1- برأيكم , ما هو السبب الرئيسي الذي أدى إلى حضور " صعوبة التفاهم " و بقوة نوعاً ما بين الآباء و الأبناء هذه الأيام ؟؟
2- أين العادات و التقاليد من اهتمامات جيل اليوم ؟؟
3- هل يقبل أبناء هذا الجيل أن يكونوا صورة طبق الأصل عن آبائهم ؟؟ و لماذا ؟؟

1-انا بتصوري انو السبب اأكبر هو اختلاف الاجيال وطريقة التفكير يعني هلا الشب او الصبية تفكيرها انو بدها تروح وتجي واهلينا من زمان كان هدا الشي ممنوع او هو عيب بحكم العادات والتقاليد وهدا شي كافي ليخلق مشكلة بين الاهل والشاب فسبب الاكبر هو اختلاف الاعمار والاجيال
2-العادات والتقاليد لازم تكون من اولويات هذا الجيل بس اكيد مو كلها يعني من زمان ع زمان جدي وستي كان عيب او حرام انو الشب يشوف البنت حتى وهلا ولي اذا جدي شاف هيك شوفي كان تمنى انو يكون بجهنم قبل مايشوف هيك شي (طبعا انا بقصد انو مجرد البنت عم تحكي مع زميلها بدون شي طالع نازل يعني وقت بنظرنا في احترام بالتعامل) فبنظري هدا شي لازم نتخلا عن هيك عادة وهيك تقليد لانو نحنا هلا بمجتمع العلم والاختلاط يعني انت مافيكي تفوتي ع اي مكان بدون ما تشوفي شي ذكر بس هون نحنا لازم نتمسك باخلاقنا ومبادئنا يلي تربينا عليها ع زمان جدي لانو هدا يلي لح يصونا من غلط سواء كان غلط صغير او كبير.
3- ما بتوقع اني اقبل كل شي لانو زمان ابي وامي غير زمان في كتير شغلات انا بتمنى فيها كون متل ابي لانو انا بحس ابي قوي بشكل يعني لما اطلع فيه بوقت انا بكون فيه ميتة انا برجع بعيش وبوقف ع حيلي وبقول انا لازم كون متل ابي قوية وبتمنى اني كون حنونة متل امي بس بدون ما ضر ولادي وخليهون يخافوا من المجتمع يلي برا واعمل جهدي انو ما يغبوا عن عيني لحظة خوفا اني افقدهن انا هذا شي كتير بكرهوا لاني انا بكون عم علم ولادي الجبن بدون ماحس
بالنهاية انا لا ما بدي كون نسخة طبق الاصل عن اهلي انا بدي كون شي جديد واغلط واتعلم من غلطي

الأب يتعبر ابنه فاشلاً ولا يصلح ليكون رب أسرة مستقبلاً أو عاقاً وطائشاً ولا مجال للتفاهم معه
والابن يعتبر أباه موضه قديمة وليس قدوة له فلا يرى الا الصفات السلبية فيفضل النقاش مع من هم من جيله


"رحم الله أباً أعان ولده على طاعته "
ورحم الله ابناً أعان والده على التفاهم معه دون عصبية وطيش

سيرين,

حسيت الموضوع بيشبه بين الماضي والحاضر
لأنو فعلاً بيخلق كتير جدال بين الطرفين ، وكل طرف بحط الحق ع التاني واحترنا يا أقرع ما حدا عم يحط حالو مكان التاني، ولا حدا عم يتنازل أنا برأيي أنو الأهل المفروض يوعّو الاولاد وين الخطأ بعاداتنا وتقاليدنا، وين الصح ووين الخطأ، وهون بيطلع هالجيل عرفان منيح شو ممكن وشو لأ، يعني وعي الجيل من وعي الأهل.
بس أكيد بيحسبو حساب العادات والتقاليد، بس الانطلاق والرغبة بالتجريب اكبر من العادات ، وهاد حقن، وكل مرحلة إلا مميزاتا. ما بتخيل .
لأنو برأينا العام ما حدا كامل، فكيف لما بيستنتجو اخطاء مطبوعة طباعة على اهلن واللي حواليهن؟ أكيد رح يحاولو يغيرو ويتغيرو ..
يعني ببساطة، تصرفات الجيل الماضي هي اللي عم تحكم هاد الجيل بالتغيير.
والسمعات عم تخلي الأهل يخافو زيادة كأنو المشاكل رح يترك كل الشباب ويجي ع اولادن
وحلوّا
هلأ هاد بقولو بالمصطلح الإنجليزي: Generation Gap، الفجوة بين الأجيال، كيف ممكن نسدّا أو نخففا، برأيي الحوار وفهم الطرف التاني ومحاولة استيعاب وجهة نظرو بتخففا.

يعني لو إجينا للصراحة الأهل بكتيييير أوقات معن حق، وعم يعطو تجربتن اللي مانا سهلة بكلمتين ويختصرو ع اولادن تعب سنين، ممكن هون الاولاد تقدّر.
وبنفس الوقت الأهل لازم يتذكرو حالن كيف كانو بحماس الشباب ويعطو لاولادن الفرصة.

سيرين,

موضوعك بيخلي الواحد يحكي لحالو ...مشكورة سيرين
طيب ...
هلق الصراع يبن الأجيال بين شباب اليوم و الجيل السابق موجود فعلاً و بقوة و بعتقد أنو في كذا سبب رئيسي لهالمشكلة ..
السبب الأول باعتقادي هو الإعلام و إنفتاح العالم من خلال الشبكات و النت....ساهم بشكل كبير بدخول عادات و أفكار من الخارج و من الغرب و طبعاً هي الأفكار هي نسبياً أفكار جديدة بالنسبة للجيل السابق يلي بيعتبر أنو كلشي خارج نطاق العادات و التقاليد هو أمر محظور .....
و طبعاً هالأفكار غزت و بشكل كبير شبابنا, لأنو الشباب بيحبو الأفكار الجديدة عادة, البعض من الآباء قدر يتحكم و يستفيد من هالأفكار الجديدة بس بطريقة ممكن تتقبلها العادات و التقاليد و بنفس الوقت ما يحرم ولادو منها, و البعض الآخر لأ ....أخد هالأفكار متل ما هيي و إجا ليطبقها على قالب العادات و التقاليد بس هالقالب رفضو و بشدة, و البعض التالت ما بدو هالأفكار ..لأنو مقتنع أنو العادات و التقاليد هيي الصح و بس و طبعاً هون أولادو رح يرفضو هالشي لأنن عايشين ضمن جيلن.
طيب ...هلق بالنسبة إلي فأنا ضد كتير من العادات و التقاليد اللي منتشرة بمجتمعنا و دائما بعلق طوش مشانها ...لأنو هالعادات أحياناً بحسها عمياء و ما بتشوف إلا باتجاه واحد و بتشبه القيود أحيانا...و أكيد التحرر منها رح يساعد هالجيل ليكتشف حالو بالدرجة الأولى...
يعني ممكن الواحد يتماشى مع الأفكار المعاصرة و يتحرر بس بيخلي الأخلاق و الرادع الديني موجودين عندو لأنن رح يحموه ضد الآثار السلبية للإنفتاح...



طيب بالنسبة إلي لا ما بقبل أنو كون صورة بتشبه الجيل السابق ....لأنو الصورة طبق الأصل هيي استنساخ مو أكتر لشي واحد...
لأنو الواحد بيطور و بيحسن حالو مشان يكون هو ذاتو و ما حدا بيشبهو و من هون بيخلق التميز و الإبداع...و إذا سمع كلام الناس ...(هاد ما بيصير .......و هاد ماحدا عملو مشان انت تعملو ....و مافي داعي و من هالحكي) فإرضاء الناس غاية لا تدرك بالنهاية و التجربة و الإكتشاف هيي أحلى شي بالحياة و جيل الشباب بطبعو بيحب أنو يسابق ليكتشف و يشوف الدنيا....و يكون أول بأول مع كلشي جديد...
بس أنا أكيد مع الحفاظ على البذور الأخلاقية اللي نشأت من الدين الميسر والسهل و ليس من العادات و التقاليد المقيِّدة..
سيرين .... .مميزة يا عمو...

حسامي,
مسا النور يا هلا أخ حسامي
و أكيد فيك تاخد راحتك و تكتب بالشكل ألي بريحك بس و لحتى يكون في مجال أنو الكل يشاركونا بالنقاش رح يكون تعليقي باللغة العربية
فينا نقول متل ما تفضلت حضرتك و قلت أنو فترة المراهقة بتلعب دور كبير و خاصة بهاد الموضوع و كلنا منعرف قديش هي الفترة " المراهقة " حساسة و خطرة و فيها بكون المراهق\ة أحوج ما يكون إلى وجود من يوجههم بالشكل الصحيح لأنن بكونو متل السفينة ألي بحاجة لقبطان يوصلها لبر الأمان و يحميها من الغرق و هون ما بدنا ننسى أبداً, و متل ما قالت رنا, الدور الكبير ألي بتلعبو وسائل الإعلام و الانترنت و غيرها من الوسائل ألي عم تنقل صور مختلفة لمجتمعات و ألي للأسف الشديد في كتيرين عم يتبعوها حتى بدون ما يدركو الغاية من وجودها و هل هي بالفعل بتتناسب معن
بشكر مشاركتك معنا و ردك الكريم أخ حسامي
بروين,
اختلاف طرق التفكير كمان عامل رئيسي بوجود صعوبة التفاهم , بس بدنا ماننسى كمان أنو اختلاف طرق التفكير وارد كتير حتى بين أبناء الجيل الواحد و هاد الشي بيتبع تربية الأشخاص و نظرتن للأمور متل ما سبق و ذكرنا بأماكن أخرى.
كتير حلو ذكرك بأنو تكون العادات و التقاليد من أولويات هاد الجيل طبعاً بالشي المعقول و المتناسب مع الدين و الأخلاق و التربية السليمة إضافة لطبيعة المجتمع الذي نعيش فيه .
حلو الواحد يتعلم من غلطو يا بروين , بس الأحلى أني أتعلم من أغلاط غيري لحتى جنب حالي مواقف أنا بغنى عنها و ممكن أندم عليها بوقت ما بينفع فيه الندم أبداً و الوقت ألي بدي قضيه بالخوض بأمر يؤدي بي إلى الغلط الأفضل أني اغتنمو بشي يسهم بتعلمي لأشياء ممكن تفيدني و هيك بكون اختصرت الوقت و كسبت الفائدة
بتمنالك التوفيق بحياتك بروين و سعيدة بمرورك الجميل
Mohammed,
خير الكلام ما قل و دل
هون بعتقد أنو الابن المفروض يساهم بتغيير نظرة الأب لألو من أنو فاشل و عديم المسؤولية لشخص عندو القدرة أنو يدخل معترك الحياة و يثبت ذاتو . و بفتكر أنو كل الأهل بحبو كتير أنن يشوفو ولادن بموقع المسؤولية لحتى يطمنو علين منيح و أنن قدرو يوصلن لبر الأمان .
و في بعض شباب اليوم للأسف الشديد ما بيتنازلو يفتحو أحاديث مع أهلن لأنو ببساطة ما بتعجن أفكارن و لا حتى أحاديثن مع العلم أنو هالشباب بيفكرو أنن عباقرة زمانن و أنن فهمانين كتير منيح واقعن بس بالحقيقة ما بيفهمو شي أبداً و حاملين شعار " الآباء موضة قديمة و الأبناء موضة حديثة تشمل كل جوانب الحياة ", برجع و بكرر البعض و ليس الكل " .
أسعدني مرورك العرر محمد نورت

هدى,
حطيتي إيدك ع الجرح هدى
فعلاُ هاد ألي عم يصير ... صحي أنا بنت هاد الجيل بس بحترم كتير و بتمسك كتير بنسبة لابأس فيها من الأشياء ألي تربو اهلنا عليها و ربونا نحنا بعدين عليها لأنو دينا بقول هيك بالدرجة الأولى و لأنو المنطق و الواقع المعاش بقولو هيك كمان .. هلأ في كتير أشياء ممكن كتير ما استحسنها و أرفضها بس جد بنفس الوقت بحاول حط أعذار من عندي لأني أنا بطبيعتي هيك بحب حط حالي بمكان الأشخاص التانيين و متل ما نحنا منتمسك بأشياء منحس أنها ترتبط ارتباط وثيق بشخصيتنا كمان ما فينا نلوم الأهل لتمسكن بأشياء بيعتبروها من صميم حياتن ... و متل ما قلتي هدى بيبقى " الحوار " هو الحكم بهيك مواقف اسمع شو عند الطرف التاني و خلي يسمع شو عندي و ممكن يقتنع قولاً و فعلاً و يتقبل هاد الشي بكل صدر رحب , و ممكن يقتصر قبولو على ناحية القول فقط لأنو في شي بداخلو عم يشدو و يرجعوا لشي نشأ و تربى عليه ..
كلام سليم هدى بس بيبقى أنو الأولاد يعرفو يستغلو هي الفرصة بالشي ألي ممكن يطور حياتن و يضمن حياة كريمة للكل
نورتي هدى و أسعدني مرورك كتير
Ranaa,
يا هلا رنا و أنا ألي بدي أشكر مرورك المميز
يعني شو بدي قول ماتركتيلي شي لحتى علّق عليه
أكيد بتفق معك بكلامك و كأنك قاعدي براسي
مارح ضيف أكتر من كلمة شكراً كتير على مشاركتك الكريمة رنا

نصر الله87,
و هاد هو الشي ألي فعلاً لازم يصير
شكراً كتير لمرورك الكريم نورت آرتين و وجهة نظر