فارس,
شكرا ألك على هاللفتة الرائعة و مين منا ما بحب و بيحترم هاضيف الرفيع يلي كان منا كأب و صديق شكر للدكتور جهاد على الإجابات المنطقية و قبوله

و إذا رئيس دولة بأكملها عبر عن إعجابو فيك... فشو مارح نقول ما رح نعطيك حقك

عدنا

[quote]
ولكنني آمنت دائما بنفسي وبقدرتي على تحقيق أهدافي في هذه الحياة، وكان أن اجتهدت ( ولكل منا في اسمه نصيب... !) وحققت المهنة التي كنت احلم بها
[/quote]
هالشي دايما بحاول طبقو بحياتي العملية و شعاري دوما هوي
Vouloir, c'est pouvoir
[quote]
لأنني أهوى الاستكشاف وأعشق السفر، وأؤمن بمبدأ : اغترب تتجدد
[/quote]
شغلي كتير حلوة و انا بحبها لأني بآمن بانها بتخلينا نتعرف على ناس جدد و كما نتعرف على الإختلاف بطرق التفكير
بس للأسف ما بقدر بعد كتير عن حمص اكتر من شهر

[quote]
Ecrivez Français
[/quote]
لأزم اطلع على هالكتاب... اذا في حدا بيعرف كيف بقدر احصل عليه
[quote]
(دون الخوض هنا طبعاً في بعض المنغصات التي يستطيع الجميع ذكرها والتحدث عنها في هذا السياق)
[/quote]
جواب دبلوماسي كتير.. بس فعلا جامعتنا بهالمجال احسن بكتير من غيرها
[quote]
أما بالنسبة لماجستير الترجمة فنحن في القسم نعمل على الأعداد الجيد له وتأمين مستلزمات نجاحه من حيث الكوادر التدريسية المؤهلة لهذا النوع من التخصص العالي باللغة الفرنسية، وأعتقد أنه من الممكن التفكير أن العام القادم قد يشهد بعون الله افتتاح هذا التخصص. ونحن مع طلبتنا الأعزاء على الموعد
[/quote]
خيييي... الله يطمنك يا دكتور متل ما طمنتني
كنت كل الفترة الماضية عم لوم حاي لأني ما لحقت سجل بالمجستير السني
و طالما عم بتقول لنشالله انو رح يتوج بفضل جهودك ماجستير الترجمة
نشالله رح كون ع الموعد كمان
[quote]
أن للمدرس الناجح صفات إنسانية وتربوية محددة لا بد من توفرها وأهمها الكفاءة المهنية وسعة الصدر والسعي إلى خلق جو من المودة والاحترام المتبادل مع المتعلمين في قاعة الصف للوصل إلى عقولهم وقلوبهم، والسعي الصادق إلى مساعدتهم لتحقيق الحد الأقصى من الفائدة التي يتوقعونها منه، فنجاح المتعلم وتفوقه في المادة هو نجاح للمدرس لا يقل عنه شأناً وأهمية
[/quote]
هالكلام كتير منطقي و خصوصي للمدرسين الجدد متلي

و بإذن الله وصلت لهالدرجة من خلال معاملة طلابي كأخ احيانا أو كأب و قت بيتطلب الموقف الحزم... كسب احترام الطلاب و مساعدتن
[quote]
أرجو ألا أندم على قراري هذا في يوم من الأيام،
[/quote]
نشالله لاء... كلنا منحبك دكتور و نحنا معك نشالله بكل شي .. لولا جهودك ما كان عنا لادبلوم ولا ماجستير
الله يعطيك العافية و جامعتنا أحق من جامعة حلب فيك
الله يخليلنا ياك و نشاللة مافي من هالشي


فارس
[quote]
28. بالنسبة إلى موقعنا (( آرتين )) , ماذا يقترح الدكتور جهاد للتحسين من سوية أداء الموقع ؟ و ما رأيه به ؟
أشكر موقع آرتين على مبادرته الطيبة وأعتقد أنه يشكل، مع نظرائه من المواقع الطلابية الأخرى فرصة طيبة لطلابنا في القسم للتبادل والمتابعة وأشجّعهم على التواصل معه بكل ما يقدمه لخدمتهم، فهو في النهاية موقع خدمي مفيد، ولكنه يحتاج ربما إلى الاهتمام أكثر باللغة الفرنسية على صفحاته وتوفير مواد تعليمية وثقافية جديدة لطلبتنا، ونحن على استعداد للتعاون معه في هذا الأمر ونتمنى له مزيداً من النجاح كما نرجو لطلابنا كل الخير والتوفيق والتقدم. والسلام.
[/quote]
أخ فارس هالكلام لازم يتاخد ماخد الجد ليس فقط من أجل رفع سوية أقسام الفرنسي و انما كل الأقسام... طبعا ماني عم نظَر عليك .. لذا يجب اتخاذ اجراءات ضرورية و هي بإشراك الدكاترة معنا و هالشي بيصير بشرح الهدف من انشاء آرتين كموقع تعليمي و ترفيهي بكلية الآداب
و توضيح هالشي لكل دكتور



الدكتور جهاد سلوم
متل ما سبق بشكرك على قبول إجراء المقابلة معنا... و من هون بصفتي من خطط بالبداية للمقابلة بقترح اقتراح تاني جديد و هوي

حضرتك عم بتقول انو نشالله رح يفتح ماجستير للترجمة سنة الجاي... لذا بدي لو في مجال انك تنضم لآرتين ضمن مجموعة الدكاترة و تشرف على قسم الترجمة و تو جهنا فيه أو تساعدنا بإعادة هيكلة بقية الأقسام و تفعيلها بشكل مدروس أكتر ... بعرف طلبي سئيل شوي و خصوصي اني بعرف انو وقتك مانو ملكك.. أو تخصص من و قتك يوم بالأسبوع لنستفيد من خبراتك




فارس
[quote]
و كل الشكر للزميلة Maya على المساهمة الفعالة في اجراء هذه المقابلة
[/quote]
بدي منك تفسير للجملة الأخيرة
هوي انو ما لازم تنسى جهد
Widad
يلي راحت شي أكترمن 3 مرات بطقة الشوب منشان تشوف الدكتور و تظبت المقابلة معو
و كمان جهدي أنا يعني
Armando
كمان راح ع الجامعة خصوصي اكتر من 5 مرات بس بدون ما يقدر يلاقيه ..و كمان هوي صاحب الفكرة

انا ما بقلك انو
Maya
ما بذلت جهد .. عملت جهد بتأمين الإتصال بالدكتور
و شكرا[/b]

Armando, لك الله يسامحك

اي انت صاحب فكرة المقابلة كلها

آسف انو ما ذكرت اسمك او اسم وداد ..... بس كلنا منعرف انو انتو أكتر شي قدمتو مع مايا شغل و تحضير للمقابلة ..... و كمان نزلاتكم ع الكلية و ما تلاقو الدكتور جهد لا ينتسى

بصراحة اللي صار اني ذكرت فقط اللي حضرو بالمقابلة .... بس مايا مو بس حضرت المقابلة .. و انما هي اللي رتبت الأسئلة و استخرجت أسئلة الأعضاء العلمية و نسقتها و اشتغلت فيها لحتى طلعت بهالشكل المميز .... كان بودي أنو انتو تحضرو كمان ... بس حقكم علينا

عموما كلنا منتعاون و ما ممكن حدا يتعمد نكران جهد الآخر

يعني الدكتور جهاد من الدكاترة الفريدين من نوعون انا بعرفوا بالحياة العادييي اللي بعيدي عن الجامعة شخص رائع و مثقف و عندو اهتمامات بالكمبيوترات بشكل محترف شكرا دكتور جهاد عالمقابلة الحلوي و انشالله ما يقطعنا و انشالله عقبال رئاسة القسم و شكرا لفارس اللي عمل معو اللقاء .............

طلابنا الأعزاء،

عبر تعليقاتكم أقرأ بسرور مشاعركم الطيبة وهي تعكس بالنسبة لي حقيقة أؤمن بها هي أنكم تستحقون كل الخير والمساندة في ظروف دراستكم الجامعية الحساسة التي تشهد بناء ذواتكم الاجتماعية والمهنية، وتتطلعون بعدها إلى غدٍ مشرق لكم ولأسركم من وراءكم، وأؤكد لكم من جديد أننا كمدرسين نتحمل قسطاً كبيراً من المسؤولية في هذا المسار، ولا ننوي التخلي عنه... ألستم في النهاية أبناؤنا، أبناء هذا الوطن العزيز؟ ولكن عليكم بالاجتهاد والسعي إلى تحصيل العلم بسواعدكم وعقولكم متذكرين قول الشاعر:

وما نيل المطالب بالتمني ولكن تؤخذ الدنيا غِلابا

بالنسبة لي، مشاعركم التي عبّرتم عنها على هذه الصفحات تزيدني رغبة بالتواصل معكم حتى تتلقوا من العلم والفائدة معنا ماتنتظرون. والله الموفق.

د. جهاد سلوم

شكرا لك استاذنا الموقر والله يعطيك العافية

د. جهاد سلوم,

عنجد يا دكتور نيال طلاب الفرنسي عليك

من أول مقابلة عملا هالقسم وأنا عندي أمل أنو يكون في حافز أمام الدكاترة أنن يتواصلوا معنا...ونطرت دكاترة الانجليزي كتير

بس سبحان الله دكتور العربي الوحيد الدكتور خلدون فوراً سجل وحالياً دكتور الفرنسي الدكتور جهاد
وهالشي كبّر الأمل جواتنا..وأنا شخصياً لرح أنطر يومياً لعل وعسى يشاركونا دكاترة الانجليزي

بظن بتصير الفائدة حقيقية وملموسة أكتر...ومنسأل بقلب قوي..وربما نكسر حاجز الخجل أمام الطالب اللي بيخجل يدخل مكتب الدكتور
أضف إلى ذلك...الدكتور بمكتبو قد يكون مرهق وتعبان وفعلياً مانو بوضع جاهز للعطاء
بينما عالنت بيدخل بوقت راحتو وفراغو فقط

وتحية مني للقلب المحب والصدر الواسع الدكتور جهاد اللي عنجد هو نعمة حقيقية لطلابو
وبكرة بتشوف أيام الامتحانات رح يهلكوك الطلاب

وهي مني أنا للدكتور أحلى عراضة ترحيباً بتسجيلو معنا