اليوم الحمد لله من أوله رااااااااايق طبعا فقت شي 11ونص وستغربت انو ماحدا زعجني اليوم.
عملت جولة عالبيت لقيت كم شغلة ناقصة   صلحت الموضوع بسرعة ومضيت ...
هلأ الشي الحلو اني اليوم طلعت مع الشلة المسا (توديعة قبل رمضان وقبل سفري )
ووصوني على شغلات من هنيك (ماحجبلن ياهن )ههههههههه
وكتير انبسطنا وخاصة كانو الشلة التانية برى بالصدفة ...
يلا  خلصت يومياتي قبل رمضان
ومنبلش بكرا بحلقة جديدة

عنجد أحيانا بحس حالي متشائم دائما ....بس والله وضعي مو طبيعي يا جماعه ...
الأسبوع الماضي كلو عم أشتغل ببيتنا يلي بحلب وعمظبطو ونزلت خميس وجمعه وهلق أرجعت ....
هلق لهون الوضع شبه مقبول مع أنو قاعد لحالي بحلب وفي حرامي الله يرضى عليه سارقلي صحن الديجتال....وما في شي أتسلى فيه غير قصص وروايات لعزيز نيسين

بس شو مشان انو بدي ضل عم أشتغل ليوم الأربعاء وانا لحالي بالبيت والدنيه رمضان  
لأ وبدي أنزل ودّع اهلي لأنهم رايحين عمره فكمان رح ضل لحالي بحماه وأفطر لحالي  
بصراحه الله يعينني على هالرمضان ...
لأوزياده على هيك مبارح قريت انو لغو الموائد الرمضانيه ....يعني حتى اذا نويت أفطر مع عالم فممنوع ...
لك آآآآآآآآآآآه رمضان لحالي والعيد لحالي وفوقها شغل وتعب  
فلهيك ...
نداء مني لكل أعضاء آرتين يلي بيعرف يطبخ يبعتلي أكل أو يعلمني كيف لأنو انا شاي ما بعرف أعمل  

Kmaلك شو مشان وضعك الي بزعل ؟؟؟؟عنجد زعلتني مافي أصعب من رمضان والواحد لوحدوا

خلص نحنا بارتين كل واحد بيبعتلك طبخة شكل كل يوم

شو يا أعضاء عم احكي عنكن     كفو ؟؟؟؟

نوارة,   عصام,   MÖØÒÕNL!GHT,  أول شي حابب أتشكر دعمكم وبالفعل ما في أصعب من انو الواحد ياكل لحالو .....هي اذا لقى شي يتاكل ....لأنو مبارح جبت حواضر (مرتديلا وجبنه دهن وكم شغله ....ومأمن فيهم لأنو وقت الأفطار ما كتير بحب آكل ...فالمهم اجيت اليوم فتحت البراد طلعو رايحين وطلع المبلط يلي كان عندي مبارح آخد راحتو عاللآخر...فلهيك انا مع اقتراح نواره ...وانا من جهتي فكفو آكل ....

أما بالنسبي ليومي فكان قمة في التعب والعصبيه والخوف ....
التعب أجى من الشغل مع العمال وواتصل بهاد وخود موعد مع هاد ....
اما العصبيه والخوف فهي قصه تانيه تماما ....
بداية القصه بلشت مبارح وقت اتصلت بواحد بنفض مداخن الصوبات ...
وانا بعمري لا نفضت صوبه ولا بعرف شو بصير لأنو ببيتنا بحماه في شوفاج وما وعيت على حدى بينفض صوبه فالمهم كانت حالة البيت مأساويه ....
وكفاية القصه تمت اليوم وقت جبت واحد مشان يركب ديجتال ويبدل التلفزيون فأخدتو عالسطوح وقلتلو بدك تركبلي صحن واذ بتطلعلي وحده وبتبلش تقاتل وتعيط وانا ما عرفان شو القصه وبتقول والله ما تركبو شي هون لأكسرو وتحكي وتعيط وانا ما عم أفهم شي .....طلع بالأخير انو يلي عم نضف المدخنه مبارح نافض شحوار على بندوره محطوطه عالسطح ...فانا ما عدت اعرف شو أحكي وهيه عم تعيط وتبهدل فأندرت لعند أبو الديجتال لقيتو هربان فانا ما كان بدوري غير اني حذيت حذوو وفشحتها .....
وما عرفت كيف وصلت عالبيت لأنو الركيض عالدرج مرافق بعياطها والجيران كلهم عم يطلعو ....
ووقت وصلت عالبيت أعتبرت انو القصه انتهت ....واذ بعد بشي ساعه بيندق الباب وبتدخل الجاره وبتبلش عياط وانا عم حاول هديها وقلها اي شي انا جاهز ادفعو ...
واذ بينزل الأبن متل السهم وأول ما شفتو أتخيلتو جبل أو بارجه بس بني آدم مستحيل !!! وببلش عياط وبعيط عأمو انو انقلعي عالبيت وبيدفشها عالدرج !!!!!
ومن هون اكتشفت انو مجنون وما معو مزح وبعد ما خلص من امو اندار لعندي وسحب شي من جيبو الخلفي ...شكلو بيشبه مقص الخياطين (هاد الكبير )وبدو يهجم ....ما لقيت غير الكهربجي وتبع الصحيه ركضو ودفشوني لجوى البيت وانا هون أشتغلت غريزتي الحمويه انو بعدولي عنو شو بدو يقاتل ومدري شو ....
المهم بعد بشي دقيقه ما سمعت صوتو وبيسمحولي أطلع من الغرفه واذ بلاقي أخوه ....شب من جيلي وشكلو منطقي خرج التفاهم معو  وصرت حاكي بالمنطق وقلتلو والله يا اخي انا ما طلعت عالسطح وبعمري ما طلعت عالسطح غير اليوم وخليت أبو الصوبات يدق عالجيران مشان ياخد المفاتيح  وما الي خبر شو صاير فوق ...فما كان منو غير بلش يحسب شو قيمة الأضرار وينبهني انو لا تورجي وجهك لأخويي ولا لأمي لأنو رح تروح دبلكه ...
وهلق قبل ما اجي لهون طلعت عالهسي مشان أعرف وين بدي ركب الصحن ...واذ هالعالم من كتر ما ....... ما مخلين ولا بني آدم يركب صحن ديجتال فوق بيتهم والعالم كلها مركبه الصحون فوق بيت الدرج  ..من خوفهم من هالعيله على هوى ما فهمت من جارتنا التانيه ...
المهم لهلق عم استنى شي مطعم يفتح مشان آكل شي لقمة ...
ورمضان كريم
   

ياااااااااحرام KMA والله وضعك مأساوي انشالله شدة وتزول  بس والله فقعتني ضحك صح الموضوع مابضحك بس ....لكن قلتلي كفو تاكل ؟؟؟؟اي خلص معناها كل يوم من وصلك ديلفري عالبيت  

اليوم انا كان النهار كلو تعب بما انو اول يوم صيام
فقت متأخرة يعني شي 12ونص وبلشنا شي نشتغل بالاكل شي نشتغل بالولاد الي هون
والطول النهار الولاد يخبطو بهالبراد (قال هني زغار وجاعو خطي) ولا كإنو في حدا بالمطبخ صايم وعم يعاني من وجودن حاصله خلصنا طبخ وفطرنا وبلشت طقطقة شو بلاقي حبوب وجع راس هههههههه(الظاهر برمضان بدو يصير معي ادمان) وهلأ بلكي بطبق حدا من أهلي مشان اطلع شي مشوار

وهيييييييك هلأ لسا ماخلص اليوم منشوف بعدين لوين بدنا نوصل
   

يعني إذا بدي احكي بدي احكي عن أجمل 3 أيام قضيتن هالصيفية بسوريا
تنويه ( طبعا بعد ما راحو أهلي )   تمنيت حدا ياخدني ويجيبني و يبسطني قبل ما يصير رمضان مشان املي هالفراغ اللي عندي

رح احكي نهاري من أول مبارح

أول يوم : روحتي عالمطعم أنا وجدي وخالي وسهرتنا هنيك وضحك وضحك ووو.
تاني يوم : روحتي كمان عالمطعم نفسو بس مع جدي وولاد خالي وابن خالتي وأهم شي اللي عازمنا البدر    و كانت سهرة بتجنننننننننننن بمعنى الكلمة .
وتالت يوم اللي هو مبارح : أحلى يوووووووووووووووم لسبب خااااااص جدا جدا بس الروحة عقاسيون ولا أحلى من هيك خصوصا مع العالم اللي بتحبن وعيلتي كمان ومع إنو بآخر السهرة صار في بعض التنقير والحكي يلي شلتو من بالي منشان ما انقرق وعيش يومي بكاملو كان يوم لا ينسى  


أول يوم رمضان :
كان كتير صعب علي أنا مو شبعانة نووووووووم وفقت من الصبح مشان الروحة عالمعهد و رجعت تعبانة واجت المي بقا قمت شطفت وغسلت وتحممت واشتغلت كتييييير أففففف طالعت فرق مبارح   ونمت شوي وبعدين فطرت والحمد لله .

حابب انهي يومياتي تبع اليوم بما انو كان اليوم مشوق ....
بعد ما اطلعت من النت رحت عمحل وأفطرت وأرجعت عالبيت واذ بيتصل فيي معلم الديجتال وبيعتذر عن تركيب الديجتال ...لأسباب معروفه ...
فانا هون كان لازم لاقي حل مع جارنا ...فما كان مني غير اني طلعت وسلمت كفني متل ما بيقولو المصريين ..ووقت فتحلي الباب قلتلو بدي أشرب عندكم كاسة شاي لأنو ما عندي شاي ودخلت ...
طبعا هون كان في معركه أخيره قبل نهاية الحرب يلي كانت نتائجها انو يمنع عليي تنفيض المدخنه الباقيه قبل ما تخلص البندوره وعدم تركيب ديجتال كمان قبل ما يشيلو البندوره وهذا يعني انو يمكن ما لحق أنزل ودع أهلي ...أو انزل وارجع أطلع عحلب مره تانيه وهادا المتوقع ...
ورمضان كريم