سعيدة حابب اطرح اليوم موضوع كتيير بسيط هوي العدالة الاجتماعية
كتيير هالمصطلح العالم بتنادي فيه بس للأسف مو موجود ولا بأي شكل من الأشكال يعني شو بيمنعنا من تطبيق العدالة الاجتماعية يعني منطقيا" هل من الممكن ان نسكت على واقع ان هناك أشخاص يموتون من الجوع واشخاص يموتون من التخمة
فا شو رأيكم بالعدالة الاجتماعية وكيف السبيل الأمثل لتطبيقها؟
وشكرا" لكم

العقل زينة, جميل ...

ما رأيكم أن نبدأ بتعريف " العدالة الاحتماعية " كلٌّ حسب وجهة نظره ؟

و لا مانع من أمثلة

سعيدة علاء..

الموضوع رغم بساطته يا علاء لكنّه معقّد ..
و بناء على اقتراح فارس ..
فالعدالة الاجتماعية من وجهة نظري " كمفهوم " تعادل " المدينة الفاضلة "
فهي حلم رائع لكلّ المعذّبين .. قد تكون موجودة لكن بنسبة ضئيلة جدا ..
ان نفّكر بانسانية بتسامح.. أن نأخذ لكن دون جشع أن نعطي حين نملك ..
كل ذلك " من المفترض أن يكون " لكن لننظر حولنا جيدا,هل هذا ما يحصل حقا ؟؟
حتى على مستوى العائلة الواحدة .. هل حقا ثمّة تكافل اجتماعي ؟؟؟
ليس من باب التشاؤم أبدا ..
لكن هو سؤال و .. وحده الواقع من يملك الجواب عليه ..

و الحل ؟؟؟

حين ...

يُفتَح صدر عالم أهدابه المحبّة,البساطة, الغد الذي لاتضمر الشمس احتمال مثله

شكرا علاء ..

العدالة الاجتماعية من اهم الاركان التي يبنى عليها النظام الاجتماعي
وهي بناء مظله تحمي الفئات الأقل حظ في المجتمع....
وبصراحه كلمة العداله الأجتماعيه أشبه بالمدينة الفاضله متل ما قلت رنا
يعني فيها ألف شعبه....
مثلا الأجر بينعطى حسب العمل والانتاج والابداع والشهاده العلمية...
فمثلا المهندس بياخد أكتر من العامل نظرا للشهاده يلي حاملها بس ومن المنطلق نفسه في عمّال صرلهم عم يشتغلو بهالمجال من عشر سنين ...
ومع هيك بتلاقي فرق طبقي بالنسبه للأجره
ويالتالي يجب ضمان الحد الادنى للاجور التي تضمن معيشة كريمة للعامل غير الخبير
وفي مجال تاني ....
مثلا الأجور تتناسب مع حجم منفعة العمل....يعني الطبيب بيقدم منفعه للمجتمع أكثر من المعلم وبالتالي لازم يكون أجره أكثر
لان الطبيب يقضي فترة اطول في الدراسه وفي الأستهلاك حتى يصل لعمر ال28 كأقل تقدير ليحصل على شهاده تخوله للعمل بها ...وبالتالي يجب أن تكون منفعته أكثر من المعلم الذي حصل على معهد اعداد مدرسين وابتدأ بالعمل في ال22 من عمره

ومن هالجهه بحقلنا ننتقض أجور لاعبين الرياضه والفنانين التي تتجاوز الأطباء والمهندسين!!!
أو مثلا كيف يأخذ المهندسين البيض البشره في أميركا أكثر من المهندسين السود!!!!
وفي مثال عن توارث الحرفة ....
فمثلا المزارع ورث هالمجال من الآباء بغض النظر اذا كان مردودها جيد أم سيئ وبالتالي رح تتوارث مرودهم المادي بغض النظر اذا كان عن المقدار اذا كان جيد أو تعيس
وبالخير بقلك المتل الفقر ما تعدّى على حدى


بصراحه أعذروني عن فزلكتي اللغويه بس كان عندي ماده عن الأقتصاد الزراعي ...وطلعت من عيوني لنجحتها..
وبالأخر رح أحكيلكم نكته مشان تروقو

شحاد شاف بنت سمينة, قالها الله يخليكي صار لي يومين ما أكلت لقمة . . .
ردت عليه:مو طبيعي أنا بهنيك على إرادتك مين الدكتور الرائع اللي عامل عندو هدا الرجيم

العدالة الاجتماعية بظن انو قريبة لقصة رجل كان إماماً راجعه رجلان يحتكمان إليه بتقسيم جرة من الذهب وجداه في إحدى الحدائق ::::: فسأل الإمام تريدان عدالة العباد أم عدالة الله فقالا مندهشين : نريد عدالة الله فحمل الإمام قطعتان من الذهب و أعطاه لأحدهما و الأخر أعطاه ما تبقى وقال هذه هي عدالة الله يجب أن ترضوا بها
فاستغرب الرجلان
الخلاصة كل ما نملكه هي هبة من الله قليل أم كثير لا يجوز ان ننظر الى الغني بمنظور الاستغراب (يمكن بيوم من الايام تربح كرت يانصيب ) أهي عدالة
آسف على الاطالة زملاء

سعيدة للكل
فارس شكرا" ألك واقتراح دقيق جدا
هلق بداية العدالة الاجتماعية يقول أحد المفكريين الكبار لكل حسب حاجاته ولكل حسب إمكاناته
يعني العدالة الاجتماعية أكيد مو يكونو الكل سواسية أكيد بس مو كمان يكون في فرق طبقي هائل يعني التعريف كتيير كافي برأيي العدالة الإجتماعية هيي انو مايكون في استغلال او تسلط هيي مجتمع بكون الكل دون استثناء عايش حياة كريمة ف
من غير المقبول يكون في تفاوت هائل كبير بالمعيشة هاد من الناحية الاقتصادية أما من الناحية الاجتماعية لازم يعامل الانسان حسب انسانيتو ومتل مابقولو ما في خيار وفقوس وين ما كان من العائلة الواحدة حتى المجتمع الكبير لازم نعامل بعضنا كأخوة مو كا أشخاص مختلفين على كلن فيروز بس غنت أغنية صبحي الجيز الكل انتقدوها عليها وصبحي الجيز هوي زبال استشهد اثناء الاجتياح الإسرائيلي على لبنان بس لأنو زبال صارو العالم ينقدوها أكيد العدالة الاجتماعية مفقودة جدا" هذه الأيام وعلى جميع الأصعدة .هادا تعريفي للعدالة الإجتماعية

الحل هلق الحل صعب كتيير بس لازم يكون عنا ثقافة بتقدر تتفهم انو خيرات المجتمع ملك للمجتمع ولازم نفهم انو نحنا اخوة بالإنسانية والمحبة هيي اقرب وسيلة لذلك بس أكيد حاليا" مستحيل التطبيق وحتى انو نفهم

أهلن رنا تشبيه رائع المدينة الفاضلة وما أبعدنا عن المدينة الفاضلة أكيد ألي عم يحصل حولنا غير شي كليا" شكرا" لمرورك دائما"
همسات الحب شكرا" لمرورك أكيد كلامك منطقي العدالة الاجتماعية تعني التساوي في الحقوق والواجبات وتعني النظرة الواحدة والمشابهة لكل الأشخاص وكمان النظرة المشابهة للشب والبنت وشكرا" على المرور أخي

تماما" هاد كلام سليم جدا" لكل حسب حاجاته ولكل حسب امكاناته
emelos
يعني القصة أثرت فيي كتيير
بس يعني ياريت كنت لو وضحت موثوقيتها أكتر يعني الإمام عندو معرفة كبيرة في عدالة الله متل مو مبين
فا هالحكم الرهيب متأكد هوي من الله فا اذا فيك تخبرنا مين هالوكيل الحصري يعني انا القصة فوتتني بالحيط صراحة يعني كيف عرف انو قسمة الله العادلة
ياجماعة حيجتنا فهم فايت بالحيط وقصص طريفة يعني ياريت نحاول ننظر للموضوع بطريقة أوسع أكيد كلشي من وإلى الله هلق الاحتلال من الله سبحانه وتعالى ؟ وهوي ابتلانا بكون فا ما في داعي نقاوم لأنو كلشي من الله
عزيزي الخير من الله والشر من أنفسنا والرسول الكريم يقول من رأى منكم منكرا" فليغيره بيده فإن لم يستطع فبلسانه ان لم يستطع فبقلبه وذلك أضعف الإيمان وفي جملة بتقول الساكت عن الحق شيطان أخرس
اي ومن شان كرت اليانصيب اذا عدالة أو لأ هاد غير شي وغير موضوع أكيد نحنا عم نحكي عن استغلال الإنسان لأخيه الإنسان هاد موضوعنا
شكرا" لمرور

سلامات يا شباب
حقيقة بتشكرك يا صديقي الغالي على دعوتك لي على هالمنتدى
يعني قليل أو نادر تلاقي منتديات بتحكي بهيك مواضيع

العدالة الاجتماعية من وجهة نظري بترتكز على عدة أمور
أولها تكافؤ الفرص: واللي بكل تأكيد ما بيعني إني أنا يصحلي شغل ومرتب متل الطبيب مثلا
وإنما بيعني إنو إذا شخصين إلهون نفس المؤهلات والمستوى لازم تكون فرصهم بالحصول على نفس العمل متساوية يعني إذا بدكون إلغاء الوساطة والرشوى
وتانيها عدالة الأجور: وعدالة الأجور شقين الأول عدالة المستوى العام للأجور يعني إنو تكون الأجور الممنوحة لشخص ما تغطي احتياجاتو الأساسية والكمالية
والتاني العدالة النسبية للأجور يعني إذا واحد عم يبذل مجهود أكتر من واحد تاني (والتنين بيشتغلو بنفس المجال) المفروض إنو يكون أجرو أعلى

وتالتها وهوي الأهم واللي تلقائيا رح يقود للعنصرين اللي سبقو هو إلغاء أي شكل من أشكال التمييز يعني تقييم المواطن يرتكز فقط على ما يقدمه للمجتمع مو على لونو ولا على نسبو ولا أي شي تاني

ومقولة من كل حسب امكاناته ولكل حسب حاجته أنا ماني معها وما بشوفها بتحقق العدالة الاجتماعية لأنو هالمقولة بتعمل الناس سواسية - والسواسية مانها عدالة على فكرة - يعني المنطق بيقول إنو الطبيب لازم يكون أجرو أعلى من العامل العادي صح؟


وفي الي تعليق زغير
أنا بختلف مع الأخ kma
يعني بعتقد إنو المدرس هوي أكتر شخص عم يقدم خدمة للوطن لأنو لولاه ما كان الطبيب طبيب ولا كان المهندس مهندس
وتراجع أجور المدرسين وانخفاضها هوي سبب كبير للأزمة اللي نحنا عايشينها

المشكلة إنو النظرة لقطاع التعليم عنا إنو قطاع مستهلك يعني بيسحب عملة من الدولة بدون مردود
لهيك بيصير التركيز على القطاعات التانية متل الزراعة والصناعة وغيرها اللي في منها مردود
لكن لما التعليم ما بيتلقى الدعم المطلوب هالشي رح يأثر على أداء باقي القطاعات بشكل كبير يعني الطبيب بيصير نص طبيب والمهندس ربع مهندس وإلخ

بعتذر على الإطالة وشكرا على الموضوع الكبير