قرار جديد يحرم أصحاب المعدلات الجامعية المقبولة (أقل من 60) من شغل الوظائف في الدولة

عصام · **مرسل:** الأحد يناير 16, 2011 2:32 am

أزمة جديدة تقف بوجه الدخول إلى سوق العمل بعد بلاغ رئيس مجلس الوزراء مؤخراً، والذي اشترط للحصول على وظيفة في القطاع العام أن يكون معدل التخرج أو مجموع الدرجات لا يقل عن 60 % من المعدل أو المجموع العام، حرصاً على ضمان كفاءة شاغلي الوظائف في الجهات العامة.

وحسب صحيفة الخبر الاقتصادية , حدد البلاغ عدداً كبيراً من الشروط لشغل الوظيفة العامة، وقد اعتبره الخبير الاقتصادي "قدري جميل" تعبيراً عن انسحاب الدولة من لعب دورها الاجتماعي بعد أن انخفض دورها الاقتصادي، وهذا نتيجة منطقية للسياسات الاقتصادية الحالية

واعتبرت مدرسة في كلية الحقوق جامعة دمشق أنه غير موجود في قوانين العمل الحالية (القانون رقم 17 لعام 2010 الخاص بالعاملين في القطاع الخاص والمشترك وقانون العاملين الأساسي الخاص بموظفي القطاع العام) ، متسائلة "لماذا يوضع حد لمعدلات النجاح أو التخرج ، فلو كان معدل التخرج في الشهادات العلمية فوق الـ 60 % فهذا جائز لأن معدلات النجاح في هذه الأفرع هي فوق الـ 60 %، لكن في الكليات النظرية معدلات التخرج لا تتجاوز الـ 50 % ومعدلات النجاح كذلك، مشيرة إلى أن شرط المعدل العالي كان لمدرسي الجامعة فقط منعاً للفساد ".

وأشار مدرس في كلية الحقوق حسب الصحيفة إلى أن هذا البلاغ حدد المعدل لطالب العمل الذي يريد التقدم للوظيفة وهذا غير قانوني ويعد مخالفة للقانون، فالتقدم للوظيفة على هذا المعدل مخالف قطعاً للقانون، وهذا لا ينطبق على مبدأ تكافؤ الفرص .

وتابع المدرس "أن الأفضلية لطالب الوظيفة عندما يتقدم عدد كبير من المتقدمين وتختار اللجنة المشكلة من مكان التوظيف الأفضل بناء على المعدل فهذا قانوني في تلك اللحظة، أما التحديد المسبق فهذا مخالف للقانون، وفي طبيعة الحال، سوف يتم اختبار الأفضل لأي مسابقة، ففي بعض الوظائف تتطلب الجهة طالبة التوظيف عدداً كبيراً من الوظائف بناء على الشواغر التي لديها، فمن يملك المعدل المطلوب يتقدم أما من لا يملك المعدل المطلوب فلا يتقدم ".

وتساءل "ماذا تفعل في هذه الحال هذه الجهة إن كان هناك عدد من الشواغر ولا يوجد متقدمون من ذوي المعدل المطلوب، فضمن منطق القانون يجب أن نترك الشروط المسبقة وأختار حاجتي بناء عليها، فالوزارات تطلب حاجتها بناء على المعدلات المرتفعة والامتحانات، والشروط المسبقة تحرم الكثير من طالبي العمل، فالبلاغ تحصيل حاصل بالنسبة للمسابقات والطلبات، وعلى أساس شرط المعدل".

واعتبرت مديرة القوى العاملة في وزارة الشؤون الاجتماعية والعمل رشا حرفوش " أنه ليس من العدالة أن نشغّل كل طالب عمل في القطاع العام، فالقطاع العام اختار أن يكون الكادر نوعياً ومعدل تخرجه فوق 60 %، بغض النظر عن معدلات التخرج في الجامعة، وهذا الأمر يعتبر قانونياً ويحق لرئيس مجلس الوزراء إصدار التعليمات الخاصة بالتشغيل".

عصام · **مرسل:** الأحد يناير 16, 2011 2:38 am

شي اكتر من رائع والله هالقرارات اللي عم تطلع وبالفعل بتجي من بعد دراسة عمييييييييقة كتير للواقع
الكليات النظرية مابتفرق معها شي لانو حد النجاح عندن 60
بينما الاداب وغيرها من النظري حد النجاح 50 واول ما فتت عالجامعة كان معدل النجاح 48 كمان لا تزعلو
بقا شو مشان الطبقة التي لا يستهان بها تنكب برا شي اسمو التعلق بحلم الحصول على وظيفة حكومية
يعني بالاصل وظيفة مافي بس انو كان الواحد يحلم
انو هلق لا حلم ولا بطيخ
خلص تم اعتبار هاللي معدلو مقبول متل الولد اللي جاي بالحرام وما حدا معترف عليه ويروح ينطح راسو بالحيطان
والله بالقلب حكي كتير بس كلو عالفاضي بقا انو انشالله بيصير شي تعديل او شي قرار بيزبط الامور
وانو ببساطة خلص كلشي شايف معدلو 59.99 يروح يجمع كتبو ويعمل هيك

بيتدفا شوي بهالبرد احسن شي

لجينjojo · **مرسل:** الأحد يناير 16, 2011 2:42 am

اقتباس:

وانو ببساطة خلص كلشي شايف معدلو 59.99 يروح يجمع كتبو ويعمل هيك

انا رايحة اعمل هيك من هلا

حلواني · **مرسل:** الأحد يناير 16, 2011 3:04 am

ياسيدي وبلاها هالوضيفة مابدنا ياها
أصلا صارت ماتعطمي خبز

لمى · **مرسل:** الأحد يناير 16, 2011 3:02 pm

شي حلو كتييير

يالله على قولك الوظيفة كانت حلم هلأ بطلو تحلمو
يعني عملو متل صحيح لاتقسم وممقسوم لاتاكل وكول لتشبع

الحمد الله اشبعت

Portia · **مرسل:** الأحد يناير 16, 2011 5:21 pm

السلام عليكم :

يعني شو بدي قلك الوظايف مأتلة بعضا عند الدولة

اساساً اذا بدك تقدم عوظيفة بتمر بمدري كم منخل

و بآخر منخل يبئى كم واحد هي اذا مو نصن انقبلوا واسطة

والله اعلم

بس قرار سخيف

يعني بدل ما يدققوا عالثغرات الزغيرة ليه ما بدققوا بشغلات اهم من هالقصص

ليه عنا التعئيد بيعتبروه شطارة

هالطالب اللي تخرج مو جامعة حكومي و رسمية , ليش ليتخرج و ينكتب عليه متخرج

اذا الدولة مالح تقبلوا

عيب والله

أندلسية · **مرسل:** الأحد يناير 16, 2011 6:26 pm

برأيي القرار عادي و مفهوم...
هي هي الليبرالية الاقتصادية يلي عم نحاول نطبئ منها شوية قشور هون وهون ... اول شي من حق الي عم يشغّل انو ينتقي الافضل ليشغلو و مابيقدر يحدد معيار ليشوف مين "الافضل" مبدئيا غير معدل الدراسة طالما انو هوي لسا لاشغّلو ولاعند صاحب طلب العمل مثلا خبرات تثبت انو هوي "أفضل" لهالعمل بغض النظر عن معدلو ... فما بيبقى معيار غير معدل الدراسة .
تاني شي مو مسؤليةصاحب الشغل المؤمَّن انو مرء ع الطالب كادر فاسد و لا مافاسد و لا من مسؤليتو انو هالطالب كان عندو ظرف ما حقيقي و لا أنو خطي كان عم يصيع ..شب بيطلعلو و لا بنت عمرها ومدري شو ..
تالت شي ..لازم و ضروري تطلب الدولة لشواغرها أصعب الشروط و أكتر الشروط لأنه مافي وظيفة أريح و لا أكثر استقراراً من وظيفةالدولة .. طبعا الي اشتغل بالخاص بيفهم هالشي تماماً ...

وبالتفاصيل متل ما قلت عصام هالقرار يمكن بأثر أكتر الكل ع خريجي الكليات النظرية بما أنو الكليات العملية تلقائيا معدلن ح يكون فوق المقبول لأنه نجاحن ع الستين .

اقتباس:

واول ما فتت عالجامعة كان معدل النجاح 48 كمان لا تزعلو
بقا شو مشان الطبقة التي لا يستهان بها تنكب برا

بناقص من خريجين هالجيل يلي يمكن الواحد منن صار عمرو وسطيا بالتلاتين و لساتو عم يدور ع شغل حكومي ...
فماالخريجين من بعد ال48+2 ما ملائيين شغل ...

بعدين لازم نفهم او نحاول نستوعب انو الدولة مانها متكلفة بكل خريج تشغلو عندا ..ما بكفي انو عم درسو مجاناً؟؟؟

أصحاب الاموال السوريين لازم يتحملو 70% من تأمين فرص العمل لنقدر نشوف شي اسمو تطور اقتصادي حقيقي ..لازم نذكر هالشي و احنا نازلين انتقاد للقرار.

Mohammed · **مرسل:** الأحد يناير 16, 2011 7:24 pm

يا أخي أربع خمس سنين وما كانت

... اعتبرها كاميرا خفية ... ازا زياد سحتوت بيطلعلو يمزح مع العالم مع العباد كل مزحة بيروح من وراها قتلى ... بقا مجلس الوزراء وأضرب وأطرح ما بيطلعلو يمزح مع الخريجين مرة بهالعمر!!!

منيح ما لغو الاعتراف عالجامعات الحكومية وصار بدن خريجين كامبردج وهارفرد يتوظفو عنا .... لأنها مكسب وظيفة التربية ع فكرة

يا فرحتنا نجحنا بالمسابقة وعم نستنا من مدري كم شهر قال شو؟؟؟؟
"ناجح ولم يعين"

و هلأ... خريج ولم يتخرج

جامعي لا يحق له أن يتوظف
ولسه الجاي أحلى

ليش ل يخرجو العالم طيب !!!!
ليش لنعمل اختبار كفائة واختبار تخصصي ازا وزارة التعليم العالي هي الي مختارة المناهج محدا جابن من بيت أبوه ؟
وليش ؟؟ وليش؟؟ وليش ؟؟؟!!!؟!؟ّ!!!
بدها زقفة

وزلغوطة كمان وللللليييش

فراس دلله · **مرسل:** الأحد يناير 16, 2011 7:45 pm

أحسن شي نترك هالجامعة وبوجهنا عالخليج

مرح · **مرسل:** الاثنين يناير 17, 2011 9:28 pm

فذلكة جديدة بيتحفونا فيا
انا ما ني ضد يطلبوا اصحاب الكفاءات العالية و من حقن ياخدوا اصحاب العلامات الاعلى
بس ما حقن ينجحوا طالب و يتخرج و بعدين يقولوا تخرجك ما بيعملك شي
يعني تخرج للتطقيق
اذا ما عاجبن صاحب 50يرفعوا معدل النجاح للمستوى المطلوب وهيك الطالب ما بكون متخرج بس عالفاضي

LATEST_POSTS

قوانين المنتدى

قرار جديد يحرم أصحاب المعدلات الجامعية المقبولة (أقل من 60) من شغل الوظائف في الدولة

الموجودون الآن