اييييييييييييه على آرتين أيام زمان

فارس · **Inscrit le:** 01 Mars 2007

klaydes, عصام,
اي من زمان رجعلونا أجواء الحماس و تبادل الردود العفوي هاد :mrgreen:

يعني بصراحة انا احد الأشخاص اللي كنت شارك منيح و هلأ صارت مشاركاتي قليلة نوعا ما .
المشكلة حسب ما استنتجت انو مو بآرتين , و انما بالأشخاص نفسهم .
آرتين موجود و رح يبقى بإذن الله , ساحاتو موجودة و امكانية طرح المواضيع ما انحظرت و كلو متل ما هو . و انما الأشخاص هاد اللي تخرج و هاد اللي انشغل بدراستو و هاد اللي ما بحب الصداقات الجديدة و بشوف الوجوه اللي متعود عليها غابت فبغيب معها مع الأسف .

الأسباب كتيرة و نحن كفريق عمل بآرتين مهمتنا انو نحافظ ع أهداف آرتين و استراتيجيتو .
أهدافو ببساطة خدمية بالمرتبة الأولى , من توفير مساحة تواصل بين الطلاب , لتوفير ساحة تواصل بين الطلاب و الدكاترة , لتوفير ما أمكن من المعلومات و خاصة من خلال بعض المشرفين الرائعين و اللي عم يقدمو جهد كبير و خدمات عم تكون للبعض جدا مهمة و بمثابة نجدة ببعض الأحيان . أكيد أول هدول المشرفين بكون عصام الله يجزيه الخير اللي عم يوصل لمرحة بأوقات الامتحان انو عم يداوم ع الجامعة بالصيف بس مشان يجيب نتائج المواد للطلاب اللي عم يطرحو اسمهم , علماً انو بدو سرفيسين من بيتو للجامعة ! . و متل عصام غيرو من المشرفين اللي عم يقدمو جهد يشكرون عليه .

هي مثال ع الأهداف أو أهمها , اما الاستراتيجية فعم تكون من خلال ضبط المشاركات و المواضيع . بضبطنا للمشاركات و المواضيع و تطبيق قوانين المنتدى ما منكون عم نمنع حرية الأعضاء بالأحاديث السياسية مثلا , و انما عم نحمي آرتين من أعين الحاسدين و اللي بدهم شغلة عليه لحتى يتبلوه و يعملو منها قصة . لولا هيك الله بيعلم أنو انا أول واحد برغب بالتحدث بالمواضيع السياسية و الحوار بمختلف الأمور خاصة بهيك ظروف عم يمر فيها بلدنا . بس متل ما قلت .. و بمعنى آخر , الوقاية خير من العلاج .

نحن دائما منتطلع لأي أعضاء نشطين جدد , و عنا الآليات اللي بتدعمهم و بتميز جهودهم . ربما يكون في ضعف عنا من الناحية الإعلامية للموقع , و هالشي أكتر مصيبة منعاني منها بآرتين و الكل بيعرف انو سببها جهتين قلت مين هنن و رح رد قول :
1- إدارة الجامعة , و بالأخص إدارة النظم و المعلومات
2- الاتحاد الوطني لـ ( طلبة سوريا ) , و بالأخص فرع جامعة البعث
هدول الجهتين شكلو أكبر العقبات ادام الموقع من خلال منع النتائج الامتحانية انو تنزل عليه , مع العلم انو ببقية كل الجامعات المواقع الخاصة مسموح الها انو تاخد النتائج بحرية .
بالنسبة لادارة الجامعة , فبقولو انو هالشي حصري لمواقع الكليات الرسمية و ماداها موجودة فمافي داعي يكون في علامات على غير مواقع ! و انا بقول انو هاد خطأ كبير باستراتيجية إدارة الجامعة لهالناحية , و المرجح أكتر هو خوفهم من تفوق موقع طلابي صاعد بنشر النتائج ببرمجية أقوى و طرق أقوى و ميزات أكتر بكتير .
و بالنسبة لاتحاد الطلبة فبقولو انو هنن رح يكونو كتير مسؤولين و هاد الشي خطر عليهم , و بقولو انو في موقع لاتحاد الطلبة فرع جامغعة البعث ( عم ) ينعمل و رح يخلص خلال ( شهرين ) . هاد السبب قالولي ياه اول ما عملت آرتين , يعني بعام 2007 , و رجعو قالو نفسو بآخر مرة حاولت طالب بالنتائج كالعادة عام 2010 . اما انا فبقول انو سببهم هو كمان تفوق موقع طلابي عليهم و على موقعهم المفترض انو يكون خارب الدنيا , و خاصة انو ادارة هالموقع , يعني آرتين , مانها بجيبهم !! رغم اني قدمت كتير تنازلات الهم , بس ازا ما كان واحد منهم ما رح يوافقو .
مع العلم انو بأحد الأعوام اجت عضو المكتب التنفيذي لاتحاد الطلبة من الشام بزيارة ع جامعة البعث و اجتمعت شخصيا معها بوجود المعنيين مع مكتب اتحاد الطلبة , و قالت انو لاااازم بكون في هيك موقع طلابي و تعطو النتائج و تدعمو كل الدعم , و انو بالعكس هاد رح يخلق مجال للتنافس و القوة .
و لحتى ما حدا يتساءل اني ممكن كون أخفيت شي , باختصر كل الشكوك انو لوقتها ما كان الموقع عم يجيب أي ايرادات مادية , ولا حتى بعد سنتين من انشاؤه , و عاملو بس مشان النتائج و عملنالو برمجية مافي منها بالوطن العربي لدرجة انطلب شراءها من عدة جامعات خارج سوريا و ما بعتها ! و كل هاد , بعد ما راحت عضوة المكتب التنفيذي بالشام , انتسى و رجعو , ادارة مكتب اتحاد الطلبة بحمص , لنفس الحجج السابقة و الأسباب , و بكرر , رغم كل التنازلات اللي قدمتها , اللي وصلت لأني قلتلهم بالحرف ( خدو الموقع الكم , بس عطونا موافقة انو ننزل النتائج عليه , مع ضمان انو تنكتب جملة " النتائج على آرتين غير رسمية و اي تضارب , تعتمد نتيجة الجامعة " بكل صفحة نتائج بآرتين ) لكن لكن كما يقول الشاعر : " لقد أسمعت إذ ناديت حياً ... ولكن لا حياة لمن تنادي !!

يعني عنجد مليت و انا ارجع عيد هالتاريخ هاد المزري لهالجهات اللي عم نتعامل معها .. و عيب لهلأ هنن على وضعهم لدرجة انو ننتظر كل واحد منهم لحتى يتغير و نحاول نقنع اللي بعدو !! و نفس النتيجة , مافي غير منقنع شخص و بيتعاون معنا , بقوم بوقف غيرو بوجهنا و هكذا ..

اللي مخليني تابع بآرتين هو الرفقة اللي تعرفت عليهم من خلالو بالدرجة الأولى , تعرفت ع أروع شباب حماصنة , و شوام , و حلبية , و حموية , و مشكل ... و بنفس الوقت آرتين جمع بين كتيرين متل ما جمع بيني و بين غيري كمان .. هيك أمور لحالها بتعطي الحافذ للواحد انو يتابع رغم اي عقبات و اي تحديات .. و كلو فدا أحلى صحاب ..

تحياتي

klaydes · **Publié:** Mar Juil 05, 2011 2:54 pm

لك عصام شو قصتك ! شبك ولووو
لك لسا ما بلشنا حوار وليكك رح تضربيني :lol:

طول بالك ليش انوعجت من كلامي ما أنا ماني قاصد فيه شي بنوب وين الغلط فيه :shock:

والله تقول عم تحكي مع عدو
شو مشان!!!
والله كان قلبك حنون من زمان شو اللي مقساه هيك :wink:

klaydes · **Publié:** Mar Juil 05, 2011 3:02 pm

أخي [quote="فارس"]

والله كلامك درر وانا حاسس بالشي اللي عملتو والتعب كلو لأنو صايرة معي قصص شبيهة بقصتك
هو اذا بدك رأيي لازم تعمل عيد ميلاد لأرتين سنوي ويكون بشي حديقة عامة كل سنة بنفس اليوم بيلتقو الأعضاء وبيتسلو شوي والشغلة ما بتكلف سدئني
كيسين بوشار وكم كيس شيبس من هدول الكبير كتير وسعرو ب 5 :wink:

وهيك بتنعش الموقع وبتعمل منو فعالية بارزة من فعاليات حمص والناس الجدد بتسمع فيه والقديمين بضلو على تواصل
القصة بدها شوية تفاصيل وشوية حكي اذا موافق عالمبدأ لنحكي بالتفاصيل بتوسع أكبر
وأهم شي بدك أعضاء من الموقع تناصرك وتوقف معك
لك المشكلة وين يا حزرك؟ المشكلة انو نحنا ماعنا ثقافة قضية ولا حتى على أدنى مستوى
الحكي بهالشغلة بطول كتير بس يعني فيني اختصرها بهالجملة
يا سيدي منيح اللي سمعنا منك بعد انقطاعك ولعيونك بنرجعلك الردود الحماسية
بس قلو لعصامو يطول بالو شوي

عصام · **Inscrit le:** 20 Octobre 2007

klaydes,

اسلوب انو كفو ومابتقصر واي و و و ماكان بمحلو
وانو كون عم بحكي مع عدو فكان اكيد كلامي غير وعالاغلب بقلك شرف نحكي وش لوش

فارس,
تفرج ابو الفوارس قريبا انشالله

klaydes · **Publié:** Mar Juil 05, 2011 6:43 pm

إي طول بالك عصام ليطئلط شي عرق *ورود

الشغلة مو مستاهلة :lol:

خلي روحك رياضية يا رجل شباب على بعضنا ولطشناك لطشة شبابية ولوو
مو معقولة تكون بهالحساسية

أهلين عصامو واحلا عصامو

عصام · **Inscrit le:** 20 Octobre 2007

klaydes,
لطشت مرة ومرقت بقا مافي داعي للتانية وانشالله مايكون في تالتة

A7mad · **Inscrit le:** 05 Mars 2007

زمردة,
فعلا بدنا نخلي آرتين يرجع يغلي متل ايام زمان :mrgreen:

و انا بصفتي عضو قديم رح ارجع عالمنتدى بقوة ان شاء الله Ranaa, أندلسية,
مظبوط حكيكن و الله ان شاء الله بتغير الامور للأحسن
klaydes,
مشكور اخي و افكارك خصبة كتير انت

A7mad · **Inscrit le:** 05 Mars 2007

عصام,
المناطق سعادة أخي

A7mad · **Inscrit le:** 05 Mars 2007

فارس,
شكرا كتير
klaydes,
خف عليه للزلمي هلكتو ولو :mrgreen:

A7mad · **Inscrit le:** 05 Mars 2007

حبايبي شو رأيكن حاج علئات و مشاكل
بليز حكو تناقشو بالموضوع و ما تطلعوا براتو لأنو بلشت القصة تصير جد بين الشباب
اخي اعتبروني ما نزلت الموضوع
يا جماعة انا نزلت الموضوع من غيرتي على ارتين كونوا انا بيعنيلي كتير و وقت بلش ارتين كانت مرحلة كتير حلوي بحياتي بغض النظر عن اعضاء جدد و ما بعرف شو
سلامي للجميع
أخوكم أحمد

Latest Posts

Règles du forum

اييييييييييييه على آرتين أيام زمان