ولي على النسوان

بروين

ولي على النسوان أو ولي على حظي من المرأة
كلمات كتير منسمعها او منسمع متلها وعلى وزنها
يعني مثلا منكون ماشين بهالطريق ومنشفلك شي وحدة هي و ولادها الأربعة عم تطلع بتكسي والسير موقف على بين ما تضب غراضها وتطلع ولادها على السيارة والكل عم تسبها وعم تقول ولي على حظي من النسوان تضرب هي و ولادها الأربعة وقفت السير
بس مننسى انو مو الحق عليها الحق على شوفير التكسي يلي وقف بنص الطريق كرمال يطلع زبون وما يروح على حالو خمسين ليرة حتى لو وقف السير.

مثال تاني وقت وحدة بكون عندها خلينا نقول ولدين وبتطلع على مباركة أو مطعم او أي مكان وبحكم انو معها ولاد هنن هيركضو ويلعبو وهي هتركض وراهون حتى ما تضايق حدا وبصير كل واحد بنكش يلي جنبو وبقول طالما معها هالولاد العمى بقلبها ليش لتطلع براة بيتها و تضايقنا
ومننسى انو هي كائن حي وممكن تكون صرلها شي شهر مو طالعة من بيتها وحبت تتطلع وتغير جو وممكن زوجها يكون من النوع يلي ما بيساعد مرتو
وممنسى انو مو الحق عليها انو عندها ولاد كتير لأنو كتير ممكن انو زوجها بحب الولاد وهو عم يطلب منها انو تجبلوا ولاد .

مثال تالت وقت منشوف شي وحدة ورا دركسيون السيارة وعم تسوق وبتكون ماشية بحذر واذا مثلا نسيت تعطي إشارة وقت بدها تلف أو وقفت لحظة كرمال تمرق شي حدا ما بضل حدا إلا ما بقول اي هي مين قعدة ورا الدركسيون ومين عطاها شهادة السواقة ولي على النسوان
ومننسى انو هي إنسان وممكن تخربط او تنسى وانو حتى مايكل شومخر بخربط
وكمان مننسى انو مجتمعنا اذا شاف بنت عم تسوق بتشتد النخوة العربية وبصير الشاطر يلي بدو يحرمها تطلع ورا الدركسيون وبالتالي هي هتتشنج وتتلبك وبتصير تخربط وبتكون العيون عليها عشرة عشرة وناطرتها على غلطة حتى تسبها أو تسمعها شي كلمة.
أسفة طولت الموضوع
بس الفكرة هي وين الغلط نظرة المجتمع للنسوان او للأنثى بشكل عام
ولا انو بالفعل ولي على النسوان
بانتظار أرائكون وردودكم
ملاحظة ممكن الموضوع يكون في شوية مبالغة بس لإيضاح فكرة هي موجودة بمجتمعنا .

فراس دلله

المرأة ليست نصف المجتمع كما يقال بل هي المجتمع كله فإذا كان الرجل عقل المجتمع فالمرأة هي قلب المجتمع
بدي ارسل موضوع من باب المزاح عن خلو العالم من النسوان شوفي
شكرا لكي بروين تقبلي مروري

فطوم

بقولولك المجتمع بلا النسوان ما بينعاش *hh

و الحكي اللي قلتي كلو درر
يعطيكي العافية

عاشقة العربية

المواقف من قلب الحياة وصورة كتير حقيقية عن الواقع، حلو طرحك

الفكرة أنو ما ولي ع النسوان
الفكرة انو ولي ع البلادة

يعني هي الأخطاء ممكن الشب أو الرجل يغلطا كمان بسبب قلة الحيلة، ممكن يكون بالحديقة عم يلعّب اولادو وينسى اولادو شوي، يرجعو متقاتلين مع الاولاد التانين، أو يوقعو، أو يفتري بدو ياكل ويبكي، وهو متلبك بحالو.

يعني هالمرا اللي بتجيب اولادا ع شي سهرة، كمان لازم تحترم المكان اللي هي فيه، ولو أنو فعلاً صرلا شهر ما طالعة، معقول لما تطلع تتشنطط باولادا وتلبك العالم معا؟ لأ تقعد ببيتا أفضل.
يعني هي اللي ما عرفانة تدبر أمورا وعم تحيج العالم يقولولا ولي عليكي (حسب عنوان الموضوع ).

لذلك الشغلة بترجع لقلة الحيلة وعدم معرفة التصرف ببعض المواقف، وليس كلها

بروين، شكراً للطرح

bestman

بروين

والله معك حق بكل كلمة

نحنا الغلط فينا او خلينا قول بطريقة تفكيرنا ب هيك مواقف
وبحب قول انو

وراء كل رجل عظيم أمرأة عظيمة

بروين

بشكر الكل على مشاركته للموضوع ونورتو الموضوع
هلا بعض المواقف فيها بعض المبالغة طبعا لايصال الفكرة مو اكتر
وشكرا مرة تانية وبحي رأي الشباب كلون
و وراء كل امراة عظيمة رجل
لانو المراة دائما بحاجة لشخص يدعمها وبالاخص زوجها او حبيبها او ...............
يعني هنن بالفعل المراة والرجل هنن المجتمع الكامل والمثالي

آخر المشاركات

قوانين المنتدى

ولي على النسوان