كيف كان نهارك اليوم ...وهل أنت راض عنه

فطوم · **مرسل:** الثلاثاء يونيو 30, 2009 9:43 am

و الله اليوم كان في شي بفرح و في شي بزعل
الشي اللي بفرح انو خلصت فحص اليوم

و الشي اللي بزعل انو رح انتقل على مدرسة تانية
لان المدارس بالسعودية الاعدادي لحال و الثانوي لحال
ومو كل رفقاتي رح يكونو معي بالثانوي
صعب الواحد بعد ما يكون مجتمع يتركو

عااشق الغروب · **مرسل:** الأربعاء يوليو 01, 2009 1:29 am

يومي كان سيء كتير
اول شي فئت الساعة 5 الصبح منشان سافر عالشام لانو عندي مادة الساعة 11
وطبعا انا ملخص المادة براشيتات صغيرة
بلا طول سيرة وصلت عالامتحان ودخلت عالقاعة وفتحت الراشيتات وعم جاوب عالسؤالين اللي اجو بالامتحان وياغافل الك الله لئطني الازن معي راشيتا
وطبعا مارضي الازن حتى سلمني لرئيس القاعة اللي بيكون دكتور المادة واكلت منو بهدلة بتهز البدن بس الله لطف انو ما حرمني ولا دورة واكتفا بتئليعي من الامتحان واخدت علامة صفرر (الله لا يوفئو للازن)
ورجعت عالبت زعلان ومئهور ونمت الساعة 1 الضهر وهلء فئت

zeana · **اشترك في:** الأحد مايو 31, 2009 5:14 pm

يعني البداية ماشي الحال لحد ما اتخانئت شخص مزعج
بس بتوقع إنو يصير أحلى لاخر النهار

دانيا · **مرسل:** الأربعاء يوليو 01, 2009 4:12 pm

اليوم غير الشكل

تاج · **مرسل:** الأربعاء يوليو 01, 2009 11:08 pm

ياعين والله كتير صاير معك أيام بهالايام لك أنا كان لي فترة الوقت عندي موقف وأيامي على نفس الوتيرة ..نوم قليل دراسة بتموت فوتة حيط بالجامعة وهزة بدن المسا ..بس والله اليوم تلحلحت الأمور ..ماتاري العقبة كانت فحصي بس مو أكتر
المهم اليوم كان عندي نثر للدكتور ابراهيمك (يؤبش ألبي شو بحبو لهالدكتور) لانو جاب كتير قريب من الدورة الماضية والموضوع كان نفسو اللي قريتو قبل ماروح المهم كتير اليوم كتبت منيح فطلعت منعنشة وقابة على وجه الدنيا لاني كنت متوعدة لكم واحد ووحدة عم يدايقو خلال فحصي ..يعني كانت الكلمة الوحيد على لساني (بعد الفحص وعليكن خير) بقينا بالجامعة شي ساعتين ونص بعد الفحص بعد ماخلصنا قبل بساعة من الوقت ولملمنا أشلاءنا لانو ستنينا عالم عندن بعدنا ورحنا عمكان ذو طعام طيب ووجوه حسنة (بنات طبعا ولو ) وكان من جملة التهديدات اللي عاطيتهن خلال الفحص اني بدي الزق الفاتورة عوحدة من رفقاتي بحجة انها من شي ألف سنة تشارطت معي شرطت وخسرتو , لهيك البنت دريت بالقصة بعد ماأكلنا وصار معا حالة بتخوف اضطرينا نعفيها من المهمة بس شبعنا ضحك اليوم . وصلت عالبيت كان طاير عقلي وكنت موعودة بمشوار تهضيمي انا ووحدة من رفقاتي المسا عالدبلان بس وقت اجيت لقيت الحجة (ماما) معها عدة التعزيل وابتسامة باهرة بتقلي يلا حبيبتي انا فضيتلك الغرفة مشان تبلشي انتي واختك ( يعني هيك بتكون حطتني تحت الأمر الواقع وماعد اقدر قول شي لانو الغرفة كلها صارت برة) خلصنا بعد شي ساعة ونص وبعدها نعست نعس مو طبيعي وراسي صار يوجعني لاني فايقة 7 ومو نايمة بعد الضهر وانا عندي نومة الضهر أساسية ..أكلت حبوب وجع راس لرتويت ومع هيك بس خف شوي
وهلأ انا عالنت قلت بلقطلي كم فرد عالمسنجر بس كلو مخشكر اليوم مدري وين سارحين هالبشر وانا قاعدة بلا حرك
يلا حاجتكن هلأ باي

خبير بالتريكس · **مرسل:** الخميس يوليو 02, 2009 2:43 am

اليوم قررت, لأن خلصو وراق الشدة اللي بأيدي وفرشت

بس قررت أنو فينيش

ابراهيم محمد · **مرسل:** الخميس يوليو 02, 2009 6:13 am

يومي اللي راح كان كأي يوم عادي بمر علي ما صار فيو شي مميز غير انو الارهاق عميزيد علي يوم بعد يوم وماني عرفان كيف بدي حل هالمشكلة العويصة

بلش شغلي كالعادة الساعة 8 المسا وظليت بالشغل للساعة 10 الصبح وبعدها نزلت على البيت وكنت فارط من الجوع وكانت أمي لساتا نايمة وما حبيت فيقها شربت كاسة عصير وأكلت شوية شوكولا وطبيت متل ما أنا بتياب الشغل والتلفون انتحر وأنا نايم آخر شي شلفتو حتى انفصلت البطارية عن الجهاز مشان ما يزعجني لأني بدي نام وخالي كمان ظل يدق على الأرضي وأمي تفيقني مشان رد عليه وأنا لا حياة لمن تنادي وظليت هيك حتى صارت الساعة تنتين فقت وفطرت وجليت الجليات الموجودين وقعدت شوي مع أهلي وبعدين رجعت نمت للساعة سبعة فقت تغديت وطلعت على الشغل ومن الساعة تمانية للساعة 4 الصبح ما صارلي أرتاح ولا دقيقة وهلأ نزلت قصيدة ببوح المشاعر وباركت لصفوة بعيد ميلادو وبعد شوي بدي أفتح الكفي نت وأنطر بديلي حتى يجي مشان روح على الأمن الجنائي لأنو أكلت بهدلة من خالي على التأخير بجيبة وثيقة غير محكوم بس أنا خايف انو كون محكوم ل شي ممكن يصير

الملاك,

هانت الشغلة خاصة بعد ما رجعت أمي من السفر

اقتباس:

بس بلالك الأركيلة مشان صوتك ومستقبلك الفني

بأمرك أنا خلص رح خفف الأركيلة بس ما بوعدك أتركها على الأقل حالياً لأنو ما صدقت امت أخدت الإذن بادخالها للبيت بعد معارك طاحنة

يلا بدي قوم جهز الكفي مشان أفتح

سلام للجميع

العربية · **مرسل:** الخميس يوليو 02, 2009 5:54 pm

اليوم فقت الساعة 3 الضهر

ولأني نايمة كتير ماعم اعرف صحصح لهلأ لهيك
الشغلة بدا نسكافيه خاصة اني تغديت بعد مافقت مباشرة
قمت رجعت نعست^ ^
ولهلأ ماعملت شغلة مفيدة
بس خططي انزل عالحرم النبوي عصلاة المغرب والعشاء ان شاء الله
وبعدا عالسوق وبعدا عالحديقة
وهيك بكون رضيت عن نهاري

العربية · **مرسل:** الخميس يوليو 02, 2009 5:57 pm

ابراهيم محمد,

اقتباس:

والتلفون انتحر

اقتباس:

وجليت الجليات الموجودين

الله يعطيك العافية ونيال امك عليك

ابراهيم محمد · **مرسل:** السبت يوليو 04, 2009 12:42 am

والله يا جماعة الخير اليوم عندي كان شبه مأساوي وصار معي فاجعة كبيرة آخر مرة صارت من أكتر من 5 سنوات بالبداية أنا طلعت من الشغل الساعة 10 الصبح بعد معركة كبيرة مع الأمن لأني كنت فاتح الكفي بالليل وهالشي ممنوع بس حليناها الحمد لله رجعت على البيت وكانت أمي فايقة تجهز لوليمة اليوم لأنو كان عنا عزيمة عائلية أخواتي وأخي الكبير من الشام المهم انو كمان ما حسنت أصبر للفطور قمت أكلت شوكولا ونمت والفاجعة هي انو بسبب النومة راحت علي صلاة الجمعة ولساتني لهلأ متدايئ على هالشي مع انو اهلي حاولو يفيقوني بس أنا من التعب والارهاق ما فقت ولأجل هالسبب أنا قررت أترك الشغل من دون رجعة وما بدي الشغل اللي بدو يعطلني عن واجبي تجاه ربي أولاً واهلي ثانياً وبكرا الصبح رح خبر صاحبالكفي انو أنا خالص مشان يعطيني حسابي وارجع نام وأنا مرتاح البال

بعد هيك فقت لما توافدت العائلة الكريمة والصغار اللي عددهون 13 ولد واجا وقت الغدا اللي كان مفتول ورجعت نمت وما حسيت الا بفيقوني مشان روح على عرس ابن خالتي وأنا مالي خبر بنوب انو خاطب اساساً المهم رحنا على قصة المولد النبوي بس انصدمت بالفرقة لأنو كانت ما كان أدائهون كويس وبعد هيك رحت عند رفيقي لأنو كان موصيني على ملفات جبلو اياهن من النت ووصلني بعدها على البيت وجهزت حالي مشان روح ع الشغل وأنا مصمم انو قول لصاحبالكفي يشوف شغيل تانيبس للأسف ما شفتو

فاتن,

اقتباس:

الله يعطيك العافية ونيال امك عليك

اي ما دائماً بتقلي انو انت رح تطلع ست بيت شاطرة
بجلي وبنظف وبرتب البيت بس انو أطبخ بموت من الجوع وما باكل

يلا حاج برجعلكون بيومية جديدة قريباً بعد ما أتحرر من الشغل

تحياتي

LATEST_POSTS

كيف كان نهارك اليوم ...وهل أنت راض عنه

الموجودون الآن