الـــيــــوم ابراهيم محمد على كرسي الاعتراف

ابراهيم محمد

A. Al-Ibrahim,

أهلا صديقي علاء والله منورنا يا غالي

هاي هيك كم سؤال على الماشي وعلى فكرة هدول أصعب أسئلة مرو علي لحد الآن

بس كرمال عيونك يا حبيب رح جاوب عليهم بقدر استطاعتي

اقتباس:

1- عطيني رأيك بجامعة تشرين (ايجابيات و سلبيات)

والله يا غالي أول ما فتت على جامعة تشرين كنت فكرها الجامعة المثالية بسوريا ودامت هالفكرة معي خلال السنة الأولى كاملة ونص السنة التانية وبعدين بنظري طغت السلبيات على الايجابيات اللي فيها مشان هيك أنا حالياً عمفكر وبتمنى انو يكون فيني انقل بآخر سنة لجامعة البعث على أمل انها تكون أحسن وأنا بظن انو أحسن لأنها بتضم هالنوعية من الأشخاص اللي قابلتون بآرتين

اقتباس:

2- بعد أربع سنوات من العمر في مدينة اللاذقية. . تأثرت بالحياة فيها؟ قصدي خلتك الحياة باللاذقية تغير شئ من طباعك؟

طبعاً صديقي تأثرت خلال الأربع سنوات بشغلات كتيرة وهالشي طبيعي لأنو عاشرت ناس من طبقات مختلفة ومن محافظات مختلفة كمان وتعلمت عادات تانية ولما دمجت الشي اللي أنا تعلمتو خلال حياتي كلا مع الشي اللي تعلمتو خلال الأربع سنوات اللي مروا عملو تغيير كبير بحياتي من خلال طريقة معاملتي لمختلف أنواع البشر

اقتباس:

3- شو رأيك بأحمد العيسى؟ (بصراحة)

مع انك بتعرف منيح شو رايي بالدكتور أحمد العيسى مع ذلك رح قلك

يا غالي أنا بظن انو ما اجا على جامعة تشرين أفضل من الدكتور أحمد العيسى بيتضمن هالشي الفترة اللي كان فيها عميد للكلية مع انو للأسف أنا ما لحقتا بس عرفت كتير شغلات عنها
الدكتور أحمد العيسى بالاسلوب الرائع اللي بيتبعوا خلال المحاضرات بخلي الطالب اجباري عنو يحضروا وأكبر مثال انت بتعرفوا بالسنة الأولى والسنة التانية لما تشوف الواقفين أكتر من القاعدين واللي على باب المدرج أكتر من اللي بالمدرج وأنا من جهتي مع انو ما ظل عندي مواد الو لساتني بحضرلو محاضرات وبالفصل الأول حضرتلو لا يقل عن 4 أو 5 محاضرات
والدكتور أحمد العيسى لو ظل يرسبني بمادتو طول فترة دراستي ما رح أزعل لأني بعتبرو دكتور بكل ما تحويه الكلمة من معنى
باختصار دخيل ربو أحمد العيسى

طولت كتير ما هيك بهالسؤال بس اعذروني يا جماعة علاء ضربني على الوتر الحساس عندي :mrgreen:

اقتباس:

4- بعد عدة طعنات من أفضل أصدقاءك (بتعرف مين بقصد) لساك بتآمن بالصداقة بقوة متل أول؟

نعم يا غالي لساتني بآمن بالصداقة وأقوى من أول واكبر دليل المجموعة الرائعة من الأصدقاء اللي أنا التقيت فيهون هون بآرتين وبحكيها قدام الكل انو أنا بعتبرهون ذخيرة حياتي من الصداقة وكمان من ناحية تانية يا غالي ان خليت بليت :wink:

اقتباس:

5- شو رأيك بشعر نزار قباني- الغزلي و السياسي؟

نزار قباني مات ولم يولد من يشبهه بعده
أنا بعشق شعر نزار قباني كلو من دون استثناء ان كان السياسي أو الغزلي بس بنتقد فيه القصائد اللي بشهر فيها كتير واللي بتوصل معو حد الكفر والالحاد
اما من بقية الجوانب من ابداع باختيار مواضيع القصائد والكلمات المنتقاة وطريقة التركيب اللي بيتبعها ما في عليها أي حكي لأنها اروع من رائعة

اقتباس:

6- شو رأيك فيني ؟ !! :mrgreen:

انت منيح لولا ال 999999999999999999 مليون علة اللي فيك :mrgreen:

بمزح معك يا غالي والله انت واحد من القلة القليلة اللي بفتخر كوني عرفتون بحياتي الجامعية وانت بتعرف انو أنا زعلت كتير لما انت نقلت من تشرين بس بعد هيك أنا عذرتك بعد كلشي شفتو بتشرين وانشا الله بتدوم صداقتنا يا غالي طبعاً اذا انت ما عندك أي اعتراض

اقتباس:

حظا أوفر في المرة القادمة :mrgreen:

سأحاول مرة أخرى واخرى وأخرى

حبيبي علاء اسئلتك كتير حلوين وصعبين كمان ومع انو كنت تعبان والساعة 3:30 الصبح ولسا الي يومين مو نايم فحبيت جاوب عليهن على أقل من مهلي

تحياتي صديقي

ابراهيم محمد

Safwat,

اهلا فيك من جديد يا غالي

اقتباس:

امين يا رب

تسلم كلك زوء حبيب قلبي

اقتباس:

بشو بتفكر قبل ما تنام

انت بهالسؤال أثرت قضية عندي وما رح تنتهي ابداً لأنو كل ما بدي نام بدي اتذكر بشو لازم فكر وبشو مو لازم اني فكر
بس مو معناتو انو أنا قبل النوم ما بفكر
أنا بفكر بكتير أشيا منها انو شو عملت اليوم وشو بفكر انو أعمل بكرا اذا ضليت عايش وبيخطر على بالي مشاكل أو أحداث قديمة وكتير شغلات بس ما في شي محدد بينحصر تفكيري فيه

اقتباس:

بتدمع عيونك الحلوة ؟؟؟؟؟؟؟؟

اي واليوم تحديداً دمعو عيوني وبكيت :arrow:

اقتباس:

مشتاق لمين هلق ؟؟؟

مشتاق للي تركنا من تاريخ 6/5 السنة الماضية مع انو ما في أمل انو شوفو مرة تانية بس مشتقلو كتير وكل يوم بفكر انو ممكن أحكي معو مرة تانية لأنو لهلأ ما مستوعب حياتي من دونو اللي هو ( أبي ) الله يرحمو

شكراً صفوة

Odysseus

ابراهيم محمد,

اقتباس:

وعلى فكرة هدول أصعب أسئلة مرو علي لحد الآن

لو أعرف هيك كنت كترتون شوي :mrgreen:

اقتباس:

جامعة تشرين كنت فكرها الجامعة المثالية بسوريا

ابراهيم و هي هيك فعلا. . انت بكرا ان شاء الله بس تنقل على جامعة البعث رح تشوف الفروق الكبيرة بمستويات الدكاترة و الطلاب . . هون بالبعث مافي علم . . في شي اسمو بصم و علامات . . انت مزعوج من جامعة تشرين لأنو صعبة . . بس هونيك في علم بمعنى الكلمة . . هونيك في ماهل السودة . . في أحمد العيسى . . في ياسر ابراهيم . . و . . و . . بكرا بس تنقل بتشوف مين في هون . . مارح حدد اسماء ..

اقتباس:

يا غالي أنا بظن انو ما اجا على جامعة تشرين أفضل من الدكتور أحمد العيسى

أنا بظن انو سورية كلها ما أنجبت متل أحمد العيسى . . دكتور يضاهي أفضل دكاترة بريطانيا و أمريكا حتى . .

اقتباس:

اللي كان فيها عميد للكلية

هي الفترة بالذات اسطورة . . لازم تنحط بكتاب و تتدرس لكل الدكتارة الي بدون يستلمو عمادة أي كلية بسوريا . .

اقتباس:

طولت كتير ما هيك بهالسؤال بس اعذروني يا جماعة علاء ضربني على الوتر الحساس عندي

ابراهيم . . مهما يكن حبك لهالدكتور ما بيعادل نص حبي الو . . في أكتر من اني قول هو قدوتي بالحياة؟
بالمناسبة . . الدكتور أحمد نصحني ما انقل لجامعة البعث .. . لأنها حسب حكيو " مانا جامعة" و كلامو صحيح . . بس أنا محتاج لمعدل و جامعة تشرين ما بتعطيه !
و كمان شغلة . . أنا لساتني لهلق متابع للدكتور أحمد العيسى . . ببعت اشتري محاضراتو من اللاذقية كل ما صارتلي فرصة . .

اقتباس:

نزار قباني مات ولم يولد من يشبهه بعده

صحيح . . و أتوقع أنه لن يولد من يشبهه . . فلم يبق للشعراء الأتين شيئا يكتبون عنه أو اسلوبا يبتدوعنه أو تعابير يزينون بها قصائدهم . .

اقتباس:

بمزح معك يا غالي والله انت واحد من القلة القليلة اللي بفتخر كوني عرفتون بحياتي الجامعية وانت بتعرف انو أنا زعلت كتير لما انت نقلت من تشرين بس بعد هيك أنا عذرتك بعد كلشي شفتو بتشرين وانشا الله بتدوم صداقتنا يا غالي طبعاً اذا انت ما عندك أي اعتراض

أنا الي بفتخر بمعرفتك . . و انت انسان نادر جدا و أنا الي نظرة بالشخص . . بتمنى يكونو كل الشباب متلك و بتصيرؤ الأمور بألف خير . . و أكيد أنا رح ضل صديقك .. الى ما لا نهاية . . !

اقتباس:

تحياتي صديقي

تحياتي لك أجمل صديق

nadeem

هلأ اول شي انا متفاجأ متل كتير عالم انو كيف صاحبنا قدر ينفد من الكرسي للمرة التالتة على التوالي بس بسيطة
تاني شي ابراهيم كيفك مبروك الكرسي
عندي كام سؤال بتمنى يكونوا ظراف
بحسب مافهمت من الاجوبة انو انت بتشتغل بمحل نت واغلب وقتك بتكون عامل جولة بين المواقع والمنتديات بقا من خلال تجربتك اينوا احلا منتدى انت مشارك في طبعا غير ارتين لانو مافي احلا منو
السؤال التاني اي مادة بستمتع بدراستا وليش
السؤال التالت شو فريقك المفضل محليا وعالميا
وشكرا *ورود

ابراهيم محمد

nadeem,

اهلا فيك يا غالي أسئلتك ظراف كتير مشان هيك رح جاوب عليهون

اقتباس:

بحسب مافهمت من الاجوبة انو انت بتشتغل بمحل نت واغلب وقتك بتكون عامل جولة بين المواقع والمنتديات بقا من خلال تجربتك اينوا احلا منتدى انت مشارك في طبعا غير ارتين لانو مافي احلا منو

ممممممممم خايف اذا حكيت انو يعتبر هالشي اعلان لمواقع تانية ويقوم الجنرال مانجر فارس يحذفلي المشاركة
أخي أنا بشتغل بالمنتديات تركيب ودعم فني وأمور تانية انطلاقاً من الموقع اللي أنا مستلم الادارة فيه
بس معك حق أنا بحب آرتين أكتر من موقعي لأنو ناجح نجاح مذهل مع العلم انو أنا ما بنزل قصائد بموقعي لأنو ما بلاقي حدا يرد علي الردود اللي بشوفا هون

اقتباس:

السؤال التاني اي مادة بستمتع بدراستا وليش

لحد الآن وبعد ما مريت بالمواد استمتعت بدراسة المواد التالية:
Linguistics
Poetry مع انو شعر تانية صرت مقدما 5 مرات وبالخمس مرات بجيب فيها 49
Methodology

اقتباس:

السؤال التالت شو فريقك المفضل محليا وعالميا

الصراحة يا غالي أنا مو متابع لأمور الرياضة أبداً بس اذا صار وحضرت شي مباراة بكون بتابع تحركات الفريق الأقوى مسمعياً

شكراً لك nadeem,

تحياتي

عاشقة العربية

مبروك الكرسي ابراهيم .. وان شالله تنسط بهالأسبوع وتكتشف شغلات جديدة بحالك من خلال أسئلة غير متوقعة أحيانا
اسألني أنا

عندي كم سؤال .. ان شالله يكونو خفاف ع قلبك
1. شو هي اللحظة اللي اتخذت فيا قرار تغيّر اسمك ؟ وليش بتوقيعك وداعا يا شكسبيريان هل شخصيتك اختلفت بعد تغيير الاسم ؟
2. شو أكتر قصيدة كتبتا وحبيتا لدرجة أنك بتحفظ أبيات كتيرة منا
3. شو اللي أضافتو الأمسية الشعرية لابراهيم، وشو كان رأيك بحالك ؟ وبالأمسية؟
حابة أعرف رأيك كمتفرج ومشارك
4. مين هي أكتر الأقلام اللي بتلفت نظرك ببوح المشاعر؟
5. (قمري) أكتر قصيدة بحبا من كتاباتك .. كيف كانت نفسيتك وشعورك وقت اللي كتبتا ؟
6. هل من الممكن أن تأتي لحظة ويقول فيها ابراهيم .. لا امل بعد الآن ولا طموح ؟!

هدول الأسئلة اللي حاليا حبيت أسألك اياهن
ان شالله يكونو مانن مزعجين

Safa alaasi

ابراهيم محمد,
منور الكرسي والله ,عندي كم سؤال خفاف نضاف

1-كثيرا ما تحدثو عن shakespearean وهنا سؤالي عن ابراهيم محمد ,اسمك يحوي أسامي الأنبياء صلوات الله وسلامه عليهم ........ماذا يعني لك ذلك؟هل تفخر باسمك؟هل تراه عبئا عليك؟
2-ما هو الرجل برأي ابراهيم محمد؟و ماهي المرأة في حياة ابراهيم محمد؟
3-في حديثك عن والدك رحمه الله ,ماذا تفتقد ؟وجوده كسند لك أم وجوده كشخص عزيز؟
4-كيف ترى معظم شباب اليوم ؟الى اين يذهبون ؟هل يعرفون ماذا يريدون؟هل أكثرهم ينحرفون؟
5-كيف ترى حياة العزوبية ؟هل تحلم بالاستقرار ,أم أنك مرتاح بما انت عليه الآن؟
6-ما رأيك بالفتاة التي تبادر بالاعتراف بحبها لمن أحبت؟
7-اذكر لي كتابا أو أكثر قرأته فأعجبت به كثيرا أو حتى أثر بك وغير شيئا بشخصيتك؟
هذه فقط البداية :wink:

و الآتي أعظم :evil:

,ترقب قدومي *Thanx

Safwat

طيب

بالامسية كنت نجم .بس مستحي .هل خفق قلبك قبل الطلعة بثواني ؟؟؟؟

مع مين بتشرب اطيب كاسة شاي ؟؟؟

شو اللون المفضل عندك ؟؟؟؟

لو شفت ادامك ه الحادثة

بنت قامت من محلها و وقعت مبلغ مالي او قطعة عليها قيمة و اجت بنت تانية مسكتها و دحشتها بالجزدان ......شو بتعمل ؟؟؟؟؟؟

بتحب تغني مع حالك ؟ ايمت ؟؟؟؟

اذا سمعت غنية جديدة و حبيتها .بتسمعها كم مرة باليوم و اذا في شو هي ؟؟؟

شو رأيك انو انا مسجل من اول نهار فتح في المندى و لهلق ما قعدت ع ه الكرسي و بخاف اقعد علي من الاأسئلة الخاصة

عم كتر عليك .بس و الله لاني بحبك كتير و بعزك معزة كبيرة

ابراهيم محمد

ما كل واحد بفوت لهون بفقلي عندي كم سؤال انشا الله يكونوا خفاف ولطاف بس لما اقراهون بكون بدي اكتر من ساعة لجاوب عليهون

هدى, لك أهلا وسهلا منورتيني بهالكرسي المشكلة انو بدك تظلي واقفة لأنو ما في غير كرسي واحد أو اذا بدك بقوم انا وبخليكي تقعدي مكاني بس كمان انتي كنتي قاعدة مكاني من فتة لذلك اللي رح يصير انو أنا رح أقعد وانتي واقفة

يلا رح بلش جاوبك على أسئلتك القاتلة تقريباً

اقتباس:

1. شو هي اللحظة اللي اتخذت فيا قرار تغيّر اسمك ؟ وليش بتوقيعك وداعا يا شكسبيريان هل شخصيتك اختلفت بعد تغيير الاسم ؟

القرار اتخذتو بعد الأمسية تماما لما كنت سهران أنا وأحمد (أكروبات ) عندو بالبيت واتخذنا قرار انو نغير أسمائنا احنا التنين سوا
أنا بفتقد اسم شكسبيريان لأنو لما غيرتو في شخص بعزو وبحترمو كتير هون انزعج على الاسم وقتا أنا حسيت بالذنب وقلت بدي خلي اسم شكسبيريان بتوقيعي على طول
وأنا اسمي ابراهيم محمد علي حمد كنيتي مركبة (علي حمد) حبيت أقرن اسمي باسم أبي الله يرحمو وبس

اقتباس:

2. شو أكتر قصيدة كتبتا وحبيتا لدرجة أنك بتحفظ أبيات كتيرة منا

حبيت قصيدة ليتني كنت شاعراً اللي دخلت فيها للمسابقة وأنا حافظاً كلا وحتى أغلب قصائدي من النوادر انو أنسى أي بيت منهن

اقتباس:

3. شو اللي أضافتو الأمسية الشعرية لابراهيم، وشو كان رأيك بحالك ؟ وبالأمسية؟

مممممممم الأمسية أعطتني ثقة أكبر بنفسي خاصة انو أنا أول مرة بحياتي بوقف قدام عالم وبلقي شعر وبشبر بايدي
أنا بالأمسية كنت رضيان عن حالي بالشيء البسيط لأنو خربطت بالقصيدة التانية مع العلم انو القصيدة حافظا أكتر من اسمي بس تلبكت وما بعرف شو صار فيني
أما الأمسية كانت بجد رائعة وظليت فكر فيها ومبسوط فيها فترة كبيرة بعد الأمسية وفرصة انو التقيت بأشخاص وحكيت معهون كان متمني كتير انو شوفهون
بالمختصر كانت نقطة رائعة بحياتي انو شاركت بهالأمسية

اقتباس:

4. مين هي أكتر الأقلام اللي بتلفت نظرك ببوح المشاعر؟

في عند العميد ثائر مع انو نادراً ما ينزل شي بالمنتدى بس أنا قريتلو كم قطعة بجننو
وفي أوركيدا عندا موهبة فذة وصفوت شعرو راقي وريمة بقصائدها المذهلة ذات المضمون الرائع وتيماء كتير حلوين كتاباتا وفي غيرون كتير

اقتباس:

5. (قمري) أكتر قصيدة بحبا من كتاباتك .. كيف كانت نفسيتك وشعورك وقت اللي كتبتا ؟

أنا اكتشفت هالشي من ردك الطريل والتحليل الرائع والتعديلات المنطقية اللي حطيتيها بردك على القصيدة
القصيدة هاي يا هدى بالنسبة الي كمان الها ذكرى عزيزة لأنها اجت مع مجموعة أحداث ذكرها رح يسهرني الليلل بطولو وما رح خلص

اقتباس:

6. هل من الممكن أن تأتي لحظة ويقول فيها ابراهيم .. لا امل بعد الآن ولا طموح ؟!

اجت هيك لحظات وراحت واجا غيرا وقلت انو في أمل وهكذا كنت دور بدوامة مو عرفان اذا في أمل أو ما في أمل
والطموح نفس الشي أحياناً بتمر علي لحظات بكون فيني قول عن حالي انو أنا أكتر شخص طموح بالعالم بينما في أحيان تانية بنسى شو هو طموحي وما بعرف شو السبب اللي مخليني أتصرف هيك لما أعرف ببقى بقلك

بتعرفي يا هدى انو طول الطريق من درعا للشام وأنا فكر بأسئلتك ولو كنت شايف أسئلة صفاء برضو كان صار حادث لأنو من كتر التفكير فيهن الله أعلم شو كان صار

لأنو قويين كتير وحلوين وموفقة كتير باختياراتك

تحياتي لوجودك هنا

ابراهيم محمد

Safa alaasi,

شو يعني عمتنتقمي مني
اي شو عليه وانا جاهز ولنشوف آخرتا معك
وعلى فكرة كنت ناطر دخولك على الكرسي لشوف شو رح تسأليني

المهم انو أنا هلأ رح بلش بالاجابات

اقتباس:

1-كثيرا ما تحدثو عن shakespearean وهنا سؤالي عن ابراهيم محمد ,اسمك يحوي أسامي الأنبياء صلوات الله وسلامه عليهم ........ماذا يعني لك ذلك؟هل تفخر باسمك؟هل تراه عبئا عليك؟

أنا لما غيرت الاسم فكرت فيه لأنو بيربط اسمي باسم أبي رحمة الله عليه ومع ذلك بحس انو مسؤولية كبيرة انو أحمل هيك اسم يعني لازم كون قد المضمون اللي بيحويه الاسم من خلال أسماء الأنبياء أو من خلال أبي

اقتباس:

2-ما هو الرجل برأي ابراهيم محمد؟و ماهي المرأة في حياة ابراهيم محمد؟

فكرت كتير بهالسؤال واللي طلع معي هو التالي
الرجل هو نص المجتمع وممكن يكون خاين وممكن يكون رجل صالح وهالشي حسب البيئة اللي نشأ فيها
أما المرأة في حياتي هي أمي , أختي , صديقتي وهي النصف الذي يكمل الرجل في حياته فلا غنى لأي منهما عن الآخر

اقتباس:

3-في حديثك عن والدك رحمه الله ,ماذا تفتقد ؟وجوده كسند لك أم وجوده كشخص عزيز؟

أفتقد ركنا من أركان حياتي
أفتقد سنداً كان يسندني في كبواتي
أفتقد صديقاً ومعلماً وعالماً وداعية واماماً وحافظاً لكتاب ربه
أفتقد أحدهم كان فيما مضى ينير البيت الذي نقطن
مهما قلت عن فقدي لوالدي فلا أوفيه حقه لأنه فعلاً يا صفاء أكتر من هذا كلو :arrow:

اقتباس:

4-كيف ترى معظم شباب اليوم ؟الى اين يذهبون ؟هل يعرفون ماذا يريدون؟هل أكثرهم ينحرفون؟

للأسف بشوفون ضايعين ومو عرفانين الله وين حاطون لك حتى بتسألي الواحد انت شو بدك بقلك ما بعرف وللأسف كمان انو كتير منهون عمينحرفو لكن من ناحية تانية انو في فئة من شباب الأيام هاي عرفو شو دورهم بالحياة وصارو يشتغلو على هالأساس من جميع جوانتي معيشتنا

اقتباس:

5-كيف ترى حياة العزوبية ؟هل تحلم بالاستقرار ,أم أنك مرتاح بما انت عليه الآن؟

حياة العزوبية مرة وطايشة ومو مسؤولة وأنا بحلم انو استقر وعيش ببيت حس بمسؤوليتي الأكبر بهالحياة طبعاً بغض النظر عن مسؤوليتي الكبرى واللي تركلي اياها الوالد مسؤوليتي عن أهلي وأنا مو مرتاح حالياً على هالوضع بس الحمد لله على كل حال

اقتباس:

6-ما رأيك بالفتاة التي تبادر بالاعتراف بحبها لمن أحبت؟

من الناحية العامة انو البنت عواطفها أكبر من عواطف الشب وممكن انو حبس هالمشاعر والاحاسيس تسببلها شي لذلك بتصارح بحبها قبل الشب
بس أنا ما بحبذ هالشي لأنو بحب حلفظ على خجل الفتاة لنو هو الزينة اللي بتتزين فيها

اقتباس:

7-اذكر لي كتابا أو أكثر قرأته فأعجبت به كثيرا أو حتى أثر بك وغير شيئا بشخصيتك؟

كتاب لا تحزن للشيخ عائض القرني
كان أروع كتاب قرأتو عجبني كتير وأثر فيني كتير وغير شخصيتي كتيييييييير مو بس شوي لأنو في كتير أحيان بحس انو انكتب كرمالي أنا مشان هيك كان هاد سبب التغييرات اللي طرأت على حياتي

اقتباس:

هذه فقط البداية :wink:

و الآتي أعظم :evil:

,ترقب قدومي *Thanx

انتي بتقبلي رشوة ؟ لأنو اذا بتقبلي أنا مستعد انو أرشيكي بشيك مفتوح بس انو لا بقى تفوتي على هالكرسي
لا وشو الباقي أعظم

تعبتيني وآنستيني

آخر المشاركات

الـــيــــوم ابراهيم محمد على كرسي الاعتراف