سيرين,
موضوع حلو متل العادة
و هالموضوع بيتناول "العادات و التقاليد" اللي إلي موقف خاص منها...

طيب هالشغلة أنا فيي قول إنها مهمة و فعلاً كل بنت لازم يكون عندها خبرة بإدارة البيت لأنو بالنهاية البنت بطبيعتها بتحب البيت و بتحب تترك لمستها فيه..
بس كل وقت و إلو أذان متل ما بيقولوا
و هون أنا فيي أطرحلك أمثلة شفتها بحياتي لنموذجين شفتن شخصي ..و بنفس الوقت بناقش أسئلتك
أكيد لأ, سن مبكرة يعني طفولة يعني لعب و براءة ... يعني و كمان لا يخلو الأمر أبداً من تعليم البنت الأشياء البسيطة اللي لا تتجاوز مثلاً ترتيب غرفتها تطبيق شوي غراض بسيطة بالبيت و تجلي الصحن اللي أكلت فيو يعني لا يتجاوز الأمر أكتر من هيك و ممكن تزيد هالشغلات تدريجياً بازدياد عمر البنت,
بس في حالات الأم بتقول لبنتها : شوفي أخواتك الصغار !! و هيي كلها ع بعضها عمرها 8 أو 9 أو 10سنين مثلاً ...بصراحة هون الأم بتكون زودتها و البنت بهيك عمر لساتها ولد .. و حرام تتحمل مسؤولية أكبر من عمرها
متل ما قلت كل سن و إلو حلاتو و أحلى مرحلة بعمر الإنسان طفولتو فمو معقول تجي الأم و تخلي ذكريات بنتها بالمطبخ و المسح و الجلي أنا ضد هالشي بعنف . شو ما كان السبب
طبعاً إلو آثار سلبية و من أهمن أنو الطفلة ما بتعود بتحس حالها طفلة بتحس حالها أنو مستقبلها للبيت و بس و ما عاد تفكر بأنو برا البيت قصدي بالحياة العملية رح تحقق ذاتها و تقوى شخصيتها ...
و هون في مثال حي بعرفو بأنو بنت فعلاً كانت أمها معتمدة عليها بالبيت حوالي 90% و أمها يا دوب تلحق زيارات المهم هالبنت لما طالعوها من المدرسة ما عارضت البنت أبداً و هاد من الثمار السلبية لأنو هي أساساً اتبرمجت لتكون بالبيت و بين شغل البيت, كل ما جيت لهلبنت حاكيها لقيت أنها اندمجت كتير بمجتمع أكبر منها و صارت أفكارها بعيدة عن الطفولة كتير و هاد بيتحمل مسؤوليتو الأهل طبعاً .
و بمثال تاني أنو كمان بنت تانية أمها دللتها كتير و كانت ما تخليها تصب كاسة المي فبينت آثار هالشي بعد ما تزوجت و طبعاً المسؤولية هون بتكون كبيرة..
لهيك كل سن و إلو حكمو و كل سن و إلو طاقتو و ما لازم نضحي بشي ع حساب شي تاني ..

مشكورة سيرين و بتمنالك التألق دائماً

سيرين,
طبعا لأ حلو سن البراءة للطفلة و لحقانة على الشغل و غيرو و غيراتو
ايام عمرا المبكرة اذا راحت ما بترجع و لهيك حرام نحرم البنت من هالسن
لا طبعا ضد او يتحمل المسؤولية من بكير و خلي يعيش حياته و لحقان او لحقانة على تحمل المسؤولية و بعدين بس يكبر بصير بيعرف الصح من الغلط
اي طبعا في اثار سلبية عالدراسة لان ما بعود في هدف بالحياه غير الشغل و البيت
و تكوين عيلة و غيرو

مشكورة سيرين انتقاء حلو

تعليم شغل البيت هو (تربية) قبل ما يكون جد ونظام وأحكام وعقوبات..
يعني مثلاً أنا بذكر كيف لما كنت بالابتدائي كنت فوت ع المطبخ.. ما كان حدا يقلي عملي شي ...
كنت شوف ع التلفزيون برامج طبخ .. وما كنت احفظ ولا وصفة ..
اجي قلها لماما عنا طحين ؟
وبلش ...... إن شالله اخرب الدنيا .. وسخ كل الصحون .. شغل الفرن ...
مرة تزبط الخبوصة.. مرة ما تزبط ... إزا زبطت بياكلو وبترتفع معنوياتي كتير..
وازا ما عجبتن يقولولي مثلاً أكلة هالحلو ناقصها سكر .. أو حرقتيها

وكنت انظر للبنات الي مو مسمحلهن يفوتو ع المطبخ انو يا حرام ما مسموح الهن يعبرو عن التخبيص اللي جواتهن


بالنسبة لبقية شغل البيت .. .. برجع بقول انو تربية .. يعني ماما ما تجبرني ع شي أكتر ما تنصحني فيه ..
يعني مثلاً بدل ما تقولي نضفي بكلور ومسحي منيح ....الخ.. كانت تحكيلي مثلاً الكلور شو فوائدو واستعمالو ... وبنفس الوقت ممكن يكون في أوامر ع الخفيف ..
أو مثلاً تحكي ع إيجابيات وسلبيات الغسالة العادية والغسالة الأوتوماتيك .. وعنا من التنين ... وأنا إلي الخيار شو استخدم ..
بالنهاية **بهالأسلوب التربوي** .. ما في شي ما بعرف اشتغلو ... وبنفس الوقت ما انضغطت

وأكيد كل بنت عندها فطرة حب الديكوريشن ... بس يفسحولها مجال ..
بعدين في ألعاب .. انو بيت إلو سقف وحيطان بس مفتوح من جهة وحدة ... وفي إلو كنبايات وسرير وطاولات ... الخ ..... البنت بتلعب فيه وبتتعلم وين مكان القطعة المناسب ..
أنا السنة الماضية يمكن لحتى بطلت العب هاللعبة



قبل ما خلص حكي ... بدي اشجب وأندد وأستنكر الأمهات يلي زياراتن كتيرة
يعني حضرة الأم تزوجت وعملت أسرة وبدا تلحق زياراتها وما بدا تحمل مسؤولية
حرام عليهن

سيرين,


مميزة
موضوع حلو تشكري على طرحو

أوركيدا, كمان لا افراط و لا تفريط يعني يتركو البنت عراحتا حابة تدخل عالمطبخ تدخل و مو حابة ما يجبروها

سيرين,
موضوعك حلو ...يسلموا إيديك أعمال البيت وليس أعباء بقول
لكن بشكل معقول
وهالشي لازم يبدأ من عمر ال5 سنين ويكبر معو

مثلا شو المانع إنو الطفلة تتعلم ترتب تختا وتلم ألعابا وتعلق تيابا ورا الباب
أو تمسح غبرة غرفتا

هي الأمور أكيد بتنعد من أعمال البيت ومابتكلف الطفلة جهد كبير
بالعكس بتسلي الطفلة
وبهالعمر لما بساعد الطفل إمو بكون بالنسبة إلو لعب وتسلية
والطفلة لما بتتعلم تساعد ببعض أعمال البيت عالخفيف
بتصير بتحس بقيمة النظام

طبعا الأم مالازم تطلب بصيغة الأمر وإنما بصيغة (لو سمحت حبيبتي ممكن ...) حتى ماتحس الطفلة إنها مجبرة...
ولازم لما بدا تبدأ الأم بهيك خطوة تقول لطفلتا تعي نلم الألعاب سوا أو نرتب تختك سوا أو ...
حتى تشعر بالمتعة ...الطفلة بسن مبكرة لما بتساعد أمها بيشعر إنو هي عملت شي عظيم وإنو الماما كتير مبسوطة وفرحانة فيها والإم ساعة توجهلا عبارات شكر هالشي كتير بعزز قيمة الشي اللي عملتو

الخلاصة: لما منربي الطفلة من الصغر على الترتيب والتنضيف عالخفيف لحالا بس تصير صبية بتصير مابتقبل تشوف شي بدو تنضيف وتتركو على حالو
أو تشوف إمها عم تشتغل وتطنش وهاد حال معظم صبايا هالإيام للأسف

وأنا ضد إنو تتعلم الفتاة الطبخ طول مانها بنت ببيت أهلا إذا ماكانت مضطرة متل سفر ودراسة وهيك شي حرام لحقانة
بس ممكن وهية عند أهلا تشتهي تعمل شي حلو مكرونة بشاميل شوربات أكل غربي تحب تثبت وجودا وشطارتا فلا مانع لازم الطفل يتحمل المسئولية بسن مبكرة ليش لأ بشكل يتناسب مع عمرو
مثلا الأم تقول لإبنها اللي عمرو 5 سنين إنت ابني الكبير ولازم تدير بالك على إختك من الناس الغريبة أو دير بالك ماتوقع اختك وهنن برا البيت وتضل عينا عليهن
هو بحس بالمسئولية
وشو المانع نجمع بين المسئولية ومراحل الطفولة كلشي لحال الطفل فيه يجمع بين التنتين بشوية توجيه
وبرجع مشان السؤال الاخير

بعتذر عالأخطاء...كنت بدي لحق صلاة العصر

السلام عليكم

برافو العربية
جد الكلام اللي قلتيه كتير حلو بالحقيقة كتير ضروري الطفلة من سن الخمسة وبعد شوي مو مشكلة ترتب تختا وألعابها وهيك وهاد لازم مو بس ضروري وأصلاً بتصير عادة عندها ولما وتشوف أمها سعيدة فيها بتكون هيي بقمة سعادتها
أنا صراحة علمت بنتي تقوم بهالأشياء بس للأسف هيي مصرة تنضف الحمام أو تجلي قال منشان أفرح فيها
وأنا دايماً بفهمها أنو مواد التنضيف للكبار بس مصرة ودايماً بتزعل
والطبخ لحقانة عليه ببيتها وصار مافي أسهل من تعلمو ومو ضروري من الأم
من شو بشكي النت
ولازم الطفل يكون على اطلاع على أمور البت كل شي حسب فهمو للأمور وسنو وما لازم طبعاً يحمل مسؤولية أكبر منو

لما البنت بدها تحمل أعباء البيت بكير رح تنشغل أكيد عن دراستها ورح تتغير شخصيتها ورح يضيع منها سن الطفولة وحتى المراهقة اللي من الضروري تعيشهم بوقتهم وباختصار كلشي الو وقتو .


شكراً سيرين للموضوع الحلو واللي هو جزء من حياة كل أسرة بطريقة ما

عدنا
Ranaa, كلام سليم رنا ... و أكيد أنا من الناس المشجعين لهيك خطوة مو بس مع البنات و إنما مع الصبيان كمان كمان من الأمور ألي عم نلاحظها بشكل لا بأس فيه ... أنو نعلم أولادنا ينتبهو على أخواتن و يديرو بالن علين ... بس لازم كمان نعرف أنو متل هيك مسؤولية ممكن تكون السبب بأنو الولد أو البنت الأكبر يكرهو الأصغر منن و يعتبرو مصدر ازعاج لألن لأنو بسببو ما عم يقدرو يتصرفو متل غيرن من الأولاد . هلأ دلال عن دلال بيفرق
ممكن دلل بس بنفس الوقت يكون دلالي فيو نوع من الوعي و يكون ضمن حدود , كمان بدنا ما ننسى أنو لكل طفل طباع تختلف عن طباع غيرو من الأطفال ... يعني دلال الأطفال وقت بكون مصحوب بشي اسمو " الاحترام " بتصور كل شي ممكن يهون ...
و في متل سمعتو زمان و شفت ناس بينطبق عليهن تماما و هاد المتل بقول : " إذا جار عليك الزمان عليك بأولاد الدلال " .
Ranaa,

دائماً بكون سعيدة بمشاركاتك و آرائك ألي بتمنى أنها تبقى موجودة بآرتين

لمى,

تسلميلي يا لمى و يا مية هلا فيكي من الأمور المعروفة أنو إما البنت رح تتأثر أو رح تأثر و بالحالتين بكون ضافت لقائمة الوجبات ألي بتعرفها قائمة جديدة
لمى,
سعيدة كتير بوجودك معنا يا لمى بتمنالك الأحلى و الأفضل بحياتك و نورتينا

فطوم,
شوفي رد العربية, بتصور كلنا مطالبين أنو نحط ولادنا على الطريق الصح و نوجهن للأفضل و خلينا نمشي معن خطوة خطوة و نحاول من خلال المواقف ألي ممكن تصير معن أنو نمرر الشي ألي بدنا ياه ...
فطوم,

انبسطت بمشاركاتك الحلوة فطوم و بتمنالك من كل قلبي التوفيق و أهلا و سهلا فيكي

أوركيدا,

طولتي الغيبة كتير يا أوركيدا و رجعتك بسطتنا أكيد
لفت انتباهي بمشاركتك : طريقة حلوة للتعريف بالأشياء و هيك منكون أشبعنا فضول الأطفال و جربنا نوعين و نعرفن بفوائد و سلبيات محتويات البيت

نورتي يا أوركيدا و يا مية هلا فيكي و وجودك بفرحنا أكيد