعني شي فنانه عالميه لبست هيك فالكل بقوم يلبس متلها و بدون مراعاة للعمر أو الحجم أو البيئة الإجتماعيه أو الثقافه أو أي شي تاني..
و هادا الشي سلوك خاطئ لإنو بس بنقلد بالشكل بغض النظر ملائم أو مو ملائم
كمان متل ما ذكرتي بالأكل .. لو شي حدا مشهور و أكل أكله بتلاقيها انتشرت عند كتير عالم و بقولولك هاي أكلت الموسم لإنو فلان الفلاني أكل منها و مو شرط تكون طيبه و لا لأ..

و قصة الشعر و إلي بينعمل بالشعر من ألوان كلو بحب يعمل وبوقلك موضه يعني شي وحده كبيره بالعمر بتعمل شعرها أشقر أو خصلات ملونه أو ما بعرف شو بتنفخ بحالها كرمااااااال الموضه و ما بتفكر بعقلها أبدا إنو ممكن يلبقلها أو لأ .. بيلبق لسنها لوضعها الإجتماعي لحياتها كل هالشغلات بتلغيها..
و في بنات صبايا مهووسييين كتير بالموضه و شو ما نزل بحبو يجربوه و يعملوه و هادا كلو من باب التقليد..

أنا بوجهة نظري كل شي بالعقل و بطريقة التفكير إنو بيلبق و لا لأ هون بكون أحلى .. بعدين ممكن إحنا إلي نبتكر الموضه يعني مو شرط أساسي نشوف حدا و نعمل متلو و بس..
الموضه شي حلو و عالم آفاقو كبيره بس مو دايما بتكون حلوه و بتعكس شخصيتنا الحقيقية..
الموضه يعني كل شي حلو بيلبق لسني و لوضعي الإجتماعي و لتربايتي و لحياتي..
إذا بتناسبني مع إذا ما بتناسبني ضد..
انا الموضه بتهمني .. و كتير بحب كون عالموضه بس حسب إلي بناسبني..
لأ.. و مو ضروري كل شي جديد بكون حلو بضلها القصة شغلة أذوااق بتختلف من شخص لآخر...
سيرين,شكرا كتير عالموضوع..

سيرين,
موضوع كتير جميل وجدير بالنقاش والاهتمام...
وبتمنى تتقبلي مروري... مجال واسع...واحيانا بوجع الراس...
يعني التقيد الزايد فيها مو حلو ابدا...
كتير احيانا بيدرج شغلات....وبتكون مو حلوة ومع هيك منلاقي الكل مطبقها...
(تقليد اعمى)
عفكرة....
هلأدارج الكارو ورح تلاقو نص البنات لابسين كارو مع الموضة الي بشوفها حلوة و الي بتتناسب معي كبنت متحجبة....محترمة حالها...ومحترمة دينها.... والله مابظن انو الها مرتبة بحياتي....
اكيد الموضة شي حلو....
بس انا بنت مع الاناقة...
وكتير بهتم بأناقتي....
بس اناقتي ما بتجي بتطبيق الموضة فقط....
بتبع زوقي... طبعا لاء
بالنسبة لالي بتبع الشي الي بقتنع فيه وبيعجبني..... سيرين,

ومبروك الاشراف...

الموضة حلوة بس المفروض يكون إلها حدود لا مع ولاضد لازم تكون مناسبة ماني مهووسة بالموضة يعني الشي منو وفيه أكيد لا في موضة فاحشة ومو مناسبة بنوب هي ببعد عنها بس دائما في عالم بتلاحق الموضة بشكل أعمى

وين الموضة ؟؟؟؟؟؟؟

هلأ أنا برأيي ما لازم يكون في شي أسمو موضة والجدير بالتفكير هوي الذوق
مو ضروري أني كون ملتزم ومتابع للموضة وكل شي نزل بالسوق جديد لازم ألبس متلو أو أطبقو على حالي متل قصة الشعر ونوع البنطلون ومن هالحكي..
المهم والضروري أني كون أنيق ومحترم بشكل بحافظ فيه على عاداتنا وتقاليدنا المحافظة كمجتمع عربي شرقي
سيرين,
سيرين موضوع كتير مهم أننا نتناقش فيه لأنو عنجد غزتنا الموضة بشكل رهيب
الله يعطيكي العافية أختي على هالكلام الحلو هاد...

عندي سؤال بس لا تتضحكو!!!!!
هلأ الكارو مو قصة شعر؟؟؟؟؟

يسلمو كتير عن جديد

خالد الهبل,

اسفة ضحكت شوي ..قصدك كاريه (هي للشعر)
الكارو وبلهجة أخرى كاروهات (هي للتياب)
طبعا اخي لاتاخذني عم امزح بالنسبة للضحك 1- شي حلو اتباعو بس بما يليق بشكل الانسان و باعتدال دون اسراف.
2- مع 100% لانو الانطباع الأول يدوم صحي الشغلة موبس بالتياب بس ماحدا فيه ينكر انو أول شي يلفت الشكل الخارجي وبعدها التصرفات اللي عأساسها يا بينحكم عالشخص.
3- يعني ماني شاغلة نفسي فيها .
4-طبعا لاء في موضات لاتناسب مجتمعنا و ممكن تكون غير لائقة عشكل الجسم متل هيك موضات شي بشع انو الواحد يحرص عاتباعها لاتها ماحتزيد جمال بالعكس حتنقصو..

مشكورة

Hiba.Sh

أول شي شكراً كتير ألك هبة .
تاني شي ... أنا يلي بدي حييكي على هيك إجابات رائعة
لأنك عطيتي الموضوع حقو و وقفتي عند نقاط كتير حلوة و مهمة كمان ... باختصار مميزة يا هبة.

" بوجهة نظري كل شي بالعقل و بطريقة التفكير إنو بيلبق و لا لأ هون بكون أحلى .. بعدين ممكن إحنا إلي نبتكر الموضه يعني مو شرط أساسي نشوف حدا و نعمل متلو و بس.."

"الموضه شي حلو و عالم آفاقو كبيره بس مو دايما بتكون حلوه و بتعكس شخصيتنا الحقيقية..
الموضه يعني كل شي حلو بيلبق لسني و لوضعي الإجتماعي و لتربايتي و لحياتي.."
ما شاء الله عنك ما تركتيلي شي حتى ضيفو ..

نورتي و يا هلا فيكي دائماً و شكراً على مرورك.

fofo star

"موضوع كتير جميل وجدير بالنقاش والاهتمام...
وبتمنى تتقبلي مروري..."

تسلمي فوفو و مرورك هو الأجمل ..

"مع الموضة الي بشوفها حلوة و الي بتتناسب معي كبنت متحجبة....محترمة حالها...ومحترمة دينها"


إجابة كتير حلوة فوفو ..

"ومبروك الاشراف..."

الله يبارك فيكي ... و شكراً على مرورك و نورتي .


BRADYMOODY

"وين الموضة ؟؟؟"

و السؤال الصحيح برأيي هو " ما هو المكان أوالزمان الذي يخلو من الموضة؟؟؟"

و شكراً على مرورك أخي الكريم.


Celina

ذكرتي كلمة مهمة كتير و هي " الحدود " و أكيد وقت كل شخص بياخد هاد الشي بعين الاعتبار رح يبقى محافظ على كل شي سواء كان بمظهرو الخارجي أو حتى بحياتو ككل.

نورتي سيلينا و يا مية هلا .


خالد الهبل

"المهم والضروري أني كون أنيق ومحترم بشكل بحافظ فيه على عاداتنا وتقاليدنا

المحافظة كمجتمع عربي شرقي"

رأيك كتير بحترمو خالد , و طالما حكيت عن الأناقة و الاحترام فأكيد ما بغيبو

عنك ..

شكراً كتير لمرورك خالد و نورت ..

تاج

"شي حلو اتباعو بس بما يليق بشكل الانسان و باعتدال دون اسراف."

اللياقة , الاعتدال , عدم الإسراف

برأيي كل شخص بحب الموضة لازم يحط هالأمور التلاتي قدامو و يممشي على أساسن

و أكيد وقتها بتكون الموضة موضة ..

نورتي يا تاج و شكراً كتير على مرورك..

أنس الدالي

"بشكل طبيعي يعني الي بناسبني باخدو منها والي ما بناسبني وبناسب شخصيتي ما باخدو"

و هاد هو الكلام الصح ألي ما بيختلفو عليه اتنين .

." وانما الشغلة بتتبع للزوق"

كلام سليم 100بالمية .

"ميرسي على هالموضوع وبانتظار جديدك"

يا مية أهلا و سهلا فيك أنس و نحنا كمان بانتظار مواضيعك المميزة.

و شكراً على مرورك و نورت .