هلا وغلا بالجولة الأخيرة
اقتباس:
1- احمد الدالي.... انت حبيت بنت من الريف و هي حبتك و عايشين قصة حب رائعة. ... بيوم من الأيام عرفو أهل البنت و إجاك تهديد منهم إنو إذا بتبقى معها رح تنقتل انت و بنتهم و أهلها صعب أنو يعطوا من برا العيلة لأنو بكل بساطة هيك تقاليدهم و في شغلة انو القتل عندهم سهل كتير و الدم بالنسبة الهم رخيص و قتل البنت شيء عادي بالعائلات عندهم...يا ترى شو بكون تصرفك ؟
حلو كتير....يا سيدي أنا بمسلسي (لا تسألوني ليش بدك تتجوز) سألت هيك شي..ووقتها جاوبت:
إنو معالجة هيك غلط بكون بغلط أكبر منو وهو الخطيفة إذا كانت مكتملة مفقوماتها..
اقتباس:
2- أحمد الدالي..... إنت حبيت بنت من أهل الشام الأصليين و بقيتو فترة طويلة .... البنت من عيلة كبيرة و غنية كتير و أهلها ما بيعطوا غير لواحد من أهل الشام .. يا ترى انت مستعد انك تقلها للبنت انتظريني و خلي الأيام تحكم ؟؟ أو بتضحي و بكون قرارك الانفصال ؟؟؟ طيب إذا كان قرارك الإنفصال و هي طلبت منك أنو ترجعوا و ما وافقت على طلبك و قالتلك حبنا أكبر من كل شي شو بكون ردك و شو بكون قرارك ؟؟
لا أبدا ما بقول لحدا ينطرني...ما بعرف شو الزمان مخبيلي...
الشي يلي فيني اعملو هو إني بقول للبنت أنا معك طالما انت معي..بس لا تستتنيني وتضحي مشاني...خلي موضوعنا للقدر..أنا بحب ضحي مشان غيري..بس ما بحب حدا يضحي مشاني...
بس اذا هي طلبت انو نرجع لعلاقة بعد الانفصال أكيد بضحي مشان هالشي لآخر لحظة..لأنو هون الموضوع صار تضحية لرغبتها...
اقتباس:
3- أحمد الدالي..... إنت عرفت بنت من الحسكة بالجامعة ... بعد فترة حبيتو بعض و بقيتو أكتر سنتين .. هلأ حان الوقت أنو تطلب ايدها و انت صرت قادر على الزواج ... اتصلت أمك بأمها فاشترطت أمها انو تعيشو بالحسكة لأنو البنت وحيدة على أهلها و ما بتقدر تخليها تعيش برا الحسكة .. أبو البنت صاحب شركة كبيرة وعرض عليك أنو تستلم عندو وظيفة براتب محترم و يعطيك بيت بالتقسيط المريح جدا ... بس أمك رفضت رفضا قاطعا و قالتلك انو إذا بدك تطلع تعيش برا طلاع بس أنا ماني رضيانة عليك ... كيف ممكن تقدر تقنع امك ..؟؟ و إذا ما اقتنعت يا ترى شو بكون قرارك ؟؟ بتضحي بحبك و بمستقبلك و بتقول رضا أمي فوق كل شي ؟؟ أو بتقول بكرا لما رح تشوفني كل يومين تلاتة عندها و لما رح تشوفني عايش مبسوط رح ترضى ؟
الله يسامحك للحسكة شلفتني....كنت خليها عالدير
..
أنا يا صديقي شغلة زواجي ما بخلي حدا يتدخل فيها لأنو هدا مستقبلي الي...
أنا بهيك حالة ما بلجأ لا لأهلي ولا لأهلها...بشوف هي شو موقفها وعلى اساسو بقرر...واذا كان موقفها مع أهلها فهالشي ما بناسبني أبدا...مافي نصيب ومننطر الألم...
..بعمل كلشي بدي يا بس مو على حساب زعل أي حدا بخصني...
اقتباس:
4- الساعة 1 بالليل ... صرلك فترة طويلة كتير ما شفت البنت يلي بتحبها و حابب إنك تشوفها .... بيتهم الو بلكون عالشارع و أول طابق .. يعني بتقدر تروح و تشوفها ..اتصلت فيك و قالتلك انا مشتاقتلك كتير و بدي شوفك و صارت تبكي ... إنت طبعا بتقدر تروح بس المشكلة أنو في شب بالحارة شافكم مرة قاعدين مع بعض بالحديقة و هادا الشب بيتو بالحارة و بكون دايما قاعد برا عالباب مع شلة شباب من الحارة .. يا ترى شو بكون جوابك على طلب حبيبتك ؟؟
عاملها كتير لهلشغلة
بس مافي شب ناطرنا في أخوها جارنا
..بس على احتمالاتك...برفض اطلع مو خوفا عليي أنا..خوفا عليها ولو كان هيي بدها هدا الشي..ومتل ما قلتلك بضحي مشانها وما بخليها تضحي مشاني...
اقتباس:
5- بتآمن بأنو الحب الأول ما في بعدو ؟؟ أو كل قصة حب هي عبارة عن دولة بحد ذاتها و تخضع لقوانين و شروط مستقلة و تمتلك جيوش و قوافل العاطفة متلها متل يلي قبلها ؟
أكيد أكيد الحب الأول مافي بعدو...لأنو الانسان بيعطي للطرف الآخر كل شي..
وما بضل إلا القليل لحب تاني....
اقتباس:
6- العذاب غريزة مقترنة بالحب .... هاي جملة مشهورة و بتتردد على أسماع الكتيرين مننا ... يا ترى أحمد الدالي لما عاش الحب ... مين كان الطاغي ؟؟؟ العذاب أو الحب ؟؟
الحــــــــــــــــــــــــــــــــــب
طيب .... الأسئلة الفرضية انتهت .. و هلأ إجا دور الأسئلة الشخصية و الحقيقة يلي بتمس شخصيتك و حياتك الشخصية ...
اقتباس:
7- أحمد الدالي كام مرة بيعتبر نفسو عاش قصة حب ؟
مرة واحدة فقط...
اقتباس:
9- هل إنت قادر على إنك تحب مرة تانية ؟؟ و إذا كان جوابك أي ... يا ترى رح تقدر تعطي بنفس المقدار و تحب بنفس العواطف ؟
أكيد قادر حب مرة تانية وهالشي مو بإيدي...بس ما رح اقدر أعطي نفس مقدار العطاء يلي عطيتو للحب الأول...
اقتباس:
10- إذا سمعت أنو هلأ حبيبتك متقدملها عريس كبير و غني و أهلها موافقين لأنهم لقوا دفتر مذكراتها يلي كاتبة فيه كل شي عنك و عنها و كاتبة عن اللقاءات يلي كانت تصير .... شو بتكون ردة فعلك ؟
ما فيي اعمل شي ابدا...ممكن قدملها اعتذار واطلب منها شي بتحب اني اعملو مشانها..ورح كون جاهز لتحمل المسؤولية كاملة...
اقتباس:
11- لاحظنا من ردودك انو عذابك بعد الفراق كان كبير كتير و من خلال جولة البحث عن معلومات يلي عملتها حولك عرفت أنو الفراق كان سبب بتحويلك لإنسان تعيس و كئيب من الدرجة الاولى و حزنك فاق كل الحدود .. يا ترى انت ندمان لأنك زعلت كل هالزعل ؟؟ أو إذا رجعتوا و رديتو افترقتو رح تزعل بنفس المقدار ؟
لا أبدا ماني ندمان..ويمكن كان حبي بيستحق اني اتعزب مشانو أكتر من هيك..
بالنسبة للرجعة ما برجع لأنو رح تضيع قيمة العذاب يلي تعزبتو...ورح يخف حبي لإلها قبل ما يخف مقدار زعلي لمرحلة الفراق التاني..
اقتباس:
12- الهدايا بين العاشقين بتكون بمثابة ذكرى حلوة إذا بقيو مع بعضهم أو إذا افترقو نتيجة الظروف و غصب عنهم و بتكون ذكرى مؤلمة لما بكون الفراق نتيجة خيانة أحد الطرفين .... ياترى ليش رجعت كل الهدايا لحبيبتك بعد الفراق مع انكم افترقتو نتيجة اتفاق و مجاراة مع الواقع ...؟؟؟
ضحك على النفس مو أكتر...ظنيت انو الذكرى متعلقة بالهدية..بس الذكرى محفورة حفر ... يمكن كون رجعت الهدية بس ما حسنت استرجع قلبي منها
اقتباس:
13- النسيان نعمة كبيرة و لولا هالنعمة كانت تراكمت الذكريات الأليمة في العقل و وصل الإنسان لمرحلة الجنون .... سؤالي الك ... ايمتى بعاند النسيان أحمد الدالي ؟؟ و بدي منك موقف او تجربة عاندك النسيان فيها و لما طلبتو ما لقيتو ؟؟
آخ من نعمة النسيان...أنا بهالمرحلة معاندني النسيان معاندة فظيعة وفي محاربة بيني وبينو وفي تحدي..ولليوم هو الغالب..
بتجربة الحب أنا ما طلبتو للنسيان أبدا...لأني ما بقدر عيش بدون الذكرى..
مافيني ابدا نهار جديد بدون ما استرجع صورتها وضحكتها
اقتباس:
14- لو قلتلك انو الكلمات يلي رح تكتبها هلأ حبيبتك عم تتنظرها و بدها تعرف شو رح تقلها .. بدي منك 3 أسطر تكون بمثابة تفريغ لقلبك بمشاعرك اتجاه حبيبتك بالوقت الحاضر و توجه الكلام الها يعني بصيغة المخاطب ...
سؤال ينتظره الجميع والكل قال انو شلون رح تجاوب عليه..يا أخي عالم بتحب الفضايح
::
قبل ما بلش.. كنا متعودين على الرسايل باللغة العربلمية..يعني كتابة انكليزية بس بلغة عربية لأنو جوالها ما كان في عربي...رح اكتب واشرح:::
kefoo>>mesh 3am shofo
ishta2telek kteer kteer w shte2et lamasgatek el 7elwe mtlek
3ene elshmal sarlha kam yom 3amtref..mama 2alet mn alargele..w talbat mne etrkha yomen..taraktha ma mshe el7al...
rfe2e 2al mn 2elet elnoom...nemet yomen mne7 w ma mshe el7al..ma7ada 3erfan ino 3youne meshta2a lashoftek
marra ba3atele resaleh katbe feha ..yala 2om sale elsebe7 wd3ele..salet wda3etelk..w hala2 kaman r7 e3teber ba3etele nafs el resale..ra7 2om sale w ed3elek..
t.care...bayatooo ya 7ayatooo
الشرح: كيفو ..مش عمشوفو...اشتقتلك كتير كتير واشتقت لمسجاتك الحلوة متلك..عيني الشمال صرلها كم يوم عمترف..أمي قالت من الأرجلية ,زطلبت مني اتركها يومين..تركتهاا وما مشي الحال..رفيقي قال من قلة النوم..نمت يومين منيح وما مشي الحال..ما حدا عرفان انو عيوني مشتاقة لشوفتك..مرة بعتيلي رسالة كاتبة فيها قوم صلي الصبح ودعيلي..صليت ودعيتلك..وهلق كمان رح اعتبر باعتيلي نفس الرسالة..رح قوم صلي وادعيلك..ديري بالك على حالك..باياتووو يا حياتووو
صار بدها الشغلة نومة عميقة بعد هالاستجواب الصعب..حسبت حالي بفرع العشر تسعات..هههه
ثائـــــــــــــــــر شكــــــــــــــرا على الاستضــــــــــــــافة
عذبتك كتير معي الكرسي..أسئلتك حلوة وجريئـــــــــــــــــــــة..
بهنيـــــــــــــــــــــــــــــــيك على قدرتك على التحيليل والبحث العميق يلي بتعملو لكل ضيف