السلام عليكم ورحمة الله وبركاته ..

كيفكون يا أعضاء آرتين ...

الله يمرّق هالفحص وأيام هالفحص على خير يااااااااااارب مو هيك ... قولوا آآآآآآمين ..

لأني بصراحة كتير ملتاشة وشوي كمان بيطيرو عقلاتي من ورا هالضغط ....

عن جد الله يعين طلاب العربي .. لك بحس كل الأقسام أهون من عنا ...

دائماً محاضراتنا أكتر شي وأضخم شي ... عن جد مشكلة ...

هلأ بلا طول سيرة ووجع راس ... هو بصراحة عندي شوية ( آل شوية ) استفسارات عن التحليل العباسي وتحليل الأدب العثماني ،

بس قبل هيك بدي قول إنو :
يا ريت ما حدا يعذب حالو أو يضيع وقتو مشان أسئلتي .. يعني بس إذا في حدا عندو شي بيعرفو عن هالشغلات ياريت يساعدني فيها إذا ما عندو مانع ...

ملاحظة : أنا الحمد لله دارسة نوعاً ما بس وبصراحة أكتر ماني ملحّقة وخايفة كتير .. مشان هيك أكيد رح تتفهمو طبيعة هالاستفسارات وأسبابها .. وكمان للأسف أنا ما فيني داوم عالجامعة وإحضر .. ومع ذلك بدي إدرس وحاول إنجح انشالله ..


هلأ مشان التحليل العباسي يعني والله ضعت ..
لك بس بدي أعرف شو عطى الدكتور أحمد المحمد ( يعني بس إذا في حدا بيقدر يحددلي أكتر شو هي الشغلات المطالبين فيها ) ..
وكمان شو هي الشغلات اللي المفروض ندرسها عند الدكتورة رئيفة ...
و مشان المعري وأبو فراس الحمداني يعني كأنو ما حدا عطانياهون على حد علمي ، كأنو مو مطلوبين ؟؟؟ أو محذوفين يعني ؟؟؟
وكمان هل يا ترى رح يجينا بالامتحان من نفس قصائد الكتاب أو لأ ؟؟؟
وليش قصائد الدكتورة رئيفة بيحطلنا عليهون الدكتور أحمد سؤال بالفحص مع إنو مو هو اللي بيعطينياهون ؟؟؟ يعني مو تابعين لإلو ؟؟؟ هلأ هيك النظام يعني أو شو ؟؟؟

أما مشان تحليل الأدب العثماني فعندي سؤال واحد بس وهو إنو :
في محاضرة كتير طويلة عن فن التشطير والتخميس ... لك خوتتني ... بقى إذا في حدا بيعرف أي شي قال عنو الدكتور إنو مهم بهالمحاضرة أو هيك شي أو إنو حدد منها شي مهم ممكن نركز عليه وبس أو لأ ... ؟؟؟ لك والله ماني عرفانة كيف بدي إتعامل معاها ...


هلأ كلشي بعرفو إنو عن جد أنا آسفة لأني طولت عليكون وبعرف إنو مو وقتها ... بس المشكلة إنو كل ما بجي لحتى إدرس شي بلاقي حالي قدام عشرين سؤال ...

عن جد بدي قول الله لا يحرم حدا من القدرة على الدوام وحضور المحاضرات تحت أي سبب ...


وشكراً كتييييييييييييير لكل أعضاء آرتين بكل الأحوال .. وموفقين انشالله ........

السلام عليكم :اولا اله يعطيكي العافية ويكون معك .اصلا ما حدا بحس بمعاناتنا و الله احنا طلا العربي مظلوين.بس الله يكون معنا .بالنسبة للتحيل العباسي الدكتور احمد ما رح يجيب شي من برات الكتاب بس في ملاحظة بدي نبهك عليها (الدكتور احمد كاتب بالكتاب شغلات نظرية بس بدو اياها مع الامثلة من النص بالفحص)/اصلا قسم التحليل لحالو كارثة/
بالنسبة للعثماني يمكن الدتور اصلان يجيب مثلا:عرف فن التشطير مع ذكر مثال مع ذكر الاوجه الجمالية في هذا الفن .
على فكرة انت طرحت مسألة مهمة كتيير هي إحنا طلاب العربي بالمقررات اكتر من غيرنا وكمان بطريقة الاسئلة بس للأسف مافي اهتمام بس نتخرج يعني عمنتعب بس ما حدا عمبيقدر .
المهم بالتووووووووووووووفيق ان شاء اللللله .

بحر الحنان,
وعليكم السلام ورحمة الله وبركاته
هلأ قسم تحليل الشعر العباسي بيعطيه دكتورين .. د.أحمد علي و د.رئيفة، يعني قسم التحليل مشترك بين الدكتورين
الدكتور أحمد علي عطى بشار بن برد، أبو نواس، أبو العتاهية، أبو تمام.
والدكتورة رئيفة عطت أبو الشيص، ونصين للمتنبي :
أمن ازديارك من الدجى ...
و: على قدر أهل العزم ..
وطريقة تحليل الدكتورة للقصائد هي توضيح للكتاب .. يعني بدك تقري تحليل الكتاب وتحليل الدكتورة لأنو متل ما شفتي بالامتحان الماضي إجا السؤال من التحليلين
وبهالحالة بكون نص أبو فراس و المعري مانن مطلوبين
وبحب ضيف إنو الكتاب للدكتور أحمد يعني حتى لو عطت الدكتورة رئيفة نصوص فهي من كتاب الدكتور أحمد نفسو .. والنصوص رح تكون من نفس الكتاب ، هو لكل نص في فكرة معينة وعم نناقشا وبتقدري تعتمدي عليا بالتحليل
هلأ بتقدري تركزي ع طريقة التحليل أكتر ورح يجي سؤال التحليل 40 علامة مشترك بين الدكتورين 20 بـ 20 لكل دكتور
وأي سؤال بخصوص نص معين ولايهمك .. المهم تكوني قرأتيه منيح ومنتناقش فيه.

أما بالنسبة لمحاضرة التشطير والتخميس فأنا سمعت إنا مهمة بس شو المهم منا ما بعرف لأنو الدكتور أصلان ما بيحذف شي فأنا برأيي تشوفي أسئلة الدورات وطريقة أسئلتو وشو أكتر شي ممكن يركز عليه ..
و لاتخافي معك وقت ان شاء الله .. العباسي بـ 8 الشهر ، والعثماني بـ 18 فأكيد بتلحقي
أهم شي بحر الحنان تكوني رايقة لأنو موادنا فعلا كثيفة وبدا هدوء لحتى تقدري تتعاملي معا .. وكتير أحيان التوتر بيمنعنا نركز بالمادة بالرغم من الجهد الكبير اللي عم نبذلو للحفظ والدراسة .. لهيك طولي بالك وان شالله خير .. والله لا يضيعلك ولا يضيعلنا تعب.
موفقة

بس بقلك موفقة ياااااااااااارب
بالي مساعدى بالانكليزي

الله يكون بعونك