و عليكم السلام
الترجمة هي محصلة معرفة لغوية كاملة بمعنى انو لازم يكون عندك المام ممتاز بالقواعد و المفردات و اسلوب الكتابة.
لتتعلمي الترجمة صح لازم تتمرني كتير و لكن بعد ما تكوني حصلتي معرفة قواعد جيدة, لازم تقري كتير بمجالات متنوعة ما بس كتب الجامعة. و وقت بتقري لازم ما تقري بس لفهم المعنى و انما لازم تنتبهي لاستخدام الكلمات و الوصل و تركيب الجمل. و لازم تعرفي الفرق بين الكلمات المحكية فقط و الكلمات المستخدمة بالكتابة الرسمية, مثلا محادثة بين شخصين بمطعم رح تكون اللغة المستخدمة فيها غير محادثة بين محامي و قاضي مثلا.
اهم شي لازم تتمرني قدر الامكان و لازم يكون عندك معرفة باستراتيجيات الترجمة المختلفة من العربي للانكليزي و بالعكس. بتلاقي كتير مواقع على الانترنت بتساعدك بهل الخصوص, ادخلي على غوغل و اعملي بحث عن:
translation strategies
و بعدين لازم تطبقي الشي اللي بتلاقيه على النصوص اللي بدك تترجميا.

سلامات

اهلا و سهلا و شكرا لك
ما لازم تعتمدي على محاضرات الجامعة فقط لتتعلمي الترجمة لانو محاضرة بالاسبوع اكيد غير كافية و خلال المحاضرة مستحيل يكون عند كل طالب فرصة انو يناقش ترجمته الخاصة لذلك اعتمادك الاساسي لازم يكون على نفسك.
و مجرد انك تبدأي الترجمة و تستعودي عليها بصير الامر اسهل.

تحياتي

[size=200]اي والله انا عندي عقدة من هالمادة والله  وما بعرف كيف ترجم غير حرفي  والله كمان ما عندي ثقة بترجمتي وبخاف كتير من هالمادة  وليكني حاملة ترجمة 4 مع انو الامتحان   ان كتير سهل  والشهادة لله
والله كنت بعرف كل معاني الكلمات  بالنسبة لنص الدكتةر مزعل اللله يخليلنا ياه ويقويه  يا رب  بس اكيد لازمني دورات  كتيييييييييييييييييير حتى اتخطى هالعائق بس  المشكلة ما في وقت
مع اني والله بحب اترجم كتير ويمكن لانو طرق واساليب الترجمة عديدة هاد اللي عم يخليني فوت بمية حيط[/size]

مرحبا دكتور
بالنسبة للترجمة أنا كتير ضعيف باللغة العربية هل ممكن يأثر هالشي
عالترجمة لأنو أحياناً بعرف معنى الكلمة بس ما بعرف عبر عنها بشكل صحيح
باللغة العربية

والله انا بصراحة بحب الترجمة كتييير بس كتيير منت اكل همها بس بصراحة وبدون مبالغة من وقت ما الدكتور حطلنا نصوص الترجمة ونحن صرنا ندرب عليهم
كسرت حاجز الصعوبة اللي كنت اكل همها وصار عندي امل اني صييير احسن واحسن ان شا الله        

انا بصراحة كتييير بحب الترجمة بس كنت خاف امسك شي نص وخبص في قوم اتركو وهادا كان غلطي مع ان بحب الترجمة
بس هلأ لما اشتغلت مع الدكتور  M. Samhar AlAbiad,  صرت حب ترجم اي شي
عن جد الله يعطيك العافية وشكرا لجهودك        

تحية للجميع
ما في داعي للخوف من الترجمة و حتى لو انو تبدو عملية صعبة و لكن لحنا عم نتعامل مع لغة اجنبية لذلك كل شي صعب بالبداية و اذا ما كان عنا جرأة و حاولنا مستحيل نتعلم أي شي.
لازم الابتعاد عن الترجمة الحرفية لانو كتير نادر انو اي شخص يترجم حرفي و ينجح بالامتحان. و ان كان و لا بد ترجمي حرفي على المسودة فقط و بعدين بشوية تغييرات بسيطة ممكن نعمل الترجمة احسن يعني مثلا نحط الفاعل قبل الفعل, ندمج الجمل اذا في تكرار, الانتباه للعطف و غيره.
كل ما ترجمنا اكتر كل ما تعلمنا كلمات جديدة و تراكيب جديدة و صار عنا خبرة اكتر لانو بنهاية الامر رح نوصل لمرحلة بتصير فيا الصعوبة الوحيدة هي معاني الكلمات لا غير لانو كل التراكيب عرفناها و عرفنا كيف نتعامل معا. و متل ما لازم يكون عما طلاقة بالمحادثة لازم يكون عنا طلاقة بالكتابة و هاي ما بتجي الا عن طريق الترجمة و القراءة.
بالنسبة للغة العربية اكيد الضعف فيا بأثر لانو متل ما ذكرت ما رح نعرف نعبر عن الكلمة اذا ما عرفنا معناها. الحل القراءة باللغة العربية و اذا لقينا نصوص مترجمة جاهزة ممكن نعمل مقارنة و نشوف كيف المترجم استخدم اللغة و لكن لازم نتأكد انو الترجمة جيدة طبعا.
اهم الشي تذكروا انو ما في شخص بترجم ترجمة ممتازة من اول مرة و انو لازم يكون عندكن ثقة بامكانياتكم و انو مع الوقت بتتحسن و بتصير افضل.

تحياتي و بالتوفيق للجميع