هدى ,

أول الشي نورتي ساحة حوار و يا 100 هلا فيكي

تاني شي .. الله يديم البسمة لحتى تبقى مزينة وجوه أصحابها

و تالت شي ... الدخول في صلب الموضوع

بالنسبة لسؤالك : في ناس بتردد دائماً عبارة " خلينا نضحك , شو فيها هالحياة " ..
و في ناس يتضحك بس بترجع بعدين بتقول : يا الله ما كان لازم أضحك " مو لشي و إنما لأنها ربما تكون تعودت أنو يكون لهالضحكة نتيجة أو صدى غير مُحبب

بالنسبة ل : الحياة بحد ذاتها كتلة مفاجآت .... ممكن تكون حلوة و ممكن تكون عكس هيك ..
و الشخص ما فينو يعرف شو الأيام مخبي لأنو العلم عند رب العالمين هل متل هيك كلام دائماً ألو ردين لنمطين مختلفين من الناس ..
فريق رافض لهاد الكلام و بيعتبرو مجرد خرافات ما لها أساس بنوب ..
و فريق بيعتبرو أنو حقيقة فعلاً لأنو صار و أنو هالضحكة كان من بعدها أنو نزلت مصيبة ما بأحد الأفراد المقربين لهالأشخاص .. و بصراحة في أمثلة سمعتها عن هيك حالات
بس باعتقادي أنو ممكن كتير يكون لعامل الصدفة حضور بارز في هيك أمور هذا كان و باختصار رأيي و بكل تواضع على موضوعك الحلو بالضحكة ألي مزينتو رغم ما تخفيه هذه الضحكة من مفاجأت على اختلاف أنواعها

شكراً لهذا الطرح الجميل هدى
و أسعدني حضورك معنا
و تقبلي مروري مع باقة ال

جد هالجملة بشعة
وقت الكل بكونو عم يضحكوا بتنقال لانو بيخافو بعد هالضحك يسمعوا شي خبر مو حلو
انا بقول انو هي عادة من العادات والتقاليد الي بتخصنا
لانا صارت معي مرة اجتني نوبة من الفرح انا واختي وبعد ما ضحكنا وانبسطنا سمعنا خبر وفاة بجوز هاد المقصود
بس برجع بقول هاد كلو عادة

هدى,

قبل كل شي أنا مبسوط انو رقم ردي هو السابع / 7 / .. و متل ما بقول عمر الفرا .. هو رقم "الكمال" عنا .. و ورقم يفيد التكثيرررررررررررررر

بنجي للموضوع .. لفتة حلوة منك انك تطرحي هيك موضوع .. لأنو بنسمع كتير كتير و بشكل شبه يومي لهالعبارة .. بس ما خطرلنا انو نتسائل عنَا ..

أنا بشوف انو هالعبارة ما بتستاهل كتير انو اذا كنا مبسوطين و عم نضحك نقطع الضحكة نتيجة خوف من مجهول .. و يمكن هي حالة نفسية عند الفرد مو أكتر .. لأنو ببساطة اذا وقعلنا اي شئ سئ لا سمح الله بعد ضحكة على سبيل المثال .. فهل يا ترى وقعلنا هاد "الشر" لأنو كنا عم نضحك؟ ولا مالا علاقة و كل شي مكتوب رح يصير ..؟
بعدين انو أحيانا بنقول لحالنا انو كذا مرة صايرة معنا هالشغلة .. انو نكون عم نضحك و بعدا فورا يصير شي ما بنحبو .. نحنا بنتذكر هالحدث هاد ببساطة لأنو بنعرف هي العبارة .. "الله يعطينا خير هالضحك" .. مئات المرات منكون عم نضحك و ما بصير معنا اي شي .. بس ما بنتذكر هدول المرات .. بينما اذا "صدفت" - مع اني ما بآمن بالصدف- شي مرة و صار شي سئ هالحدث بنتذكرو فورا .. ليش ؟ ببساطة لأنو اذا طلعنا على صندوق ملئ بالتفاح و كان فيه تفاحة وحدة بس فاسدة فهي التفاحة بس الي بتلفت نظرنا
بالنهاية .. متل ما قال أحد المشاركين هي الجملة بالنهاية مجرد دعاء . . فإذا حدا قالا .. أنا بقول آمين و بكفي ضحك مافي أي مشكلة ..

بعتقد جاوبت على الأسئلة بشكل ضمني .. طبعا هاد رأي أنا .. و مو بالضرورة انو حدا يوافق عليه .. بالنهاية كل شخص و الو وجهات نظرو الخاصة فيه


سعدت جدا بموضوعك الجميل ..

هدى,
جميلٌ طرحك
فعلاً يزعجني أن أسمع بعد الضحك جملة( الله يعطينا خير هالضحك)
كما قال علاء الناس يرون الأمور بطريقة تشاؤمية..
ويتذكرون الأمور التي تزعجهم ويربطونها بشكل أو بآخر بالضحك
هذا نوع من التطير والتشاؤم المحرم..
لا يجوز التفوه بهذه الكلمة.والله أعلم..
ولكن أعرف حديثاً للرسول صلى الله عليه وسلم .. لا أذكر إسناده .. يقول:
( كثرة الضحك تميت القلب)
لا أؤمن بعبارة ( الله يعطينا خير هالضحك)
ولا أقولها..
ولا أحب سماعها..

سعيدة جدا بما قدمتوه، فقد أوصلتموني إلى رأي جميل

أنس الدالي, اي فعلا .. يعني الصغير والكبير بيحكي فيا مزبوط بتصدق ما انتبهت دائما بفهما بمعنى تشاؤمي او عم يستنى تطورات سيئة للهموم اللي عندو بحس انو ممكن يكون شي سيء جاي ع الطريق وبتخيلو
بس شكلي بعد ردودكن ما رح رد ع الخوف
عجبتني شغلة انك عم تمثل الخوف ، ان شالله ما بتتعرضلو أبدا
أسعدني مرورك .. شكرا لك

سيرين, منورة فيكي عزيزتي آمين يارب وما يحرما لحدا ، لأنو الحرمان منا عن جد صعب هاد النوع بحسو من كتر الضغط اللي عم يعانيه بقول هيك شي يعني كمان مانو مرتاح صح في هيك شي ، خصوصي لو كان باجتماع مع أشخاص ما بيعرفن كتير او العلاقة فيهم رسمية بس بتوقع الفريق الرافض قليل جدا وممكن انو يقول هالكلمة ع سبيل المزح بس غيرو رح تنحط ببالو وهيك عمل شعور سلبي الصدفة وكمان القضاء والقدر هني المسيطرين ع هالموضوع سرّني حوارك جدا .. فقد أضفتِ لفتات جميلة
كل الشكر

ابراهيم محمد, مزعوجة ومحتارة
بس خلص وهي ضحكة بتخيل السبب التاني أقوى، لأنو لو نحن اللي عم نمر بموقف صعب ممكن نتجاهلو كرمال اللي قدامناونداري حالنا ، بس لو حدا غالي عم يصير معو هيك ما منقدر نتجاهل همو بالزبط (عرضي) لأو متل ما ذكرت الكل صار يقولا
بس شغلة (سهينا عن ذكر الله ) كتير حبيتا
بشكر مرورك ابراهيم .. والله يديم السعادة بقلوبنا

Hiba, بيني وبينك حسيت حالي عم اكتب قصة مزبوط اللي عم تقوليه، وخصوصي انو الأيام بتسرقنا من الناس الل بنحبن ومن الأجواء الحلوة اللي تعودنا عليا، بس كمان رح تحطنا بأجواء ومع ناس رح نضحك معن ويعطونا معنى تاني للسعادة بعيد الشر هبوش
انا للي بدي اوصلو انو هالجملة لازم يلتغى اقترانا بالتشاؤم، ونلاقيلا فتوى تاني
سرني تعليقك .. وان شالله بتكون ايامك كلا سعادة وخير

ميرا, وأنا هيك شفتلك .. وحتى بقلوّا لأنو صار وقتا بعد الضحكة ما أكتر بس ترى متل ما قال سيرين الصدفة إلا دورا إضافة لقولك انها عادة
شكرا لرأيك عزيزتي

Ala Al-Ibrahim, التكثير ؟!! الكمال فهمنا، بس التكثير ليش وهاد اللي صار معي سؤال منطقي ، جوابو مقنع جدا فعلا ..
مدري ليش الإنسان بيتذكر السيء وبيتناسى الشي الخيّر والمنيح
يمكن لأنو متل ما قلت شي مبيّن انو خطأ وسيء فمنتذكرو خلص وهو كذلك أكيد نحن منطرح وجهات نظر قد تكون مختلفة بس هي صحيحة
بشكر حوارك وآراءك المميزة اللي تعودنا عليا

أوركيدا, هذا فاتنا
فعلا هذا التشاؤم مكروه في ديننا، عن أبي هريرة قال : (كان رسول الله صلى الله عليه وسلم يحب الفأل الحسن و يكره الطيرة ) نحن أمة تحب الوسط أيضا
لكن حين أرد أن أضحك لا أتذكر ذلك
أنرتِ أوركيدتنا ، نقاط جميلة أضفتها، كل الشكر