وأول شي انا بعتذر كتير لأني اتاخرت اليوم با الاجابة ...بس كان عندي حفلة لصباح فخري هون عنا بحمص ... وانبسطنا كتيييييير انا و الشباب الحمد لله
و رقصت كتير كتير كتير .. و حتى انو هلأ راسي حاسو رح يفجر ...
باسم الله نبدأ ... عبدالله,
اقتباس:
1- شو بيعنيلك القلب الطيب - وشو بيعنيييلك القلب الأسود ؟
القلب الطيب هو يلي بكون صاحبو انسان طيوب و متسامح وما بيبغض حدا و غير لئيم و أهم شي ما بظن سوء بالناس و بحب كل يلي حواليه و مو ضروري يكون انسان بيسكت عن حقو و ضعيف لا ... ممكن اذا جرحتو يتحول لوحش ... يعني القلب الطيب هو طيب مع الطيبين و الناس يلي بعاملو بطيبة ...
القلب الاسود ... هو يلي بكون صاحبو انسان مريض نفسا و عندو عقد نقص كتيرة و بكون غيور و بيحقد عالناس و بيكره كل الناس لأنو بفكر انو الكل بيكرهو .. اقتباس:
2-شو هو مفهوم الحقد يلي بتعرفه؟
انك تكره الناس و لما الحقود بيحقد على انسان بصير يتمنا انو يموت ادامو .. و ممكن انو يكون السبب فاضي جدا ..بس الانسان الحقود هيك طبعو ... بيكره جدا .. اقتباس:
3-الحياة معاملة يا ترى بتسعى لتكون معاملتك مع الناس حلوة؟
طبعا ..اكيد ... بس طبعا مع يلي بيستاهل اني عاملو هيك .. اقتباس:
4-سبق وإن ذكرت إنو لما بتروح بتنام إنشالله نوم العوافي بتفكر
بيلي زعلتن منك بنفس اليوم ليش ما بتحاول تقلل من إنو تتزاعل
مع الناس هدول وبتكون دايماً شخص مسامح وياترى بتحاول
تكون شخص مسامح؟
للأسف انا انسان غير متسامح و يلي بيغلط معي ..بينحط تحت اسمو خط اسود .. اقتباس:
5-أنا تأثرت معك إنو مالك أخ أو إبن عم ياترى بتسعى بكامل جهدك
إنو يحل صديقك مكان أخوك؟
بجوز الصديق يعوضك عن الأخ ..بس و لا الف صديق ممكن انو يحلو مكان الاخ ..
اقتباس:
6-من طريقة إجاباتك حسيت إنو إنتي إنسان عندك نوع كبير من
التكبر يا ترى بتحس هالشي بيفيدك وشو مفهوم التكبر عندك؟
بحياتها ما كانت الثقة بالنفس تكبر ...و يلي بيفهمها تكبر بكون الغلط منو .. اقتباس:
7-إنتي عندك نوع كبير من العاطفة والحب وقد تجاوز مساحة قلبك
الواحد تيرا وحسيت من خلال كلامك إنو عندك إستعداد تحب أي بنت
من أول نظرة يا ترى عندك إستعداد كبير لهالمحبة؟
اصلا انا الحب من أول نظرة ما بآمن فيه و لا أعتقد بوجوده .... الحب هو روح ... اقتباس:
8-ممكن بيوم من الأيام يحتاج أحد من أصدقائك لزراعة كلية
لا قدرالله وتطابقت زمرة دمك مع زمرة دمه ياترى ممكن تعطيه
كلية من عندك؟
بعطيه حتى لو كان سارق ابي ... اقتباس:
9- ليش بتحاول دائماً التعمق بالخصوصيات وأنا لاحظت
هالشي من خلال يلي قعدوا قبلك عالكرسي؟
مشان قرب اكتر من يلي بيقعد عالكرسي .. اقتباس:
10 -لساتك بتحب الكاتشب مع البطاطا المقلية ؟
من شوي كنت عم باكلها ... أسيل,
اقتباس:
قلت إنو لديك موهبة بالتمثيل وكنت تلعب أدوار بمسرحيات....بمسرح الحياة العملية حضرتك بتمثل ؟؟ على مين؟؟شو بكون الموقف والسبب؟؟
اي ... مرت فترة و مثلت فيها على العالم كلو يلي حوالي .. مثلت اني مريض و مو أي مرض ها الحكي من زمان يعني من السنة الاولى بكالوريا ..السنة يلي رسبت فيها .. ووقتها مثلت مشان غطي الاخطاء يلي ارتكبتها .... اقتباس:
ذكرت سابقاطموحك بالمستقبل تكتب رواية عن قصة إنت عشتها وتصير مسلسل...شو هي الرسالة يلي رح تقدمها من خلال طموحك ؟؟ أو مجرد مسلسل لا طعم لا لون لا رائحة
أكيد رح يكون الها رسالة و هي اختيار الشريك الصح بالحب هادا اولا .. و تانيا ما بدي يبقا حدا يظلم الحب ... و يقول انا كان حبي فاشل .. مافي شي بالدنيا اسمو حب فاشل ..في محبين فاشل ..لك اذا الانسان اختار غلط ..الحب شو دخلو ..
اقتباس:
* إذكر صفتين سلبيات فيك
اذا حبيت بعبد ....... اذا كرهت بحرق .. اقتباس:
كيف بتعبر عن غضبك في أشد حالاته...قدام الناس أولا .....بينك وبين حالك ثانيا؟؟
بشرب مي و بضرب صدري محل القلب مشان حس بوجع جسدي و يخف الوجع يلي بكون جوا ... بحط راسي تحت المي او بدلق على حالي برميل مي ...
بذكر مرة كنت قاعد بباب توما برمضان شربت 5 أناني مي كبار بساعة ... مشان ما خلي يلي حدي يحس اني معصب و لما ما عاد اقدر قمت حطيت راسي تحت المغسلة با المطعم .... مشان برد حالي شوي ... و حدي الأقصى التكسير ...
اقتباس:
إيمت خفت أخر مرة وليش؟؟ بشكل عام من شو بتخاف ( أكيد بعد رب العالمين)؟؟
اي تذكرت .. موقف كان حلو ... بس مخيف ..
يا ستي كنت عم ركب صحن بمنطقة الوعر ..ببرج و ماكان معي حدا ... و فجاة بتنقطع الكهربا عن كل الوعر تقريبا ... انا با البداية كان الوضع عادي با النسبة الي و ما حسيت بشي ..بس شوي شوي و انا عا السطح صرت اسمع اصوات غريبة عم تطلع من جوا الخزانات ... و صرت اسمع اصوات مشي حوالي ..يومها فعلا قلبي كان رح يوقف ... و الحمد لله طلع الناطور تبع البرج باالوقت المناسب .. و لما شفتو صرخت ..
تعاااااااااااااااااااااااااا ... انا هون .. ما بنساه ...
و انا بشكل عام بخاف من غضب اهلي علي ..و بخاف أحيانا من العتمة .احيانا ها . اقتباس:
من نسبة 100 قديش إنت :
كاذب......
وفي.......
حالم ......
حنون......
وحيد
كاذب : 10 %
وفي : 100 %
حالم : 100 %
حنون : 75 %
وحيد : 0 % اقتباس:
ماهي صفات زوجة العميد الخلقية ؟؟
أن تكون انثى ....فإن أشرقت الشمس على عيناها .. أغمضتهم حياء و خجلا ...
و ان تكون بثلاثة قلوب : قلب لي .. و قلب لأولادي ... و قلب لأمي ....
و بالنهاية بلخصلك ها الحكي .. ( فاظفر بذات الدين تربت يداك ) اقتباس:
* شو هو الموقف يلي مر عليك وخلاك تتلبك كتير ومرت عليك ثواني ماعدت تعرف شو تفكر او تحكي ؟؟
اي .. من سنتين يمكن او اقل بشوي .. كنت قاعد بكواتروا انا و البنت يلي كنت حبها .
وقتها كنا قاعدين لحالنا و عم نشرب هت شوكليت كالعادة و ما فينا شي .. و فجاة بتنطفا الاضواء ..و بفوتو الكراسين و كل واحد معاه شغلة ..الاول قالب كاتو .. و التاني معاه كيس في هدايا .. و بيطلع صوت قوي من بفلات الكافيه بغنية عيد الميلاد ..فعلا وقتها كان الوضع فظيع جدا و لاول مرة بخجل ... و صار وجهي احمر و بقيت اكتر من 5 دقايق ما عم اعرف شو احكي ... لاني انا متعود اني اعمل ها الشي با الناس .يعني انا معروف بأني ابو المفاجآت ... اما انا يلي يصير في هيك ..لقيتها صعبة ... اقتباس:
شو أكتر أكلة بتحبا من تحت إيدين الغالية أم ثائر ؟؟ الله يبارك بعمرها وصحتها
الله يسلمك يا رب و يرحم أمك ... انا بحب الكوسا محشي ..بس تكون صغيرة اقتباس:
شو لقبك ...يعني إنتي أبو شو ؟؟
انا أبو احمد ... على سن و رمح ... على اسم ابي ..