آرتين لتعليم اللغات
https://forum.art-en.com/

ارجو المساعدة من طلاب السنة الرابعة
https://forum.art-en.com/viewtopic.php?t=24781		 صفحة 1 من 1
الكاتب:  rose87 [ الأحد يوليو 03, 2011 1:19 am ]
عنوان المشاركة:  ارجو المساعدة من طلاب السنة الرابعة
مرحبا بشكر هل منتدى لان كتير عم يساعدنا وبشكر كل الطلاب يلي رح يساعدوني
بس عندي سؤوال مشان العالمي انا عندي محاضرات من عند مكتبة زيوس ف برواية جاغامش ما محددين كتير مقاطع وفيا شرح عن كل القصة فهل لازم اقراها كلا ولا بس المقاطع المحددة لان انا ما عم احضر ولا بعرف شو طالبين الدكاترة فيا ريت تخبروني بكل شي بخص هل المادة وطرقة دراستا

مادة طرائق التدريس كيف طريقة الدراسة وكيف كانت الاسئلة حفظ بصم ولا من الفهم ويا ريت توصلولنا الاسئلة تبع هل دورة

مادة المسرح كامن ما حسيت بالمحاضرات في كتير مقاطع محددة فكيف ادرسا والاسئلة القصيرة من وين اجت وبالنسبة ل ايسي شو هنن اهم المواضيع وسؤال ازا في مواضيع بالمكتبات
يا ريت تفيدوني بخصوص هل مواد وشكرا كتير للكل
الكاتب:  rose87 [ الأحد يوليو 03, 2011 7:27 pm ]
عنوان المشاركة:  ارجو المساعدة من طلاب السنة الرابعة
وينكن يا طلاب الرابعة
الكاتب:  Bashar-Sh-Ali [ الأحد يوليو 03, 2011 10:35 pm ]
عنوان المشاركة:  ارجو المساعدة من طلاب السنة الرابعة
لك هون هون هون اجينا P:
هلق نصيحتي الك ما دام عندك وقت منيح فالافضل تدرسي الرواية او المسرحية بالانكليزي وخاصة لما بتكون لغتها سهلة وحجمها مو كبير ...هيك ما بتاخد معك وقت وبتضمني انو شو ما اجاكي مقاطع رح تعرفي مين كان عم يلت ويعجن مع مين والخ الخ ..

بالتحديد مشان ملحمة غلغامش فانا قريتها مرة بالعربي ( اخدت معي 3 ساعات بس لانها قصيرة وبعدين قريتها مرة بالانكليزي واخدت معي تقريبا يوم كامل بس مو صعبة منوووب اللغة تبعها ولا الاسلوب ...كلشي واضح فيها
هلئ مشان المقاطع بهاي الملحمة تحديدا ركزي علي موجود بالمحاضرات وشو مكتوب شرح عنن وكمان انتي وعم تقري القصة ركزي ع المقاطع المهمة
المقاطع المهمة بتكون حوار بين البطلين او بين البطل وشي اله او وصف عن حلم او شي مهم صار بالقصة.... اما لما بتشوفي شي مقطع علاك فاضي متل : "" ومشيا 30 ساعة مضاعفة ثم 50 ساعة مضاعفة ثم 1254569854 ساعة مضاعفة وهاد التور كان الو قرون وهاد كان عم يغشل دياتو والخ الخ فهاي المقاطع لا تهتمي فيها ...
اما ( leaf storm ) فهاي ما حسنت اقراها بالانكليزي لانو كتير غلييييييظة فدرستها بالعربي وبس مقاطع الانلكليزي لي حددن الدكتور بالمحاضرات موجودين
عندك كمان التراجيديات ال3ثلاثة هدول بينقرو بالانكليزي لانو كتير بسيطين ولغتن سهلة وما بدن كتير تحليل للاحداث رغم انو بالمحاضرات رح تلاقي كتير فزلكة
بستان الكرز بايخة كتييييييير ومن ابيخ شي قريتو بحياتو حاولي تركزي ع الموضوع الاقتصادي والسياسي فيها ( راسمالي واتحاد سوفييتي والتحولات لي صارت وهيك مواضيع ) والمقاطع لي بتحكي عن هيك شغلات بلاقيها اهم شي

طرائق التدريس ما الك غير تمسكي ورقة وقلم وتبلشي دراسة من الكتاب سطر سطر وبالاخر بعد ما تترجمي بترجعي تدرسي المقطع مرة تانية وبتاخدي الافكار الاساسية بتسجلين ع الورقة بشكل منظم ولما بيجي السوال بالفحص بتكتبين والشرح بيكون بلغتك حسب ما بتحبي بس مهم تكوني كاتبي الافكار الاساسية
وركزي كتير لما بتشوفي اسم شي عالم او شي نظرية الو لانو بيجيب موضوع تحكي عن نظرية معينة لعالم معين
وشو بتلاقي شي ممكن يكون تعريف او قاعدة لمنهج تدريس او شي معين فورا سجلين ع جنب مشان الصح والخطأ

المسرح الحديث كتيييير سهلة لا تاكلي همها لانو روايات حديثة ولغتها مفهومة 100 100 يعني انا درستها بالانكليزي وما اخدت معي كل مسرحية يوم واحد بس وهيك ما عاد الواحد يخاف من المقاطع بعد ما يقرا القصة بالانكليزي
بس بدك تنتبهي بالمسرح لانو كتير بدك تحللي الشخصيات وتغوصي لافكارن وخاصة ( look back in anger) لانو هاي اسخف مسرحية بقراها بحياتي بس لحتى تنجحي بدك تحللي وتجيبي شغلات حتى الكاتب الاصلي ما بتكون خاطرتلو لما كتبها ههههه

هلئ صح تفزلكت كتير بس ااذا ما عندك وقت تعملي هيك فعندك حل تاني انو تدرسي المقطع لي ورد بالمحاضرة بس لما بتروحي تقريه من القصة حاولي تقري المقطع لي قبلو والمقطع لي بعدو وهيك بتكوني قريتي نسبة منيحة من القصة ولو مو كلها بس بتكوني وصلتي لمرحلة فهمتي كل شخصية شو افكارها وشو دورها وشو بتحكي وبالفحص اكيد اكيد رح تعرفي تجاوبي
ومشان المواضيع في مواضيع نازلة بمركز التصوير تبع الكلية وانا اخدتن بس بالاخر كتبت افكاري لانو هاي الدكتورة بتفضل الواحد يكتب بلغتو وباسلوبو وحسب هوي ما شاف الشخصيات ...خلي هالفكرة ببالك
الاسئلة القصيرة اجت من المسرحيات بشكل عام ...احيانا تكون مقطع كلام وبدنا نحدد مين كان عم يلعي واحيان تكون سوال عن حدث معين او شي فكرة بذهن شي شخصية وهيك الواحد لازم يكون قرا المسرحيات اقل شي بالعربي وفهمن مظبوط مشان يجاوب

سوري ع الاطالة وموفقة يا رب
الكاتب:  rose87 [ الاثنين يوليو 04, 2011 3:33 am ]
عنوان المشاركة:  ارجو المساعدة من طلاب السنة الرابعة
أخ bashar شكرا كتير ألك على المساعدة وتوضيح كل شي *1
الكاتب:  Mustafa.first84 [ الأربعاء يوليو 06, 2011 2:34 pm ]
عنوان المشاركة:  ارجو المساعدة من طلاب السنة الرابعة
yeah , what are you looking for ? You can ask me for any help you would like
صفحة 1 من 1 جميع الأوقات تستخدم التوقيت العالمي+03:00
Powered by phpBB® Forum Software © phpBB Group
http://www.phpbb.com/