رمضانكن كريم
شوية أمتال حلبية اشتهيتلكن ياهن والأمتال مو بحاجة لشرح لأنو المعنى واضح
وعلى سيرة الأمتال شو رأيكن تشاركونا وكل واحد يضيف متل بيعرفو
والبداية من عندي.......
_قال محبوبتي بالسما شلون الوصول ليها؟
قالولو خشخشلا بالدهب بتركد ع اجريها
_البنت تقول لأما ماباخد الا خمسين
عشرة لحواش العنب وعشرة منشان حواش التين
وعشرة يدقوا بالقهوة وعشرة يصبوا بالفناجين
وعشرة يدقوا بالكحل لسواد عينيا
-ويلي أبلوج السكر , وقع من ايدي تكسّر
_لو ما خوفي من أمك تسأل عليك
لأحطك بعيوني يا عيوني وأغمض عليك
_على عميم وعلى عمام
بيضا وحمرا يا سلام
_خطبولي وجوزوني وحدة مصراتة كتيرة
لكن كانت ختيارة قرعة وسنانا عيرة
كانو مصرياتا كتار لكن شكلا يا ستار
وبوشا اكبر منخار وعيونا يا لطيف صغار
أول ليلة يا حباب اشتغل الضرب بالقبقاب
واللي ما كان بالحساب أكلنا قتلة بكفكيرة
_الأعزب ويا دلو
ما في حدا يغسلّو
_تاجر بدينار واسمك بالبلد تاجر
وبألف دينار نفسك أوعى لا تأجر
_ماتوا العقارب وصار النمل دبابات
كمان أبو بريص صرلو سرج وركابات
_أقرع قرنقع وباب الحبس ميدانو
والزبل أكلو ومية القليط حمامو (ذم وقدح حلبي)
_أضرب شنينة وكب الرز عن بالك
وبيتنا بيتك لكن الخان أدفالك
_زرعت راس توم وفي بستان جكيتو(غرستو)
ومن مية الورد وعطر الفل سقيتو
غبت عنو سنة ورجعت شميتو
التوم بقي التوم وضاع كل اللي حطيتو
