نرجو من الدكتور  كتابة  مقالة نموذجية-essay-  لأي موضوع ادبي كان-themes-   وذلك  لأي رواية يختارها الدكتور  من الروايات التي يدرسها الطلاب خلال الاربع سنوات وذلك لكي نرى النموذج المثالي للمقالة المطلوبة  وخاصة ان هذا هو السؤال الرئيسي لاغلب مواد اللغة الانكليزية والتي يواجه في الطلبة صعوبات كبيرة
مع الشكر الجزيل للدكتور محمد سمهر

ان شاء الله بحاول بالمستقبل, و لكن الفكرة انو فكرة المقالة المثالية صعب تتحقق لانو المقالة المثالية لشخص ممكن تكون غير مثالية لشخص اخر و مقالة المسرح غير مقالة النثر او الشعر و اكيد رح تكون مختلفة تماما عن مقالات اللغة. بشكل عام المقالة المثالية لازم تكون حول فكرة محورية واحدة على الاقل, و لازم كل فكرة تخدم الفكرة الاساسية مع البعد عن الاسهاب خاصة الوصفي.  في كتب كتير مختصة بالموضوع و بتلاقي كتير على النت اكيد, و بنصحك دائما تسال دكتور المادة او المواد نفسها عن المقالة المثالية بالنسبة الن. ما بعرف حضرتك اي سنة, بس ممكن تستفيد من كتاب Writing Power  المقرر لمادة الانشاء 3 للسنة التانية لانه منظم بشكل حلو و هو هدفه الاساسي تعليم الطالب الكتابة الصحيحة انطلاقا من الجملة و حتى المقالة بكافة انواعها.
تحياتي

تحية استاذ نور
للاسف الكتاب غير متوفر بصيغة pdf, حاولت كتير بحث على النت و ما قدرت لاقيه.
الكتاب اللي ذكرته كتير منيح و في افكار جيدة جدا, و طالما فحصك قريب, رح اعطيك موقع ان شاء الله بفيدك:
Désolé, vous devez vous inscrire pour voir le lien Si vous êtes membre, il suffit de signer po

موقع حلو و مرتب بطريق عرضه للافكار و بيمشي معك خطوة بخطوة, و اكيد في مواقع كتيرة على النت عن الموضوع نفسه بس بدك تنتبه انو ما يكون موقع عن college application essays لانو مختلفة تماما عن انواع المقالات العادية (يسمى بالعادة application essay)
بتمنالك التوفيق و تحياتي لك

دكتور سمهر لك جزيل الشكر على تعاونك وتعبك معنا بس دكتور اول سؤال تصحيحح الاخطاء ما كان مفهوم بالفحص كتير موبس الي طبعا لكل الطلاب يعني ما عرفنا بالضبط شو بدنا نكتب وسؤال الاخير مقالةعن grammar ماعرفنا بالضبط اي النقاط لي بدنا نكتبه يا ريت دكتور بالدورة الصيفية تكون الاسئلة اوضح من هالدورة انا دكتور كتبت مليح بس ما بعرف لي رسبت   بعرف ان ع بعذبك معنا شكرا كتير

بكتاب الطرائق صفحة 53, المقطع الثاني السطر 13, هون بيبدأ المقطع اللي فيه افكار السؤال الرابع, و ما قبله مقدمه, و هو احد المقاطع اللي قلت انو تركزوا عليا, و انا قلت بالحرف الواحد باخر محاضرة المقاطع لازم تنفهم منيح و انو مقاطع Quirk بفصل تدريس القواعد هي اهم مقاطع. غير هيك ما فيني اعمل, و بالنسبة للسؤال الاول الجمل تعتمد على الفهم و ما مطلوب اي شرح, مجرد ذكر ليش الجملة غلط, و متل ما قلت لزميلتك بموضوع سابق, نزلت موضوع عن الاسئلة بقسمي, باريت تطلعي عليه لو سمحت مشان تاخدي فكرة افضل.  و رجاء لعد تقولي او تطلبي تكون الاسئلة اوضح لانو اوضح من هيك ما عد في و اذا ماكانت واضحة بالنسبة الك بكون في مشكلة بدراستك للمادة. و اذا عندك سؤال لا تترددي اسالي, سواء هون او رسالة خاصة و بجاوبك قد ما بدك, بس انو اسئلة صعبة و ما مفهومة هادا الكلام ياريت تبعدي عنه و شكرا الك و بتمنالك النجاح بالدورة القادمة.

مسا الخير
اول شي بشكرك دكتور محمد ع جهدك و متابعتك النا
بالنسبة لموضوع المقالة المثالية فكلامك صح دكتور لان كل مادة و كل دكتور اله مقالة مثالية خاصة فيه !!
و بالنسبة لكتاب writing power انا درستو تحت اشرافك دكتور و فعلا ملم بكل انواع المقالة و سلس
و انا بالامتحان بالفصل الاول كتبت مقالة اقناعية و اخدت علامة 82
بس صدمتي  اني بالفصل التاني اتقدمت للامتحان و المقالة كانت مقارنة بين حياة الريف و المدينة !!! يعني مقالة بسيطة جدا و اسهل بكتير من الاقناعية و خطواتا واضحة و انا التزمت بكل عناصرا و متل ما اتعلمت ب كتاب writing power بس اتفاجأت بعلامتي ب الستينات .....
فأنا بحب أسال السؤال الي بينطرح كتير بين الطلبة
هل فعلا بتمرق اوراق امتحانية ما بيقراها بتركيز الدكتور او الدكتورة المصححة ؟؟؟؟
و اذا حسينا بظلم بالعلامة هل فعلا لا جدوى من تقديم طلب الاعتراض ؟؟؟؟؟؟؟
آسفة للاطالة بس من حرقة البي والله

مرة تانية الك جزيل الشكر دكتور

تحياتي انسة
اولا بهنيكي على العلامة الحلوة بالفصل الاول, و هاد بدل انو لغتك جيدة جدا و انك التزمت بترتيب المقالة و افكارا. تعقيبا على فكرة المقالة المثالية, خلينا نقول انو في شي اسمه standard بمعنى انو كل المقالات نظريا هي عبارة عن تعامل مع فكرة اساسية و توسيعها سواء بافكار جدلية او اقناعية او وصفية او امثلة. طبعا هناك امور لا خلاف عليها, مثلا: العنوان, شكل المقال (بريطاني او امريكي), المقدمة و الخاتمة الخ و اكيد و اهم نقطة القواعد و ربط الجمل بشكل جيد. طبعا هل الامور لا تنطبق فقط على مادة الانشاء و انما على كل المواد النظرية الادبية. المقالات العلمية مختلفة لانها تتعامل مع حقائق و بعيدة عن الوصف و السرد, و ان شاء الله مستقبلا اذا درستي لغويات رح تلاقي ايضا انو المقالة رح تكون مختلفة جدا. اذا طالما في شي standard  معناه انه الاختلاف بمثالية المقال من دكتور لاخر او خلينا نقول قارئ لاخر بكون بالافكار بشكل اساسي, و ممكن بترتيب و تطوير الافكار. اذا بتذكري بالنسبة للمقالة الجدلية او الاقناعية ذكرت انو في عنا "قوالب" لترتيب الافكار, و بالتالي ممكن الاختلاف يكون هون. ممكن بالنسبة الي المقالة المثالية تكون المقالة اللي بتحسي من خلالها انو الطالب عنده قدرة على التعبير باللغة الانكليزية عن افكاره الخاصة, و تكون سلسة بالقراءة بحيث تكون الافكار مرتبطة ببعضا. ممكن لشخص اخر المقالة المثالية تكون المقالة اللي فيها امثلة كثير او شواهد او بتتبع الشكل البريطاني حصرا الخ. لذلك دائما لازم تتأكدي من مدرس كل مقرر شو الشي اللي بفضله بس اهم نقطة انو حتى لو ما عملت هل الشي لازم تتأكدي انو طالما اللغة و الافكار جيدة اذا مقالتك مثالية كطالبة باول دراستك. ممكن لهل السبب اختلفت علامتك, احتمال انو كان الموضوع من السهل الممتنع ككتابة مثلا و كان في ضعف بالافكار؟
كتاب Writing Power رائع و بنصحك خليكي تقرأي فيه لتتخرجي و انا اخترته لانه بخلي الطالب يكون عنده لغة سليمة و بصير عنده قدرة على الكتابة و بما انو رح تكتبي كتير مقالات لتتخرجي اذا رح يساعدك كتير.
بنصحك انو تتمرني على كتابة كل انواع المقالات, حاولي تقرأي كتير بالانكليزي, روايات, مقالات, كتب, جرايد, اي شي. و انت و عم تقرأي دائما انتبهي لاسلوب الكاتب, حللي النص و شوفي ليش كل جملة بمكانا. اذا عندك اهتمام لغوي, و حابي تمتحني نفسك بنصحك بكتاب Alice's Adventures in Wonderland و هو اكيد قصة معروفة جدا, و لكن النقطة انو الكتاب الاصلي بالانكليزي مكتوب بلغة رائعة و صعبة لانو مجازية و فيها كتير تلاعب لفظي.
بالنسبة لسؤالك عن التصحيح, اكيد ما بتوقع تكون هيك الحالة و بالنسبة لطلب الاعتراض هو اعادة لجمع العلامات و ليس لتصحيح الورقة و طالما الورقة بتدقق اكتر من مرة احتمال انو يكون في غلط تقريبا معدوم.
خليكي واثقة من نفسك, و احساسك انو انظلمتي خليه يكون دافع انو تشتغلي اكتر و تشوفي موضع الضعف و تحسنيه و الحل الوحيد هو انو تتأكدي من اجاباتك من الدكتور او الدكتورة.

تحياتي و بتمنالك التوفيق

تحية للجميع
رح شارك معكن مواقع ادبية رائعة و بتمنى تستفيدوا منها لاقصى درجة.

الموقع الاول:
Désolé, vous devez vous inscrire pour voir le lien Si vous êtes membre, il suffit de signer po

موقع ادبي فيه كتير مقالات ادبية متنوعة من الادب الكلاسيكي, و شكسبير حتى الفترة الحديثة, و فيه مقالات عن كيفية دراسة الادب و كتابة مقالات ادبية. و هي مكتوبة من قبل صحفيين مختصين, يعني رح تكون مقالات محترفة و اكثر من ممتازة و رح تلاقوا مقالات عن اعمال بتدرسوا بالجامعة.

الموقع الثاني:
Désolé, vous devez vous inscrire pour voir le lien Si vous êtes membre, il suffit de signer po

ايضا موقع رائع و فيه مقالات ادبية شاملة لاكثر من فترة زمنية و اكثر من كاتب و المقالات مرتبة ترتيب ابجدي و في امكانية البحث.

الموقع الثالث:
Désolé, vous devez vous inscrire pour voir le lien Si vous êtes membre, il suffit de signer po
اغلبه مقالات ادبية من الفترة الكلاسيكية و الوسطى و غيرها, و الموقع فيه مقالات مكتوبة بيد اختصاصين بالادب بالاضافة لمقالات مكتوبة بيد طلاب (المقال اللي بجانبه حرف s بكون كاتبه طالب).

بتمنى انو تستفيدوا من المواقع بدراستكن و تحاولوا انو تكتبوا بنفس الطريقة.

بالتوفيق