kma,
إييييييييييييييييييييييييييه يا خالد على أيام زمان
والله كانت مافي أحلى منها
موضوع حلو كتير ........ فعلا أطفال هالأيام ما عم يعيشو مرحلة الطفولة أبدا
بعين الله
يسلمو إيديك عالموضوع
| آرتين لتعليم اللغات https://forum.art-en.com/ |
|
| بتتذكرو https://forum.art-en.com/viewtopic.php?t=15767 |
صفحة 1 من 2 |
| الكاتب: | kma [ الاثنين مارس 16, 2009 1:48 pm ] |
| عنوان المشاركة: | بتتذكرو |
بتتذكروا
بتتذكروا.. وقت يجي أخوك الأكبر منك ويقول لك: بدك أرسم لك ساعة وانته تمد إيدك ويعضّك هديك العضة اللي تضل مرسومة أسبوع. بتتذكروا... المصاص الأحمر اللي بيعلق بالسنان ومعو عود لونه احمر مخطط بالأبيض . بتتذكروا.. يوم كنّا نشوف افتح يا سمسم ونتأثر بكعكي اللي ياكل بسكوت ونشتري بسكوت ونتم ناكل مثله وبعدين نحطو بطاسة مي أو بالمغسلة وناكلو عم يشرشر. بتتذكروا.. يوم الجمعة ... نقوم من الصبح مشان نسمع أغنية في قصص الشعوب قصائص لا تنتهي وعالم حلو بهي يسكن في القلوب في قصص الشعوب . بتتذكروا.. تلفون أبوقرص اللي يهلك أصابيعك وانت تتصل ويا ويلك يطلع الرقم مشغول لأنه ما في ريدايل. بتتذكروا.. يوم كنا نربط الشرشف على رقابنا مثل سوبرمان ونطلع فوق الخزاين ونط على التخوت وآخر شي ناطط غلط ومنكسرة إيدك. بتتذكروا.. يوم كنا نحط الآيس أو الكازوزة بالكيس بالتلاجة مشان تصير بوظة وكل ما بدك تجي تاخدها تلاقي الوالدة حاططته تحت ومانو متلّج.. يا حسرة. بتتذكروا.. لما كانوا الأولاد يشطفوا البرندة بالصابون ويضلوا يتزحلطوا عليها طول النهار وآخر الشي تنفكش رجل شي واحد وما ينام الليل لأنو رجلو ورمانة.. بتتذكروا..لما كنا نستقبل الحجاج بكامل الفرحة واللهفة على الهدية والعيدية وآخر شي: مسواك ومسبحتين والكاميرا الحمراء وسجادة وللبنات قطعة قماش مبرقعة وساعة. بتتذكروا... عزايم قبل والسفرة ومفرش الطاولة اللي عليه صورة (فواكه) وريحتو لازم مثل ريحة المطبخ وقاعد على كراسي القش اللي لما تقوم تلاقي رجليك عليها مربعات. بتتذكروا.. لما تتقاتل مع ابن الجيران وتقول له: انقلع عن بيتنا وعن رصيفنا... يقول لك: مو رصيفكن هادا رصيف الحكومة كلام منطقي, ويتم يمرق قدام البيت ويقول لك مادخلك. بتتذكروا.. لما يروحوا الأولاد السوق مع أبوهن أو أمهن مشان يشتروا تياب للعيد ..وآخر شي شارين تياب متل بعض بس غير ألوان وتشوفن بأول يوم العيد من الأخ الكبير للصغير متل فرقة حسبالله. بتتذكروا.. لما الشباب بدهن يعملو عضلات يرحوا يترسو علب النيدو باطون ويحطون بينهن عمود حديد وهووووووووب وآخر شي منكسر ضهرهم. بتتذكروا...لما نشيل الطراريح والشراشف ونعملهن خيم ...أو ناخذ المخدات الكبيرة ونعملهن بيوت. واللي ما عمل شي من المذكور فوق بيكون من جيل الهمبرغر وسبيس توون وأبطال الديجتال..راحت عليكم هديك الأيام أولاد هالأيام بتلاقيه عايش مرحلة وحده بس ألا وهي مرحة الكبار: سيارة وموبايل و تدريجة وشحططة في الشوارع والمطاعم. ماشاف لا أفلام كرتون ولا لعب وهو صغير.. أول ما يفتح التلفزيون بتلاقيه يتفرج ع هيفا ونانسي وروبي وعلى أيامنا قصص عالمية و حديث الجمعة الديني وسهرة صباحية ع الشدة كل ليلة خميس وأم عمار ببرنامج ما يطلبه الجمهور وعصمت رشيد يغني بين الشوطين والبحرة والبجيرمي ومن الألف للياء ويوم الجمعة سيران والله أيام ووووو للأسف صار الجيل الجديد بلا هوية |
|
| الكاتب: | Wissam [ الاثنين مارس 16, 2009 2:47 pm ] |
| عنوان المشاركة: | بتتذكرو |
kma, إييييييييييييييييييييييييييه يا خالد على أيام زمان والله كانت مافي أحلى منها موضوع حلو كتير ........ فعلا أطفال هالأيام ما عم يعيشو مرحلة الطفولة أبدا بعين الله يسلمو إيديك عالموضوع
|
|
| الكاتب: | Hidding Rose [ الاثنين مارس 16, 2009 10:08 pm ] |
| عنوان المشاركة: | بتتذكرو |
ايييييييييييية ما أحلا هديك الايام ..... كنت عيشا أكتر شي و انا بسوريا يسلمو ايديك عالموضوع الرائع 
|
|
| الكاتب: | Widad [ الثلاثاء مارس 17, 2009 1:16 am ] |
| عنوان المشاركة: | بتتذكرو |
اقتباس:
بتتذكروا.. لما تتقاتل مع ابن الجيران وتقول له: انقلع عن بيتنا وعن رصيفنا...
يقول لك: مو رصيفكن هادا رصيف الحكومة كلام منطقي, ويتم يمرق قدام البيت ويقول لك مادخلك. kma, هالموضوع على أد ما بيضحك على "أد ما ببكي بالفعل هادا كلو كان يصير معنا وبالتفاصيل اقتباس:
بتتذكروا.. لما كانوا الأولاد يشطفوا البرندة بالصابون ويضلوا يتزحلطوا عليها طول النهار وآخر الشي تنفكش رجل شي واحد وما ينام الليل لأنو رجلو ورمانة..
 kma, على فكرة قريت الموضوع وانا عم اسمع غناية قصص الشعوب بالصدفي جد يسلمو كتير جد كتير حلو ومميز
|
|
| الكاتب: | العربية [ الثلاثاء مارس 17, 2009 1:38 am ] |
| عنوان المشاركة: | بتتذكرو |
kma, اييييييييييييه والله منتذكر حاسستك عم تحكي عن حماه خص نص ^ ^ اقتباس:
بتتذكروا.. يوم كنا نحط الآيس أو الكازوزة بالكيس بالتلاجة مشان تصير بوظة وكل ما بدك تجي تاخدها تلاقي الوالدة حاططته تحت ومانو متلّج.. يا حسرة.
اي والله الله يرحم هديك الإيام كان الواحد يحس بإيمت الشغلة ولو بسيطة ويفرح فيا هلأ شو مابتجبلو للولد مابيعجبو ومابيفرح فيا بس جد موضوع حلو كتير وضحكت من قلبي عليه يسلموااااااا
|
|
| الكاتب: | بانة [ الثلاثاء مارس 17, 2009 2:37 am ] |
| عنوان المشاركة: | بتتذكرو |
مين كان بيتوقع إننا لسّه بهالعمر وعم نقول : يرحم هديك الأيام , أو نقول حتى : بتتذكّروا ؟؟ !!!!! بس بالفعل صار في فرق كتير كبير بين وقت كنّا وهلق ... تماما متل ما قالت وداد , موضوعك هو المضحك المبكي .... 
|
|
| الكاتب: | kma [ الثلاثاء مارس 17, 2009 4:34 am ] |
| عنوان المشاركة: | بتتذكرو |
Wissamo, Wissamo, بس والله حسب ماني شايفلك أنو أطفال هالأيام رح يعيشو مرحلة الطفوله ووقت بيدخلو عالجامعه  Hidding Rose, أهلا وسهلا ... بس ليش بالغربه ما في أم عمار وعصمت رشيد والبجيرمي والله أنا فكرت هدول من التراث العالمي Widad, منين ناكشه هالغناية هلق.. بس هي ما صرلنا أكتر من عشر سنين مارين على هالفانتازيا معناها بكره بعد عشر سنين معقول نتمنى ترجع أيام الجامعة(اذا اتخرجت بوقتها) فاتن, أهلا وسهلا فيكي فاتن بس شكلك عم تعاني مع هالبنوته بــانــة, لك نحنه يلي ما صرلنا عشر سنين وعم نتحسر معناها أهلنا قديش بيتحسرو على أخواتنا الصغار |
|
| الكاتب: | العربية [ الثلاثاء مارس 17, 2009 1:57 pm ] |
| عنوان المشاركة: | بتتذكرو |
kma, اقتباس:
بس شكلك عم تعاني مع هالبنوته
لا والله ابدا لساتا صغيرة بس الخير لقدام ابسط مثال برامج الأطفال سبيس تون 24 ساعة هالولاد ماعاد بنفسن شي كنا نستنا برامج الأطفال ساعتين عند العصر ستني ونكييييييييف علين هلأ ماعاد فرح قلب الولاد شي  يسلموا خالد مرة تانية
|
|
| الكاتب: | Dr.Ruba [ الثلاثاء مارس 17, 2009 9:06 pm ] |
| عنوان المشاركة: | بتتذكرو |
kma,
,والله ضحكتني من قلبي معك حق كتير حلوه هديك الايام [quote] بتتذكروا.. تلفون أبوقرص اللي يهلك أصابيعك وانت تتصل ويا ويلك يطلع الرقم مشغول لأنه ما في ريدايل [/quote]  نحنا وصغالر كتير تقيل على ايدينا ههههههه[quote] بتتذكروا...لما نشيل الطراريح والشراشف ونعملهن خيم ...أو ناخذ المخدات الكبيرة ونعملهن بيوت. [/quote] هي احلى شي زكرتني وقت كنا صغار وناخد الطراريح سرقه مشان ماحدا يشوفنا ونحطن عالدرج ونقعد عليهن بشان نتزحلق ولا المرجوحه الحبله الي كانو اهلنا يعلقولنا اياها بالسقف البرنده ونحطلها طراحه او مخده بشان نحسن نقعد عليها ونتمرج يسلمو كتير على هالموضوع [/color] |
|
| الكاتب: | Safwat [ الثلاثاء مارس 17, 2009 9:28 pm ] |
| عنوان المشاركة: | بتتذكرو |
سبحان الله العولمة اخدتنا |
|
| صفحة 1 من 2 | جميع الأوقات تستخدم التوقيت العالمي+03:00 |
| Powered by phpBB® Forum Software © phpBB Group http://www.phpbb.com/ |
|