آرتين لتعليم اللغات
https://forum.art-en.com/

نزلة النسوان على سوق المسقوف
https://forum.art-en.com/viewtopic.php?t=22998		 صفحة 1 من 1
الكاتب:  Widad [ الاثنين نوفمبر 15, 2010 12:44 am ]
عنوان المشاركة:  نزلة النسوان على سوق المسقوف
وبعد ما طلعوا من المحل
أم نزار : ولك يبعتلك الهنا ..شلون بتنزلي السعر من 190 ل 130 ورقة اي شو الشغلة نهيب ؟
أم حسام : انتي شو بيعرفك فيون هدول .. أنا عاجنتون وخابزتون هدول البياعين ...لا تخافي عليه بيكون ربحان الطاق طاقين كمان ...مشي لنشوف من عند غيرو
وفاتوا الجماعة لعند محل تاني ولقوا صاحب المحل قاعد هوي وجيرانو عم يفطر...و صحن حمص مع خبز توري
ووقت شافون فايتين قال صاحب المحل للصانع تبعو : تعا يا ولد شوف خالتك شو بدها ....ورجع يكمل فطورو
واجا الصانع وقال : تفضلي خالي شو طلبك
أم حسام : بدي قطعة قماش خرج تتفصل بلوزة
الصانع : تفضلي خالي شوفي هدول كلن خرج بلوزات
أم نزار : ليكي هاي نفس اللي شفناها عند الأولاني سأليه بأديش
أم حسام : بشأد الضراع خالي ؟
الصانع : هادا ؟ هادا !!!!!!!!!!!!!!!!!!!!!! ب 150 ليرة بس
أم حسام : يي غالي يا خالي ...راعينا شوي بدي تلت اضرع
ألصانع : تكرمي خالي وبلا عشر ورقات
ام حسام : اي يالله لكن حطلي تلت أضرع وبحبحون شوي
الصانع : تكرمي خالي
أم نزار : يه ليش هيك عندو هادا رخيص ؟
أم حسام : سكتي هلأ ..... ما قلتلك هدول المحلات غلوجية
وقطع الصانع تلت اضرع وعطاها ياهون لأم حسام وحاسبتو وطلعت من المحل هيي وأم نزار
وراح الصانع ليحط المصاري بالجرار تبع الغلة وشافو صاحب المحل وقلو : شو بعت ؟
الصانع : تلت اضرع من هادا القماش
صاحب المحل : أديش حسبتلا الضراع
الصانع : قلتلا 150 ووقت شفتا ما رح تشتري نزلتلا عشر ليرات بس
صاحب المحل : بأديش ؟؟؟؟
الصانع : 140 ليرة يعني
صاحب المحل : الله لا يعطيك العافية فوق تعبك ..لك هادا الضراع ب 200 ليرة ..لك رسمالو علينا ب 150 ....روح لحقون أوام روح
وطلع الصانع وصار يدور على النسوان بالسوق بس أم حسام وأم نزار كانوا صاروا بعيدين كتير
بهالوقت بكونو أم حسام وأم نزار صارو بسوق البالي
أم نزار : والله مانك قليلة ..أخدتي الضراع ب 140 مع انو أول محل طلب 200
أم حسام : اي لكن ..بدك كتير لسا لتتعلمي تفاصلي متلي
أم نزار : يه ليكي وين صرنا بسوق البالي
أم حسام : اي تعي لنفوت نتفرج بركي منلاقي شي مقبل
أم نزار : اي عاد شوفيها البالي ؟ ما فيها شي
أم حسام : بسلامة فهمك يا خيتو ...هون بتلاقي شغلات لقطة ورخيصة
أم نزار : اي واذا حدا شافنا هون ؟
أم حسام : لا تخافي ...ليش نحنا شو عم نعمل ...انتي شوفي هلأ مين بتشوفي هون ...اي نص البلد بتجي بتشترري من هون حتى الأكابر ....ما شفتي سلفتي وقت كانت عندي من يومين وكنتي انتي شو كانت لابسة ؟
أم نزار : اي لابسي داير وبلوزة
أم حسام : شفتي بلوزتها ...............من البالي جايبتا
أم نزار : أماني؟
أم حسام : اي والله متل ماعم قلك
وبهاللحظة بيجي بياع السوس اللي حامل خزان السوس على ضهرو وعم يفقش بالطاسات ولابس شروال وبدريسة وطربوش أحمر
أم نزار : تعي نشربلنا شي كاستين سوس ...والله طقطق حلقي من هالشوب
وشربوا الجماعة سوس وكملو مشوارون بسوق البالي ورجعوا من سوق المسقوف
واذا بشوفو هالعالم راكدة وأهل البسطات شاحطين بسطاتون وعم يركضو
أم نزار : يه شوفي ؟ ليش هالعام راكدة ؟
أم حسام : شوبيعرفني ...تعي لنتفرج
وراحو تفرجوا وعرفوا شو السبب
هاي البلدية لاحقة تبعوت البسطات
أم حسام بتقول : والله مانازع هالسوق غير هالبسطات ...لك ماعاد في محل تمشي فيه غير لحتى تفشخي من هون لهون
أم نزار : اي والله يا خيتو ...بس الله يعين هالعالم كمان بدا تاكل وتعيش
وأثناء ما كانوا أم حسام وأم نزار عم يمشو بسوق المسقوف بيجي ولد بيسألون : بدك كيس خالي ؟
أم نزار : ما بدنا خالي
الولد : بس بليرتين خالي
أم حسام : لك خالي ما بدنا
ألولد : طب خالي احملك الأغراض عالبيت ؟
أم حسام : ليش شو شايلة أنا خالي ؟ بعدين ماني مشلولة لحتى تشيل عني الاغراض ..يالله روح من هون لشوف هلأ أحسن ما عيطلك للبلدية تاخدك
أم نزار : ما قلتيلي أم حسام لشو اشتريتي قطعة القماش ؟
أم حسام بدي روح اليوم على مباركة بنت خالي فقلت لأخدلا قطعة قماش وهيي تفصلا أحسن ما اشتري جاهز من السوق
أم نزار : يه صارت الساعة 12 ونص ...يالله خلينا نرجع
أم حسام : ليش شو وراكي ؟
أم نزار : يا خيتو عندي طبخ ..طالعت كيس اللحمة من البراد بركي بدي أعملون فاصولية ورز يا دوبني لحق ..هلأ بيجو الولاد فاتحين حلقون هني وأبوهون
أم حسام : تعي لكن بطريقنا منمر على سوق الجاج بدي آخدلي شي جاجة بدي أعمل عليها بكرا ملوخية
أم نزار : اي والله فطنتيني ...بدا أخدلون شي كيلو صدورة جاج ..جاي على بالون صدورة جاج بالفرن
أم حسام : اي تعي يالله قوام مشي
ووصلوا الجماعة لعند سوق الجاج
كانت أصوات المطربين والمطربات الفذين عم تلعلع من مكبرات الصوت من محلات بيع الأشرطة عند موقف باصات كرم الزيتون والمخرم
أم حسام : لك أريضة اللي تئرضون ..بعلو صوت المسجلة عالآخر وبحطولي هدول الأغاني تبعوت النور
أم نزار : يييي ليش ما بتعرفي أنو هلأ بالعراس صارو يحطو هيك أغاني ؟
أم حسام : يقبرو بعضون ان شاء الله ...هالعالم شو قليلة عقل
ودخلوا أم حسام وأم نزار على سوق الجاج وكل وحدة جابت طرف المنديل تبعها وحطتو على أنفها مشان الروايح اللي طالعة
واشترو أغارضون من سوق الجاج وطلعو
أم حسام : ولي رح اختنق من الريحة
أم نزار : تضرب فوت هالسوق ما أبشعها ....ليكي وقفي تكسي .....أجريي تكسرو من المشي ...ما بدي امشي لموقف السرافيس
أم حسام : اي متل ما بدك ..بس انتي بتدفعي الأجرة ها
أم نزار : بدفع بدفع بس خلصيني
أم حسام : هههههههه يالله ..........تكسي ............تكسي
ووقت التكسي وطلعو فيها
السواق : لوين يا خالي ؟
ام حسام : عالقصور يا خيو مقابيل قيادة الشرطة على شارع عالي واطي ....وشغل العداد اذا بتريد
السواق : خربان والله يا خالتي
أم نزار : يه ..أديش بدك لكن لهنيك ؟
ألسواق : أد ما بتعطينا مو مشكلة
أم حسام : لكن اتوكل على الله
ومشيو الجماعة ووصلوا عالقصور واجو لينزلو ومدت ايدا أم نزار لتحاسب الشوفير وعطتو 20 ليرة
السواق : شو هادا خالي ؟
ام نزار : 20 ورقة ..ما انت قلت أد ما بتعطينا ؟
السواق : بس هيك ما بتوفي منوب يعني
أم نزار : ليش أديش بدك ؟
السواق : 30 ليرة
أم حسام : يه ...لشو التلاتين ورقة ؟ كلياتو مشوارك من طريق حماه لهون ما ركبنا معك يا دوب خمس دقايق
ألسواق : ولو يا خالتي هادا اسمو طلب ...اعطيني 10 ورقات كمان
أم نزار : يه والله ما بعطيك ...شو هاد ..شو الشغلة نهيب ؟ خود هاي خمس ورقات فوقن ..يالله
السواق : لا حول ولا قوة الا بالله على هالنهار ....هاتي خالتي هاتي ...الله بعوض
ومشيت السيارة
أم نزار : يخرب بيتون ...لك شو صايرلا هالعام ؟....اي أنا بطلع بالتكسي من هون لبيت أهلي بالغوطة وما بدفع غير 25 ليرة
أم حسام : يالله مشي هلأ لا تدققي كتير انتي التاني ....
أم نزار : لكن يا بعدي مانك دافعة شي من جيبتك
أم حسام : يالله خاطرك ...تبقي تعي لعندي بعد العصر لنشرب القهوة سوا
أم نزار : ان شاء الله .....الله معك
وهيك يا جماعة قابلنا بقصتنا هاي شريحة من الناس اللي بتنزل عالسوق وشو المواقف اللي بتتعرضلا الناس بالسوق وكيف بتتعامل معها مستشفين أحداث قصتنا من واقعنا الحمصي الوديع
الكاتب:  Hiba [ الاثنين نوفمبر 15, 2010 1:27 am ]
عنوان المشاركة:  نزلة النسوان على سوق المسقوف
[quote]
ام حسام : عالقصور يا خيو مقابيل قيادة الشرطة على شارع عالي واطي ....وشغل العداد اذا بتريد
[/quote]

[quote]
السواق : 30 ليرة
[/quote]

شو منشانك دادو احبكيها منيح والله ما بيرضى اقل من 40 ورقة لعنا وكرمال عيونك 35

قال قصور قال قيادة الشرطة ههههه :mrgreen: :mrgreen:[/font]
الكاتب:  Widad [ الاثنين نوفمبر 15, 2010 5:52 pm ]
عنوان المشاركة:  نزلة النسوان على سوق المسقوف
Hiba,
هبوش الله وكيلك ما أنا حابكتا هدول جماعة الفيس بوك بس انا يلي ضحكني هو شارع العالي الواطي :mrgreen:
الكاتب:  bestman [ الاثنين نوفمبر 15, 2010 7:24 pm ]
عنوان المشاركة:  نزلة النسوان على سوق المسقوف
اقتباس:
أم نزار : تعي نشربلنا شي كاستين سوس ...والله طقطق حلقي من هالشوب
وشربوا الجماعة سوس وكملو مشوارون بسوق البالي ورجعوا من سوق المسقوف





والله بعد صيام يوم عرفة
بده موبس كاستين سوس
بدها بوزة من عند اليافي :P :P :P
وكاتو من عند رينبو :lol: :lol: :lol: :lol:
صارت وصارت خلونا نمرق لعند كريش ناخذنا شي سندويشة نسند هالجوعة

الله يتقبل منا ومنكم هالصيام انشالله وعيد علينا هاليوم الفضيل بالصحة والعافية
:wink: :wink: :wink: :wink: :wink: :wink: :wink: :wink: :wink:
الكاتب:  دانيا [ الاثنين نوفمبر 15, 2010 11:45 pm ]
عنوان المشاركة:  نزلة النسوان على سوق المسقوف
اقتباس:
أم نزار : يا خيتو عندي طبخ
:lol:
الكاتب:  radwan [ الثلاثاء نوفمبر 16, 2010 2:16 am ]
عنوان المشاركة:  نزلة النسوان على سوق المسقوف
اقتباس:
أم حسام : اي متل ما بدك ..بس انتي بتدفعي الأجرة ها
أم نزار : بدفع بدفع بس خلصيني
ههههههههههههه
حتى بين النسوان في هيك شغلات
Widad,
thank you
الكاتب:  عصام [ الخميس نوفمبر 18, 2010 9:32 pm ]
عنوان المشاركة:  نزلة النسوان على سوق المسقوف
Widad,
اكتر من رائعة :lol:

Hiba,
القصة الحقيقة انو عاساس نزلو بالقصور بس هن نزلو بغير قرنة :wink:
الكاتب:  Hiba [ الجمعة نوفمبر 19, 2010 12:25 am ]
عنوان المشاركة:  نزلة النسوان على سوق المسقوف
[align=center][quote]
Hiba,
القصة الحقيقة انو عاساس نزلو بالقصور بس هن نزلو بغير قرنة
[/quote]

اي موووو لك انت ما حدي بيخلص منك

بس هيك نحني عنا هواية بحمص نتبرئ من نفوسنا ههههههههههه[/font][/align]
الكاتب:  عصام [ الجمعة نوفمبر 19, 2010 11:45 am ]
عنوان المشاركة:  نزلة النسوان على سوق المسقوف
:lol: :lol: :lol: :lol: :lol: :lol:
بستلمك ها :mrgreen:
الكاتب:  عاشقة العربية [ الأربعاء فبراير 02, 2011 6:54 pm ]
عنوان المشاركة:  نزلة النسوان على سوق المسقوف
نكشتا وعجبتني :mrgreen:

Widad, انت بتتميزي بنقل الطابع الحمصي القوووح كما هو :mrgreen:
كتير حلوة ... وفي كتيييييير نسوان هيك :mrgreen:
وما يكون حدا منن هيك ما بطلع معن بنوب :lol:
*1
صفحة 1 من 1 جميع الأوقات تستخدم التوقيت العالمي+03:00
Powered by phpBB® Forum Software © phpBB Group
http://www.phpbb.com/