زملائي متل بداية كل سنة منبلش نسمع ونشوف عن توقعات الابراج للسنة الجديدة وهاد البرج الافضل وحظو بيفلق الصخر .. وهاد البرج تعبان بيجوز يقضي السنة كآبة .. ومن كم سنة صارت اللي بيحكو بالابراج كتار وبينزلوا كتب وبعرف ناس مهووسة بقراءة برجها كل نهار .. وبتصدق وبتحلل حياتها على حسب المكتوب
وكمان على الفضائيات عم نلاحظ وجود اللي بيتنبؤا باحداث عالمية وسياسية وهيك امور.. فبالاول وبالاخر بيجوز نقول انو هاد علم وكواكب وممكن تأثر على نفسية الشخص
ومافي مانع من جانب الفضول الواحد يسمع برجه لكن ... هل انتو بتلاقوا كل الفلكيين بيحكو شي من الصحة ؟؟؟ وهل انتوا من المهتمين بعالم الابراج واذا في شي اسم معين لفلكي ظبط حكيو معكن خبرونا
شكرا للجميع

شكرا اخت شذى على هذا الطرح
أنا لاأنكر وجود علم الفلك لكنني انكر وجود فلكيين هذه الايام وخاصة في مجتمعنا
كلهم متكلمين من طراز رفيع يتنقلون بك من فكرة الى فكرة وانت تستمع في حيرة ظانا ان كل ما قالوه ينطبق عليك.
انا لا أصدقهم وغير مستعد لاضاعة الوقت بسماعهم
شكرا شذى
لك مني كل الود

السلام عليكم :

اكيد ما بنؤمن فيون

وجد الشي الي عم نشوفو عالمحطات شي ما طبيعي

و اسخف شي شفتو واللي مو مصدقة انو مستوى تلفزيون الرسمي السوري ينزل لهل المستوى

وقت يجيبو وحدة عبرنامج صباحي , و ليتصلو العالم فيا و يخبروها باي يوم ولد و باية عام

و بتقعد بتقلو شو حالتو شو لازم يعمل

يعني شغل تنجيم رسمي

يعني وقت عم شوف و اسمع معم صدق و اطلع بالمذيعين اللي عم يحارو و يتلقو اتصالات و قول بقلبي

لك مو مستحيين عهالسخافة و تلفزيون رسمي مو انو شغل مثلاً ترفيه و تسلية

صدق عليون هالنكتة اللي وصلتني من كم يوم وقت شفتن اتذكرتا :

مرة واحد كان ماشي بهالشارع وداس على قشرة موزة .. وراح فيها زق مرتب على ايده .
فصار كوعه يوجعه . راح لأقرب دكتور .. ولما دخل العيادة .. الممرضة قالت له ..
عايزين عينة من البول .

هو استغرب وقال .. معقول .. شو دخل هي بهي ؟؟ .. مشان شو يعني ؟ .. أنا كوعي مخلوع


الممرضة قالت : تسطفل .. هادا النظام .. اذا في عينة بول .. ممكن تدخل للدكتور ..
ما في بول .. ما في دكتور ..

الزلمة ضرب اخماس بأسداس. وسلم امره لله .. وقال .. خلص مافي مشكلة ..
وبعد شوي طلع الدكتور مبتسم وقال : واضح انه الضربة قوية ..بس اطمن .. كوعك سليم
مو مخلوع

المريض اتعقد .. وقال : طيب من وين عرفت انه كوعي هو اللي عم يوجعني ؟؟ أكيد
الممرضة قالتلك..

الدكتور: لا أبدا . تحليل البول ه و اللي بين كل شي .. أنا عندي جهاز جديد لتحليل
البول بالكمبيوتر .

بينعرف منه كل شي عن حالتك الصحية .. خود هلأ هالمرهم ادهن منه .. وبعد اسبوع
راجعني .. ولا تنسى تجيب عينة البول معك .



راح عالبيت .. وضاربه فيوزاته .. وحكى للعيلة عن اللي
صار .. وقعدوا يضحكوا على نصب الدكاترة هالأيام .. قال شو . تحليل بول
بالكمبيوتر .. شوف على هالسلبة . شوف ..



بعد اسبوع كوعه خف تمام .. وقرر يروح للدكتور ... بس ابنه اقترح عليه يعمل مقلب
بهالدكتور مشان يكشف احتياله ونصبه.. حاجته يسلبها على خلق الله .. من وين جايب
هالنهفة .. تحليل بول بالكمبيوتر

قام الابن اخد عينة من بوله على عينه من بول اخته على عينه من بول امه على عينة من بول ابوه وحط عليهم
شوية من زيت السيارة وقال خلينا نشوف هالنصاب شو بدو يقول .



اخد الاب هالخلطة العجيبة وراح للدكتور ووقت دخل عطاها للممرضة .. وقعد ينتظر..
وبعد شي نص ساعة طلع الدكتور عرقان وماسك ورقة طويلة (نتيجة التحليل).

قام سأله بطريقة ساخرة .. ها ها .. شو لقيت يادكتور بالتحليل ؟؟

الدكتور : شوف .. هو واضح انه كوعك صار تمام .. بس في شوية نتائج غريبة .

ابنك مدمن هيرويين . وبنتك حامل .ومرتك معا ايدز. ومحرك سيارتك لازمله تبديل جوان الكولاس…
اصحا تصدقو هيك خزعبلات مهما صدقت

ومشان شي اسمو علم فلك :

نهائي مافي شي من هالشي هاد كلو تنجيم و اليعاذ بالله

يعني اللي بدعي انو شاطر فيه سدئوني غالباً بكونو هدول بيتعاملوا بالجان و ما جان

وهي من خبرة عم قلكن اصحا تسدئو شي اسمو علم فلك و كواكب

علم الفلك الحقيقي هوي اللي بدرسو عنجد الفضاء دراسة علمية

يعني ماسك التلسكوب وعم يراقب بهدف العلم

وبقلك عن مسير الكواكب و شو عم بصير بالفضاء وولادة الاقمار مو حظ كل واحد

وبالاصل هلأ اختف عليهم لهؤلاء العلماء صفة ( فلكي ) و صار اسمو عالم

بس افقد ميزة العقل اللي وهبها ربنا للعاقلين فقط ... وقتها ممكن آمن

أحيانا أي أحيانا لأ

كذب المنجمون و لو صدقوا

ولو صدقوا

وبـــــــــــــــس

لا يمكن أن ننكر وجود علم الفلك و وجود علم الأبراج بس أنا الصراحة إذا بأمن بشي من الأبراج هو صفات الأبراج لا أكثر و لا أقل يعني أنا بصدق وقت بقلي انو برج كذا صفاتو كذا وكذا كصفات نفسية مو أكثر بس ما بأمن وقت بقلي انو اليوم عندك قبض مصاري او مشروع كبير او انك هتمرضي انتبهي او ما بعرف شو لأنو لا يعلم الغيب إلا الله عز وجل
بس طبعا علم الفلك موجود
شكرا كتير شذى على الموضوع يلي بالعف بهي الفترة كتير بتتدرج هالقصص واتوقعات الفلك للسنة القادمة
ببساطة اذا درست بتنجح واذا اشتغلت بتلاقي ربح وبتلاقي نتيجة عملك
وكل شيء يسير بقدرة الله وما يشاء يفعل وما يشاء يعطي ويأخذ

شكرا لمروركم الكريم جميعا والحق معكم فعلا... بس الواحد بيقول قربت القيامة وقت بيكتروا الكذابين .. والعلم عند الله ومالتوفيق الا بالله
ينعاد علينا وعليكم بألف خير