مرحبا...أنا الملاك ..... فمن أنت ؟؟

Celina · **Publié:** Ven Avr 30, 2010 12:37 am

الملاك,
مرحبا كيفكن؟
شوبدي أحكي عن حالي؟! :roll:

أنا عضوة قديمة بآرتين بحبو كتير وبحب كل الأعضاء فيه كتير قلال الأشخاص يللي بعرفن شخصيا بآرتين بس بحبن كلن وبحترمن وكل واحد منن بيعنيلي شي أنا من برج الحوت بحب أضحك وأمزح مريت بظروف خلتني أتأخر بالسنة التالتة مثلا انكسرت إيدي اليمين قبل الفحص :oops:

ميزتي إني بحب كل العالم وماعندي حقد على أي إنسان(طبعا في استثناءات)بتعامل مع الأشخاص بصدق بس غالبا بنصدم فين :shock:

بعشق بلدي سوريا وبموت عليها شو كمان؟ *ممم

الحمدلله الله بعتلي ناس حواليي تحبني وتخاف عليي
بحب الصدق وبكره الكذب والخيانة وحاج بيكفي
سلام للكل *sla

الملاك · **Publié:** Dim Mai 02, 2010 10:57 pm

Celina,
مع أنو ردك كتير حلو ومهضوم وخفيف نضيف إلا أنو .... :mrgreen:

عجزت كيف أفهم أنو يعني بتحبي بس اللي من برج الحوت؟ أما أنو بيعنيلك اللي بكون من برج الحوت؟ أما شو قصة برج الحوت :roll:

هلأ بعديييييين فهمت إنك من برج الحوت :mrgreen:

أي يا هلا... هلأ صحي ما بفهم بالأبراج بس بذكر أني أيام اللي كنت من برج الحوت كنت اسمع من الناس أنو صحاب هالبرج عاطفيين وحساسيين ما ؟ *ممم

" لأني ما كنت أفهم بطريقة حساب الأبراج وكل مرة احسبا شكل

"

Citer:

وماعندي حقد على أي إنسان(طبعا في استثناءات)

جملة غريبة *ممم

Citer:

سلام للكل

عراسي

والله سيلينا أنتي من الناس اللي بينحبوا وبتفوتي عالقلب

... بس إلك غطات طويييييييلة :mrgreen:

.... بس بدي أعرف بشو بتنشغلي آه؟

aboura,

شرفتي ونورتي

... بس طلتك كانت قصيرة علينا... ونحنا إلنا الشرف بانضمام عشاق الثقافة معنا

الحلم المستحيل,
لا يكون غيرتي رأيك بعد ما عرفتي أنو نحنا سوريين :mrgreen:

مية أهلا وسهلا

Celina · **Publié:** Dim Mai 02, 2010 11:04 pm

الملاك,
مشي الحال عدّلت حطيت أنا من برج الحوت

Citer:

جملة غريبة

كيف يعني غريبة؟

Citer:

... بس إلك غطات طويييييييلة .... بس بدي أعرف بشو بتنشغلي آه؟

بتعرفي الشركات والفيلات والأعمال عم أمزح :mrgreen:

بس مريت بشوية ظروف صعبة بس رجعت وكتير مشتاقتلكن كتييييييييييييييير *ورود

الملاك,

محمد عصام · **Publié:** Mar Mai 11, 2010 12:06 am

أولا بشكرك أختي الكريمة الملاك لأنك أتحتيلي الفرصة لأتعرف بشكل أوسع على أعضاء أسرة آرتين

و يا ريت ينال هالموضوع التفاعل من الجميع لنتعرف ع أكبر عدد ممكن من الأعضاء بهالفترة القصيرة يلي مارح تطول بالنسبة إلي بين أعضاء أسرة آرتين فلذلك بتمنى أخرج من المنتدى و أنا بعرف أكبر عدد ممكن .

اسمي مركب محمد عصام واسمي الكامل محمد عصام محو

   دراستي هي الإعلام و التاريخ وبطمح للحصول على شهادة الدراسات العليا بالتاريخ الإسلامي مستقبلا .

نلت الحمد لله و بناء على قول الله ( و أما بنعمة ربك فحدث ) عدة جوائز وتكريمات بمجال التكلم أمام الجمهور والقدرة على الإقناع وجذب إهتمام المستمع على وسائل الإعلام المرئية و المسموعة , و مدرب بالتنمية البشرية و تطوير الذات , بالإضافة للبحث التاريخي كأصغر باحث سوري عن كتاب ألفتو من سنتين بإسم (فيليب الثاني) و هو موجود بمحركات البحث و تمت ترجمته للألمانية .

اهتماماتي
العمل الإعلام ( المرئي و المسموع و المقروء )
البحث التاريخي ( جائزة أصغر باحث سوري شاب عن كتاب فيليب الثاني )
الشعر ( قريبا ديوان باسم شعر من نوع آخر.. )
السفر (زرت لبنان و الأردن و تركيا و السعودية والإمارات و الصين .. )
عملي بالإضافة للي قلتو :
مقدم بإذاعة شام إف إم و محرر ببعض الصحف .
   ترأست النادي الإعلامي عام 2007م.
   وترأست الجمعية الشبابية للوقاية الطريقية والمرورية عام 2008م.
و حاليا مدير لمنتدى رسمي هو منتديات الجمعية التاريخية العالمية .

سلبياتي مزاجي بطبعي و بحب الفرح و السرور و المشاوير زيادة عن اللزوم كل ما قارنت وضعي الحالي مع طموحي بشوف حالي متأخر جدا .

شكرا مرة تانية أختي الملاك

و بشكر أ. خالد الهبل يلي كان سبب وجودي هون بدعوتو الكريمة إلي و بتمنى ما أكون ضيف ثقيل بهاالفترة القصيرة يلي رحكون فيها معكن .

تقبلي مروري و ردي المتواضع

خالد الهبل · **Publié:** Mar Mai 11, 2010 1:07 am

الملاك,

مشكورة أختي على هالموضوع المهم والجميل في مثل هذا المحيط

الاسم: خالد وليد الهبل

العمل: طالب سنة تالتة إنجليش
بدي 2 مادة بصير رابعة :wink:

+ طبعاً أنا تأخرت بالجامعة بسبب العمل... وأنا بشتغل بشركة ألمانية بالشام متخصصة بمجال بناء محطات التوليد الحراري.. ( كهرباء )
مجال عملي هو الأمن الصناعي والاسعاف الأولي..
وأنا محسوبكن مدير قسم الأمن الصناعي والاسعاف الأولي في شركة سيمينز الألمانية

بحب كون دائماً متميز وصاحب الريادة... *خوف

والحمد لله رب العالمين عاطيني ملكة القيادة بشكل عام..

منطقي قدر المستطاع...
بحب أنو دائما النفوس تكون صافية.... :arrow:

أشغل منصب عضو من أعضاء منتدى كتير غالي على قلبي وهوا آرتين
كما... وأشغل منصب المراقب العام في منتدجى الجمعية التاريخية اللي حكى عنو الزميل محمد عصام..
كما وأني مشرف عدة أقسام في منتدى عربي ضخم

بالأخير

شكراً أختنا الملاك على هالمواضيع الجميلة

Yamen · **Inscrit le:** 01 Mars 2007

هههه سبحان الذي خلقك يا ملاك ... دايما موضيعك مميزة وحلوة

وماشاء الله ارتين رقم واحد بلا منازع وكل مالو لفوق باذن الله

وقريت ردود كل المشاركين الله يعطيهم العافية فعلا تشرفت بصداقة الكل

اما عن حالي ملاك خانم الي رجعة بس اكيد مابطول بس لاجمعلك افكاري

ومابقى تبطلي هالعادة انتي واسامة عنقاااار ههههه سلامي للكل

الملاك · **Publié:** Dim Mai 16, 2010 1:20 am

Celina,

Citer:

كيف يعني غريبة؟

ممممممممممممم لقلك كيف
هلأ أنتي كاتبة
أنو ما عندك حقد عأي انسان مع بعض الاستثناءات "وهادا الوضع الطبيعي عند البشر" بقا محدا بيحكي عن حالو الأشيا اللي بيشترك فيا مع كل البشر إلا إن كان شي استثنائي أو غريب أو بدرجة ملفتة للنظر
ولو أنو ما عندك استثناءات بالمرة... لكان طبيعي تخبرينا أنو ما عندك حقد عحدا... بس بما أنو عندك استثناءات ... وبما أنو الوضع الطبيعي "الشائع للبشر" أنو ما يحقدو بالكامل عكل الناس ولا يكونو عالآآآآآآآآخر متسامحين.. إذا وضعك طبيعي

عفكرة سيلينا ما تدققي كتير عكلامي :mrgreen:

أنا بحلل زيادة.. بس هيك بكون شعوري تجاه أي حدا بيكتب مثلاً :
بحب الصدق والأمانة والتسامح والمحبة وبكره الخيانة والكذب والخداع و و و
ليش يا ربي مين بحب الخيانة؟
ما حتى الخونة بيكرهو الخيانة.. وبيكرهو حالن كمان.... لك مين بحب الكذب؟
بس وقت بكون أنا بحب الكذب وبستمتع فيه.. وبمارسو بشدة.. وقتا بستاهل بموضوع عم يقلي عرفنا عن حالك قول أنا بحب الكذب وبستمتع بأني أكذب و و و
لأنو صار شي مميز منافي للطبيعة البشرية ويستحق الذكر... ما صح :roll:

هادا رأيي... وبدك تتحملي عاد... :mrgreen:

....

محمد عصام,
فعلاً أسلوبك بطرح نفسك بحد ذاتو مميز... مختصر ومقتضب وشامل بنفس الوقت.
إلنا الشرف أخي الكريم فقد حللت أهلاً ونزلت سهلاً... ولو أنك من بداية وجودك حسستنا بأنو طلتك زيارة ما أكتر للأسف

فإن كانت تلبية لدعوة فشكراً للي دعاك وأحيي كرمك رغم الوقت الديق على ما يبدو

وإن كان لإعجابك فينا... فسمحلي أحترم رأيك من يوم ورايح :mrgreen:

أما اهتمامتك الواسعة ومجالات ممارستك العملية فممتعة وملفتة للنظر... وبتخليني بشوق للنقاش معك....وأرجو نلتقي بأحد المواضيع قريباً

والشكر الأول والأخير للي بشارك بالموضوع

ولاختيارك لهالمكان لتعرفنا عن نفسك *ورود

خالد الهبل,
عنجد صدمتني :shock:

معقول ملاقي وقت لكل هالأشيا :shock:

طالب وبتشتغل شغلة بنظري صعبة و3 منتديات.. أي أنا آرتين ما عم لحقلو يارجل :roll:

هو انشالله بس يطلعو هالتلت مواد وتخلص من الرابعة بعدن... وبعدا كلو بصير إلو طعمة
بس طول مانك علقان بمقبرة اللغة الإنجليزية "التالتة" رح تضل حاسس في مية كيلو رابصين على كتافك ليلاً نهاراً :mrgreen:

يا سيدي الله ييسرلك أمرك بالجامعة.... ويزيد ويبارك بجهودك النتية...وشكراً لدعوتك لمدير منتداك.... لازم يكون في سبب مهم وراء استقطاب هيك شخص
رح حاول اكتشفو من ردودو :wink:

وشكراً لتعريفك عن نفسك هون

Yamen,
يعني كنت على وشك غنيلك يا أهلا والله بهالطلة.. بس رجعت غطيت.... :evil:

هادا ويامن يا ناس وعدنا برد.. وعالوعد يا كمون

لاحظ أنو أنا وأسامة ما بطلنا نقار وأنت بطلت تطل...دليل أنو الناس على العهد باقون وأنت للعهد قاطع :mrgreen:

بانتظار العودة الميمونة يامن... بس بدي أفهم كيف كنت بيوم من الأيام شخص مافي آرتين بدونو وهلأ بتزورنا كل سنة مرة

Celina · **Publié:** Lun Mai 17, 2010 12:10 am

الملاك,

Citer:

ليش يا ربي مين بحب الخيانة؟

Citer:

لك مين بحب الكذب؟

وحياتك في عالم بيموتو بالكذب والخيانة وأنا صادفت هيك ناس وإسآل مجرب ولا تسأل حكيم وكيف إذا كان مجربنا حكيم :mrgreen:

Citer:

أنا بحب الكذب

شفتي كلامك بيأكد إنو في عالم بتحب الكذب

Citer:

هادا رأيي... وبدك تتحملي عاد...

رأيك عراسي وعراسي حارتك ورح أتحمل بيعيني الله :mrgreen:

خالد الهبل · **Publié:** Mer Mai 19, 2010 2:15 pm

الملاك,

Citer:

وشكراً لتعريفك عن نفسك هون

هلأ أكيد هاد شرف كتير كبير إلي أني عرف عن نفسي بهيك مجتمع جميل

Citer:

وشكراً لدعوتك لمدير منتداك.... لازم يكون في سبب مهم وراء استقطاب هيك شخص

أول شي عفواً..

تاني شي.. ما بعرف بيكفي إذا كان سبب دعوتي لمحمد عصام أني بحب آرتين.. *ممم

شكراً مرة تانية أختي

a7mad alsibai · **Publié:** Sam Mai 22, 2010 7:51 am

محمد عصام,

ليش ما زكرت انو صوتك حلو كتير وخاصتن بالطرب الحلبي :wink:

..

تبئا شي مرة خدني معك عالصين من لما كنت صغير كنت ألو لأبي خدني عالبلد يلي في كل العالم بيشبهو بعضون :mrgreen:

خالد الهبل,

لازمك خرزي زرئا يا أبو الخل

Latest Posts

Règles du forum

مرحبا...أنا الملاك ..... فمن أنت ؟؟