بسم الله الرحمن الرحيم
هلأ رح جاوب على أصعب امتحان مر علي بحياتي كلا
والله أني أشهد انو أسئلة ثائر أصعب من امتحانات الكليو اللي قدمتا خلال 4 سنوات
ثائر حبيبي والله أنا كشفتك يعني تابعتني من أول ما قعدت على الكرسي وشفت شو نقاط ضعفي وليك هلأ بتضربني على الوتر الحساس
بس أنا هلأ ح جاوب وانشا الله تعجبك اجاباتي الصريحة الجديدة
Citer:
1- انت عم تمشي مع حبيبتك بأحد الشوارع ...فجأة بيجي شب و بصير يصرخ و يقلها ( يا خاينة ..ضحكت علي و قلتيلي انك مسافرة برات البلد ...طول ها المدة و انت عم تضحكي علي و عم تخونيني ) بدي أعرف شو بكون تصرفك بها اللحظة مع الاتنين ...( حبيبتك و ها الشب )
أول شي بعملو بهالحالة انو بتخانئ مع الشب اللي اجا لأنو الطريقة اللي اجا علينا فيها مو لابقة أبداً على الأقل اذا ما بدو يحترمها هي لأنو خانتو يحترمني أنا اللي ما في بيني وبينو أي شي وبخليه يترك مجلسنا وبعدين بحاول أتفاهم مع حبيبتي وبشوف شو ردها على الموضوع وبحاول قدر الإمكان انو أضغط عليها حتى أعرف شو مدى صحة الكلام اللي رح تحكيلي اياه ومقارنتو مع كلام الشب اللي أنا بفكر انو كمان لازم أسمع رأيو مشان وقتا أحكم منيح واذا طلع كلام هالشب صح وهي ما كانت حاكيتلي عن هيك شي فبالأساس ما بتستحق انو تكون حبيبتي لأنو ما كانت صريحة معي بالقدر اللي أنا كنت أستناه منها
Citer:
2- انت بتعرف شخص عالنت ...هو صديقك و صرلكم مدة طويلة بتحكو مع بعض و لا مرة نزل هو على سورية ..كان يحكيلك على بنت بحبها و بيعشقها و بيحكي معها عالنت ...بيوم من الأيام نزل على سورية و قرر انو يعرفك على البنت يلي بحبها ..قاعد انت و اياه و بتيجي ها البنت ...بتطلع هيك و بتلاقي بنت انت حبيتها و لسه بتحبها بس تركتك و كان السبب دخول انسان بحياتها حبتو و حست انو هو يلي بيستحقها و مو انت ... شو بكون تصرف ابراهيم مع هالبنت و مع رفيقو ... يا ترى بتقلو لرفيقك شي ؟؟
أكيد رح أتصرف متل ما رح يتصرف أي شب عاقل وانو ما خبرو عن أي شي كان بيني وبين هالبنت حتى لو لساتني بحبها لأنو ما بدي أخسر صديق كرمال شي مضى وراح وبدعيلهون انو الله يهنيهون ويوفقهون
Citer:
3- رفيقك و عزيز على قلبك كتير ...هو بيحكيلك عن بنت بحبها ...بيوم من الأيام عرفت و من برا انو ها البنت بتكون مثلا ( بنت عمك ) بس رفيقك بيعرفها قبل ما يعرفك و لما عرف انها بنت عمك ما قدر يقلك طبعا ... ...شو بتكون ردة فعلك ؟
ما بعمل أي شي لعدة أسباب : أولاً هو بيعرها قبل ما يعرفني وتانياً هو لما ما خبرني أكيد بكون خايف انو أنا أزعل منو وتالتاً انو أنا بأي حق بدي أعترض على علاقتو ببنت عمي لأنو هن عاقلين وبيعرفوا ينتخذوا قرارات يكونوامسؤولين عنها
Citer:
4- انت بتحب بنت الى حد الجنون ...و هي بتعشقك ...علاقتكم استمرت اكتر من 4 سنين و اجا الوقت المناسب انو تطلب ايدها للخطبة ...بتيجي لعند أمك ( الله يخليلك اياها ) بتقلها يا امي بدي اخطب البنت يلي اسمها فلانة من بيت كذا ...أمك بترفض رفضا تاما و يتقلك عيلة ها البنت و عيلتنا ما ممكن انو ياخدو من بعضهم و السبب مشاكل قديمة ...و بتقلك انو اذا بدك تاخدها خدها بس انا ماني موافقة و ماني رضيانة ....بس انت بتحب هالبنت كتير و السبب يلي قالتو أمك هو سبب قديم و ما ذنبكم انت و ها البنت انو تتحملو غلط أجدادكم و با المقابل في رضى أمك ...شو تصرفك ؟
أنا بأي قرار مصيري رح أتخذو بحياتي متل قرار الارتباط من خلال الخطبة وأي شي ما رح أتخذو مهما كانت الظروف اذا كان في أي اعتراض من أمي ومهما كانت الأسباب
الحب قوي كتير بس متل قوة الأمومة
ممكن يكون وقتا عندي فكرة انو أصبر شوي على مشروع الخطبة وحاول انو أفهم شو طبيعة الخلاف اللي بين العيلتين وانو اذا صار في مجال انو نحل هيك خلافات طبعاً كلو بموافقة أمي
بالنهاية ما فيني أرفضلا طلب لأنو هي كلشي صفيلي من ريحة أبي الله يرحمو
Citer:
5- خلال السنة الماضية انت عشت بشاليه على شط البحر و كتير أيام كنت تنام فيه لحالك و أكيد تعلقك با البحر اجا من ورا ها الشي ...احكيلي ابراهيم شو قدر انو يستفيد من تجربة الوحدة يلي مر فيها و شو هي ايجابيات الوحدة برأيك ؟
أنا قعدت فترة منيحة بالشاليهات لحالي وهالمنطقة بهالوقت من السنة بتكون شبه مهجورة وقتا كنت مزعوج كتير وتعلمت منها انو الانسان ما لازم يظل عايش لحالو وبعيد عن الناس وتعلمت كمان ما أوثق بمين ما كان بسبب كم موقف مريت فيهن هنيك وتعلمت كيف أشكي للبحر همي بالطريقة الصحيحة وتعلمت أطبخ كم طبخة مو زابطين 
من ناحية ايجابيات الوحدة انو بتحسس الواحد انو لازم يتعمد على حالو بكل شي وما يستنى من أي شخص أي مساعدة
وانو بتعطي الشخص مجال أكبر للتفكير بكتير أشيا مرت وبمر ورح يمر فيها بحياتو
برأيي انو الوحدة وحشة ومو حلوة إلا بأوقات محددة وبس
Citer:
6- انت مريت بأكتر من تجربة حب ...الحب الأول في قلب ابراهيم ياترا الو مكانة خاصة ...و هل الحب الأول حفد أخدود الو لحالو و لهلأ بيوجعك ؟؟ أو ما بتآمن بأن ما الحب إلا للحبيب الأول ؟
صراحة أنا ما بآمن بشي اسمو ما الحب الا للحبيب الأول لأنو كتير أحيان بكون الحب الأول مو مبني على الصراحة وبكون في خلل من أحد الطرفين
أنا بعتبر المقولة صحيحة ما تكون المقولة بتخص أول حب (ناجح) مهما كانت النهاية
وقتا بكون فيني قول انو الحب الأول ترك علي ىثار كبيرة خاصة انو كان في أفكار حبيت ترجمها على أرض الواقع من خلال الارتباط الرسمي
مع انو الحب الأول أخد مني مكانة كبيرة الا انو ما بوجعني لأنو كان الفراق مو مني والتقصير كان مو مني وهيك أنا بكون فخور انو أنا كنت مخلص لرابطة الحب اللي جمعتني باللي كنت حبها
Citer:
7- بحكم حياتك يلي أكتر أوقاتها في عالم افتراضي يلي هو النت ...قصتك يلي عايشها هلأ هل هي من النت ؟ و هل بآمن ابراهيم با الحب عن طريق ها لعالم الافتراضي ؟؟
هالعالم الافتراضي هو سبب مأساتي يا غالي بس من ناحية تانية كمان بقول انو هو سبب سعادتي اللي ما فيني أوصفها
قبل ما فوت على هالعالم الواقعي اللي انت سميتو افتراضي كنت أستسخف أي واحد بقول انو عندو أصدقاء من بلدان تانية وأصدقاء ما شافهون بنوب ومن هالحكي
بس من لما أنا فتت على هالعالم وحالياً صار جزء لا يتجزأ من حياتي لأنو أنا حالياً ما فيني أتركو لأسباب كتيرة ما فيني أذكرها هون لأنو وقتا بطلع عن مضمون السؤال
يا غالي أنا حالياً مو عايش قصة أساساً لا من خلال هالعالم ولا من خلال عوالم أخرى
بس بقدر قول انو قصتي بآرتين أكبر دليل على انو هالعالم هو عالم واقعي أكتر منو عالم افتراضي لأنو أنا ومن دون مجاملة تعرفت هون على أهل تانيين وأخوة تانيين
وقصتي بآرتين هي أجمل قصة مريت فيها من خلال عالمي الواقعي
Citer:
8- إنسان قدر يأثر فيك و يوقف حدك و انت بأزمة ...و قدر أنو يغير حياتك ...قريب ...صديق ...أمك ..أخوك .. .؟
اي أمي لما وقفت ضدي لما اتخذت قرار انو أترك الجامعة وأتفرغ لمسؤوليات البيت وأقنعتني انو كمل دراستي وأتخرج وأنا اقتنعت بكلامها وقررت كمل وبظن انو هو الخيار الصحيح وبهالقرار غيرت حياتي كتير
Citer:
9- أنت من درعا ...و بتعشق حمص ... يا ترى شو سر عشقك لحمص علما أنو زياراتك لالها معدودة على أصابع الايد الوحدة ؟
يمكن تكون ديدي هي سبب عشقي لحمص
بمزح بس أنا ما كنت أعرف حمص غير من خلال النكت اللي بسمعها وما صار انو أتعرف على حدا حمصي أبداً بس لما ربطتني علاقة بآرتين وتعرفت من خلالو على كم حمصي وبعد زياراتي التنتين لحمص ( انشا الله التالتة عن قريب ) شفت قدي هالشعب راقي وحباب ودخل لقلبي
وحمص كمدينة حسيت فيها براحة مو طبيعية يعني لما كون فيها بحاول قدر الامكان انو أتأخر حتى أطلع منها وانشا الله أنا بدي حاول قدر المستطاع انو أنهي حياتي الجامعية بحمص وبدي حاول انو تكون السنة الرابعة دراستي بحمص
هاي هي حمص بنظري
Citer:
10 – ثلاث أمنيات يتمنى ابراهيم انها تتحقق ؟
بتمنى أول شي انو كمل مشوار أبي من خلال مسؤوليتو عن أهلي وكون أنا المسؤول من بعدو وحاول قدر الامكان انو كون متلو مع انو هالشي صعب لأنو وين أنا ووين هو.
بتمنى انو أحترف المجال اللي أنا حبيت انو فوت فيه وأتعلم كلشي بيختص فيه
وبتمنى بالنهاية انو عيش حالة حب صادقة صادقة صادقة وحقيقية توصلني لتكوين أسرة أفتخر اني كونتها من خلال حب صادق
Citer:
11- المعلومات يلي عندي بتقول انو ابراهيم عانى من قلة وفاء بعض الأصدقاء و خيانة البعض أحيانا ..عطيني موقف صدمك بأحد أصدقائك و خسرتو على إثرو ..؟
للأسف يا غالي المعلومات اللي عندك صحيحة 100%
رح أحكيلك آخر موقف صار معي مع آخر صديق خسرت صداقتو أو فيني قول بدل انو خسرت صداقتو انو خسر صداقتي مو شوفة حال بس الموقف كان جداً سخيف
باختصار انو علاقتي مع هالصديق انتهت بسبب CD اي بسبب CD غريبة مو هيك
كانت القصة انو أنا كنت باللاذقية ومن خلال عملي المتواصل بكفي نت بكون جربت معظم الأنظمة الموجودة بالسوق حتى ولله الحمد انو أنا هل بملك نسخة الوندوز الخاصة فيني ومن شغلي أنا
اتصل فيني مرة وأنا باللاذقية وهو كمان باللاذقية وقلي ابراهيم أنا بدي نسخة الفيستا اللي حكيتلي عنها ( أنا كنت حاكيلو عن نسخر فيستا منيحة كتير والكرك فيها زابط 100% وما فيها أي مشاكل ) ( طبعاً هي غير عن نسخة الوندوز الخاصة فيني )
أنا فوراً حكيت مع ابن عمي اللي هو بديلي بالكفي وقلتلو انو بدي نسخة من النظام وفي شب جاي من درعا وبدو يمر عليك ياخدها
ولأسباب خارجة عن ارادتنا اللي هي انو النسخة كانت عن جارنا صاحب محل صيانة واليوم جمعة وما بيفتح محل الصيانة لا يوم الجمعة ولا يوم السبت
اللي صار انو ما اقتنع بكلامي ابداً وقرر انو ينهي الصداقة للأبد
Citer:
12- و أخيرا بدي اسألك سؤال أنت بتسألو لكل يلي قعدو على ها الكرسي و سألتني إياه الي كمان و هو :
إذا عطيتك المايك لمدة 5 دقايق و العالم كلو رح يسمعك ...شو بتقول ؟؟
والله كلشي كنت متوقعوا الا انو هالسؤال يرجعلي مرة تانية
انو شو بدفعلك حتى تعفيني من الاجابة على هالسؤال القاتل
مممممممممم بعين الله وأنا مضطر انو جاوب بس والله ما بعرف شو بدي قول
هل جربنا أن نكون يوماً كنسمة صيف عليلة ... يفرح بمرورها العابرون ...؟؟؟
أو جربنا على الأقل أن نترك الأماكن التي نحن فيها أكثر جمالاً ....
هل جربنا على أقل تقدير أن لانشوه الأماكن التي نمر بها ..؟؟
لا تشوهوا أحزان غيركم بأفراحكم .....
لا تشوهوا لحظة فرح الآخرين بنجاحهم .. بكلمة جارحة فتفسد ....أو تنغص عليهم فرحتهم ...
وأقول كما قال نبي البشرية لا تَحَاسَدوا وَلا تَبَاغَضُوا وَلا تَدَابروا وَكونوا عِبَادَ اللهِ إخْوَانا
وبس
هاي اجاباتي على امتحانك اللي أخد مني وقت كبير للتفكير
وبهنيك صديقي الغالي ثائر على اختيارك الرائع للاسئلة الظريفة والصعبة بنفس الوقت
تحياتي
You can register from here to get free full access . We highly appreciate any participation from teachers and professors 
Connexion
Mobile
FAQ
Rechercher
::
رح اسألك أسئلتي يلي هي عبارة عن توديعة لهالكرسي و بتمنى تكون صريح بأجوبتك متل ما كنت صريح بكل الأسئلة يلي مرقت عليك ... 
::
... بس اجاباتك كلها رائعة 
