عندما تلتقي لذة الأوهام مع غريزة الهروب ..؟؟

أنس الدالي · **اشترك في:** السبت مارس 22, 2008 5:47 am

الإحساس بالإحباط النفسي أو الشعور بالألم البدني يدفع أصحاب النفوس الضعيفة إلى اللجوء إلى إدمان الكحوليات والمخدرات أو اللجوء على الأقل إلى أدوية تسكين الألم..
ولكن هل تسائل البعض
لماذا يقدم هؤلاء الأشخاص على هذه الوسائل الخطيرة دون غيرها لتخفيف الألم والهروب من الواقع الأليم إلى عالم آخر مليء باللذة والنشوة تصبح فيه الدماغ عالية "على حد قولهم" على الرغم من علمهم التام بخطورتها على الجسم ؟!!
وأكثر من ينجرف إلى دوامة الادمان وهذا الطريق المظلم المليء بالألغام والذي ينتهي دوماً بالموت هم فئة معينة من الشباب التافه الذي يبحث عن اللذة العابرة التي لا تجلب لصاحبها سوى الهلاك..
وللأسف لا يتم ذلك إلا عن طريق رفقاء السوء الذين يبحثون دوماً عن زبون جديد ينضم إلى شلة الضياع
دعونا الآن ننظر ونتمعن بالاسباب التي تدفع هذه الطبقة من الشباب لسلوك هذا الطريق ومن الجانب العلمي والسر الذي يربط الادمان بالفشل والهروب
فقد كشف فريق البحث من جامعة متشغن الأميركية النقاب عن دور مركبات الدماغ الكيميائية في تحفيز الشعور باللذة أو الشعور بالألم، الأمر الذي يترتب عليه تشابه في التفاعل بين مناطق الدماغ المختلفة مع كلا الأمرين، وهو يُعلل سهولة وقوع البعض في دوامة إدمان المخدرات، كسمة شخصية لأولئك، بغض النظر عن الخصائص الجينية أو الفيزيولوجية لديهم
وظل الباحثون لسنوات طويلة يعتقدون أن مركب "دوبامين" الكيميائي هو عنصر اللذة في الدماغ، من خلال عمله على إرسال إشارات بين خلايا الدماغ كجزء من العائد الجيد على أنشطة مختلفة يُمارسها أو يعيشها الإنسان، إلا أنه في الآونة الأخيرة تمكن العلماء من الكشف عن سر ارتباط مواد كالكوكايين والهيروين باللذة، لأن هذه المواد تعمل على تضخيم تأثير مركب "دوبامين" على خلايا الدماغ، ما يعزز شعور المرء باللذة، وهو السر في حب المدمنين لتلك المواد من المخدرات واعتمادهم المفرط على دوام توفير وجودها في الجسم بأي ثمن
وبعد أن كشف العلماء عن هذه الحقائق كان لابد لنا أن نعرف نبض الفكر العربي وردود أفعاله وآرائه عن الأسباب التي تدفع هؤلاء الشباب أو الفئة المعينة من الناس إلى اللجوء إلى هذه الوسائل المهلكة في محاولة منهم للهروب من الواقع والتعلق بهذا الطريق
فلتكن كلماتكم هنا تعبر عن هذا الفكر ولنحاول أن نجمع تلك الأسباب التي تدفع للقيام بهذا الامر
مع الملاحظة بأن قسم كبير من طبقة المجتمع تنجرف وراء هذا الدااء وانجراف بعض النساء التي ربما يزداد أعدادها من جيل لآخر

Wissam · **اشترك في:** السبت يناير 19, 2008 3:01 pm

أنس الدالي,
موضوع جميل جدا بوقت نحنا منحتاج لتوعية بهالقصص هي لأنو توجه أغلب نسبة الشباب عم يصير لهيك شغلات. هلأ أكيد النسبة عنا بمجتمعنا أقل بكتير من مجتمعات أوروبا الحمدلله بس مع ذلك هالشغلة بلشت تنتشر عنا بالوطن العربي لأنو عم يصير في تسهيلات بالحصول على هيك مواد وأنا برأيي كتير عوامل بتلعب دور بالتوجه لهيك قصص: يعني مثلا صار الشب اللي عمرو 18-19-20 سنة إذا راهق وحب ومر بعلاقة فاشلة بصير بدو يشرب قال مشان شو مشان ينسى .....كمان الكآبة والإحباط بتلعب دور كتير كبير بفساد الشباب وهون عاد الدور الأكبر بكون للأبوين......يعني كتير آباء ما بيعودو بيتدخلو بأولادن بعد ال 18 سنة( قال شو طريقة تربية أوروبية يا بعدي )....هلأ صحي هالطريقة إلها محاسن بس كمان إذا الأب أو الأم ما وجهوا الابن ولاحظوا تصرفاتو وحاولوا يساعدو إذا عانى مشاكل.....مين رح يساعدو؟ رفيقو؟؟؟؟
طيب لناخد مثال:
لنفرض إنو هالشب تعرض لمشكلة سببتلو إحباط وكآبة وما إلى هنالك.....هلأ لما أهلو بيعرفو بالمشكلة ممكن يساعدو وينصحوه..بس لنفرض راح لرفيقو (اللي ممكن يكون مش ولا بد وومكن هالشب ما بيعرف إنو رفيقو أو حتى رفيق رفيقو بدخن حشيش فرضا) رفيقو شو رح يقلو بهالحالة؟؟ :
رح يقلو خود دخنلك هالنفس أو اشربلك هالقنينة مثلا وصدقني بتنسى كل همومك......بتصير ولا لأ؟؟؟
وهيك بكون ضاع الشب ومرة ع مرة بيتعود وبصير بدو شي أتقل....وطبعا أهلو ولا معن خبر وإذا دريو بكون بعد ما توقع الفاس بالراس
وغيرو وغيرو أمثلة كتير.......شو بدو يذكر الواحد ليذكر
عفوا عالإطالة بس هيك موضوع نقاشو ما بيخلص ولازم الواحد ينتبه لكتير أمور
أنس الدالي,

تقبل مروري

الملاك · **مرسل:** الخميس نوفمبر 19, 2009 2:47 am

يعطيك العافية أنس على هالموضوع
ليتني اعمل أبحاث كتيرة بسببو
"لأنو بتذكر بالثانوي درسنا الدوبامين على إنو هرمون..وإنو إلو دور بتسبيب أو بعلاج مرض باركنسون "الشلل الرعاشي"..وما بتذكر أنو اقترن بسيلات عصبية مقترنة بالسعادة أو اللذة أو أو...

بس فعلاً عملت عليه بحث مطول هلأ ولقيت أنو آمال الأطباء متعلقة فيه تحديداً لعلاج مشاكل الإدمان...بجميع أشكاله

ورح انسخ الجزء اللي بهمنا من أحدى المقالات...وبرجع لناقش الموضوع

يركز العلماء على دراسة مادة كيميائية تشبه الهرمون تسمي "دوبامين" Dopamine، وتعتبر هذه المادة المحرك الأساسي لحالات السرور الإنساني. ومن المعروف أن السيال العصبي ينتقل بين الخلايا العصبية في المخ التي يزيد عددها عن 100 مليار خلية عن طريق مواد كيماوية ناقلة. وتنتقل النبضات العصبية عند نقاط اتصال معينة بين خلايا يطلق عليها العقد العصبية. ويعد "دوبامين" من الناقلات العصبية neurotransmitters التي تحمل الرسائل الكيميائية بين خلايا المخ. وتنتقل هذه المواد الكيماوية خلال الدماغ بالقفز من خلية لأخرى، بعد أن يتم إفرازها داخل خلية مخ واحدة. وترتبط هذه الكيماويات بمستقبلات متخصصة تتواجد على الخلايا لكي تواصل رحلتها.

وينقل الدوبامين معلومات تتعلّق بالشعور بحالات الانتشاء والألم، فمثلا الشعور بالبهجة نتيجة لتناول وجبة طعام لذيذة، أو نتيجة للحصول على ترقية، أو الفوز في مباراة -أي شيء يجلب السعادة – يتم حمله ولو جزئيا عن طريق الدوبامين. ويُنتج الدوبامين في خلايا المخ بمعدلات ثابتة نسبيا تحت الظروف الطبيعية، وتحتل جزيئات الدوبامين جزءا من مستقبلات الدوبامين (مراكز الإحساس بالدوبامين) طوال الوقت.

وتؤدي مواد مثل الكوكايين إلى إنتاج كميات عالية من الدوبامين تقوم بتنشيط جميع المستقبلات في الحال. ويشعر المتعاطي بغبطة شديدة نتيجة لذلك، ولكن التأثير يكون عكسيا على خلايا المخ التي تحاول إلغاء بعض مستقبلات الدوبامين، ولذلك فعندما يزول تأثير العقّار تضمر بعض مراكز استقبال الدوبامين في خلايا المخ، ويؤدي ذلك لتعكير مزاج المتعاطي، ويضطر لزيادة كمية المخدرات ليصل لنفس الإحساس من البهجة والسعادة الزائفة، وهكذا تبدأ الحلقة السلبية اللانهائية التي تؤدي إلى الإدمان في النهاية.

أنس الدالي · **مرسل:** الجمعة نوفمبر 20, 2009 2:22 am

Wissamo,
نورت وسامو وأهلا وسهلا فيك وبمرورك

اقتباس:

لأنو عم يصير في تسهيلات بالحصول على هيك مواد

رح أعتبر هاد أول سبب بتذكروا أنت وهذا صحيح أنا بأيدك علي

اقتباس:

يعني كتير آباء ما بيعودو بيتدخلو بأولادن بعد ال 18 سنة

وهاد السبب التاني بس هون ما بأيدك علي كليآ لأنو احتمال يكون سبب الانزعاج من الأهل نفسهن ويلجأ لرفيق لالو
أنا مع التربية الحضارية الي بتعتمد على زرع الأفكار الصحيحة والمراقبة بشكل أساسي .. وبالتالي هيك حتى ولو كانو هنن سبب انزعاج هالشب رح يعرفوا لعند مين رح يلجأ من خلال معرفة انتقاء أصدقاء له عن طريقه شخصيآ

اقتباس:

عفوا عالإطالة بس هيك موضوع نقاشو ما بيخلص ولازم الواحد ينتبه لكتير أمور

نورت وسامو وبالعكس كانت مشاركتك ووضعك للأسباب ممتع بشكر مشاركتك

الملاك,

اقتباس:

يعطيك العافية أنس على هالموضوع
ليتني اعمل أبحاث كتيرة بسببو

الله يعافيكي يا رب وشكرآ على أهتمامك ومشاركتك ومنها كنت سبب بأنك تراجعي معلومات وتتأكدي منها

اقتباس:

ورح انسخ الجزء اللي بهمنا من أحدى المقالات...وبرجع لناقش الموضوع

بتشكرك على الاضافة بصراحة الموضوع كنت بدي اتعمق فيه أكتر بالبحث العلمي والأسباب بس حسيت أنو مافي داعي لأنو بالنهاية الهدف حل مشكلة مجتمع مو هدف صحي واذا بدي أكتب كل الي قريتوا عن هالموضوع فرح يكون الموضوع مطول ومشتت بين هدفين ولذلك اعتمدت التنويه فقط بشكل مختصر
طبعآ بانتظار مناقشتك وأهلا وسهلا فيكي

عاشقة العربية · **مرسل:** الجمعة نوفمبر 20, 2009 4:13 am

أنس الدالي,
الجميل في الموضوع أنه قد بدأ بمقدمة مفيدة عن أسباب الإدمان الاجتماعية ، لينتقل إلى الأسباب العضوية وهنا الجديد في الأمر فتأثير الدوبامين هو الذي يجعل هذه اللذة إيجابية وسلبية معا في فترة محددة من الزمن
فعلا معلومة جديدة .. أشكرك

أما عن أسباب الإدمان ..
فمن الناحية الاجتماعية رفقة السوء والتفكك الأسري
إضافة إلى : الفرااااغ والجهل
وسبب أهم : وهو ضعف الوازع الديني
ولكنني أرى أننا في مجتمع يحافظ على العلاقات الأسرية ويهمه أبناؤه لذا ربما يكون انتشارها أقل في سوريا تحديدا
أما باقي الدول العربية فلا نخفي الزيادة الحاصلة ، فتركيبة كل مجتمع تؤثر في مستقبله

أوركيدا · **مرسل:** الاثنين نوفمبر 23, 2009 5:56 am

إحدى النقاط الملفتة فعلاً بالموضوع..

اقتباس:

وللأسف لا يتم ذلك إلا عن طريق رفقاء السوء الذين يبحثون دوماً عن زبون جديد ينضم إلى شلة الضياع

انو ليش ازا هني ضايعين يضيعو غيرن معن ؟؟
مع علم معظمن بإنو اللي هني فيه هوي مشكلة وضياع وبيدركو حقيقة الأزمة اللي هني فيا ..
مع ذلك بيتمنو الشر لغيرن!.. وعندن استعداد يقدمو المواد اللي عندون لمين ما كان ويجرجروه.. إلا للشرطة

برأيي الحل الأساسي بينبع من الأم والأب ..
المشكلة اللي بيمر فيها المراهق/ة لازم يحتويها الأهل ..
ويحسسوهن بحنان ومتابعة ..
مهما كانت المشكلة .. فراغ .. ضياع .. فشل دراسي .. صدمة عاطفية ..
بدل ما يهربو من البيت .. لازم يهربو عالبيت

يعني يكون بيت الإنسان هوي جنتو .. مو رفقاتو ..
ولازم يكونو متربايين عالدين ..
شي مهم بدي احكي فيه ..

هوي ثقافة التجربة ..

مو أي شي بيكون إلنا فيه حق المرة الأولى والتجربة الأولى ..
لإنو بعض الأشياء ومنها الإدمان .. بتكون التجربة فيها ثمنها العمر كلو ...
لازم الكل يعرفوا انو مو كل فضول عنا لازم نشبعو ..

أنس الدالي,

موضوعك مهم كتير وحلو .. يسلم ايديك

Mazen M · **مرسل:** الأربعاء نوفمبر 25, 2009 2:12 am

هلق الادمان سيئ لهل درجة ؟؟؟؟؟

بالعكس رواااااااااااااااااااااااااااااااق

لا تصدقوا عم امزح

بصراحة انا برأيي الاهل ما الهن دخل بنوب بنوب
و ما لازم نحط أغلاطنا على أهلنا ,,,,,,,,,,,,,,,,,,,

كل واحد منا فيو عقل بيفكر فيه و بيختار الطريق اللي بدو اياه ,,,,

و تقبلو مروري ,,,,,,,,

أنس الدالي · **اشترك في:** السبت مارس 22, 2008 5:47 am

هدى,
بالبداية بحب اتشكرك هدى على المشاركة ووضعك للاسباب الي كل واحد منها بيمتاز بالتشعب والصحة التامة الي ما بيختلفوا عليها أي اتنين
وبالنسبة لموضوع انو هون بسوريا أقل من باقي الدول العربية ما بعرف يمكن انت ظنيتي هالشي هاد بس انا ما بشوف هيك بالرغم من اني مابعرف كيف وضع الشباب ومعاناتهن برا سوريا بحكم انو ما عندي اي اختلاط او سفر خارج البلد
بس الي بحب اذكروا انو الشي الي عم يصير عم يصير بشكل خفي جدآ حتى عن أقارب الأصدقاء وانا بتفاجىء بكتير شباب عم يسلكوا هالطريق هاد
الموضوع طبعآ اكبر من انو شب مراهق ادايق من شي فلجأ لهالاسلوب هاد
الموضوع بلامس شباب بكامل وعيهن ومن طبة المثقفين والواعين لخطر هالشي على صحتهن وحياتهن وبالرغم من هيك عم يتبعوا هالاسلوب عشان موضوع الهروب من المآسي المتكررة أو الجرح الي ما عم يقدروا يوقفوا نزيفوا الا بالهروب
وعم يسلكوا هاد الطريق للهروب لأنهن عم بلاقوا اسرع حل وأبسطوا
بتشكرك هدى مرة تانية على المشاركة

أوركيدا,
أول الشي منورة أوركيدا بردك على الموضوع وبالنسبة لاستفسارك بصراحة ما بعرف شو جاوبك عنهن أو اني بررلهن عملهن هاد بأنهن ليش عم يسحبو غيرهن
وبالنسبة لأنو السبب الرئيسي هو الأهل أنا معك بهالشي بس مو معظم الأوقات فيهن الأهل يتحملوا أو يفهموا تفكير شاب واعي وبيعرف مصلحتوا تمام
وباللذات اذا كان اسلوب تفكيروا بيختلف عن اسلوب تفكير الأهل
والموضوع ما حسيت في بيدخل باب التجربة والحب للاكتشاف لا أبدآ وانما متل ماذكرت سابقآ انو الموضوع كل مافيه هو عشق للهروب من الواقع الذي طالما يكون سيء عند أغلبية الشباب لأنو مو حاسس بانو حدا راضي عن حالوا ووضعوا
منورة أميرة الورود الصفحة

Mazen M,
منور مازن وأهلا وسهلا فيك
الا ما يكون في نسبة من الحق على الأهل وشو ما كانت هالنسبة بالطبع ما رح تتجاوز حد معين لا يتجاوز خمسين بالمية وهاد الشي بيختلف من شاب لآخر ومن عائلة لأخرى
بس انو ما يكون عليهن حق ابدآ ماني معك
لانو بالنهاية هنن من المفترض يكون ملجأنا الوحيد كلنا ونعتمد على افكارهن ومبادئهن بالحياة ونستفيد منها حتى ولو كنا معارضينها
نورت مازن وأهلا وسهلا فيك وبرأيك

Safa alaasi · **مرسل:** الخميس نوفمبر 26, 2009 2:41 am

هلئ بالنظر على الموضوع بشكل عام بيحكي عن الادمان عن طريق المخدرات أو الكحول........
بس انا حبيت العنوان أكتر بصراحة لأنو بيسلط الضوء على كل طرق الهروب من الواقع و ما أكثرها ... و الحقيقة انو ممكن نحنا نمارس بعض هالطرق

يعني أنا برايي لما الشخص بينام زيادة عن 8 ساعات بيكون عم يهرب من واقع
التدخين سواء سيكارة أو أركيلة هوي هروب من واقع
مشاهدة التلفاز و الأفلام تحديدا بكثرة هوي هروووب من واقع
اللجوء للطعام أو الشوكولا ...كمان هروب من واقع
الجلوس بالساعات عالنت أو المسنجر هروووب من واقع
يعني للأسف طرق الهروب من الواقع واللادمان صارت كتييييييييرة ومتاحة بشكل كبير و عم اتدمرنا من عدى ما نحس حتى لو كنا ما عم نتعاطى هيرووين حقيقي بمجرد أنو نمارس شي مانو مفيد بس لنقتل الوقت أو لنقتل أي شعور بالخيبة والاحباط والملل هاد بيكون هروب من واقع ...

أنس الدالي,
يعطيك العافية

أنس الدالي · **مرسل:** الأحد نوفمبر 29, 2009 4:39 am

Safa alaasi,
أهلا وسهلا فيكي صفا ومنورة الصفحة

اقتباس:

بس انا حبيت العنوان أكتر بصراحة لأنو بيسلط الضوء على كل طرق الهروب من الواقع و ما أكثرها

مو مشكلة المهم تعبريلنا برأيك وشو بيعنيلك الهروب وأنا سبق وضفت موضوع مفصل عن الهروب وتناقشنا في عن أسباب الهروب وحالاتو ..

اقتباس:

يعني أنا برايي لما الشخص بينام زيادة عن 8 ساعات بيكون عم يهرب من واقع
التدخين سواء سيكارة أو أركيلة هوي هروب من واقع
مشاهدة التلفاز و الأفلام تحديدا بكثرة هوي هروووب من واقع
اللجوء للطعام أو الشوكولا ...كمان هروب من واقع
الجلوس بالساعات عالنت أو المسنجر هروووب من واقع

طولي بالك يا بنت الحلال على هالضرب هاد كلنا منتسمى هاربين من الواقع
كمان الجدية بالحياة وبالواقع الي انت رسمتي مو حلوة ومو مقبولة
يعني بالنهاية مو ضروري كل عمل يقوم فيه الانسان لازم يكون مفيد ولا يعتبر ضياع للوقت أو تسلية
أهلا وسهلا فيكي وبرأيك الحازم

LATEST_POSTS

قوانين المنتدى

عندما تلتقي لذة الأوهام مع غريزة الهروب ..؟؟

الموجودون الآن