مرحبا دكتور سمهر انا سوسن طالبة انكليزي سنة تانية
منشان المحادثة انا بدي حسن محادثتي وتيصر لكنتي كتير منيحة انا عم احضر كتير افلام واسمع اغاني بس النتيحة مو متل مابدي
ياريت تنصحني بخصوص هيدا الموضوع
وشكرا كتير الك ولجهودك

أهلين سوسن
بالنسبة للمحادثة انت ماشي على الطريق الصح, بس لا تتوقعي النتيجة تجي بسرعة, بدك تصبري و اهم الشي انك تتابعي. مستحيل تتعلمي المحادثة و تكون لكنتك صح بسرعة.
بنصحك اول الشي تركزي على لهجة واحدة بالبداية , يعني لا تخلطي بين الامريكي و البريطاني مثلا لحتى تتمكني تماما من وحدة منن بتكون اساس مقارنة للثانية.
وقت بتعملي استماع لازم تنوعي, مثلا اغاني, افلام, مسلسلات, اخبار الخ, و لازم يكون الاستماع على نوعين: مركز يعني مثلا ساعتين استماع بس, و طبعا بدك تركزي على الاصوات, الدمج و intonation و استماع مع تكرار. مثلا بتسمعي لجملة و بتعيدي لحتى تقدري تلفظي بنفس الطريقة. لا تركزي على الكلمات بحد ذاتا, يعني كلمة ما عرفتيا اتركيا و بعدين بتشوفي معناها, المهم هو الاصوات نفسا.
الممارسة مهمة كتير لذلك لازم تحاولي تتفقي مع صديقة الك مثلا انو كل يوم تحكوا انكليزي لمدة ساعتين او ثلاثة. اذا ما عملتي هيك ما رح تستفيدي و حتى لو صار عندك مهارة استماع عالية, بتبقى طلاقتك ضعيفة.
انا بلاقي الافلام كتير منيحة لانو اللغة بتكون محكية و بتسمعي لعدة لهجات, و بنصحك تجيبي افلام يكون في إلا subtitles بالانكليزي, بهل الحالة بتسمعي و بتقري بنفس الوقت, و بتصير الفائدة اكبر. الاغاني جيدة بس اكيد الافلام احسن, لانو بالاغاني بصير تداخل الموسيقى مع الكلام, و الاغاني بالعادة ما بكون فيا نفس مستوى الكلام العادي من ناحية intonation و الدمج.
اذا تابعتي بهل الطريقة بتوصلي للسنة الرابعة و بكون مستوى لغتك ممتاز, اهم نقطة هي انو ما تنقطعي عن اللغة و الممارسة يوميا على الاقل 3 ساعات (استماع و محادثة).
موفقة سوسن

الممارسة مهمة كتير لذلك لازم تحاولي تتفقي مع صديقة الك مثلا انو كل يوم تحكوا انكليزي لمدة ساعتين او ثلاثة. اذا ما عملتي هيك ما رح تستفيدي و حتى لو صار عندك مهارة استماع عالية, بتبقى طلاقتك ضعيفة.


ويلي ماعندو ممارسة وما عندو شخص يقدر يمارس معو المحادثة
ويلي بحس حالو انو رح يتلبك اول ما حدا يحكي معو انكليزي
وبينسى القواعد والكلمات شو حلو دكتور؟؟؟؟
انو افلام واغاني هالفترة الكل مو مقصر بهالموضوع بس طيب سمعت وركزت وعدت معن شو يقولو
ووصلت لمرحلة اني ما بحط الترجمة وبس بحضر الفيلم وبسمع وبفهم كلشي
وفي كتير روايات كنت جيبها اقراها بالانكليزي قبل ما احضر الفيلم تبعها
(كتب مالها علاقة بروايات الجامعة)
بس انا مشكلتي مافي جرئة انو احكي هاد ما عم لاقيلو دوا

ايام المحاضرات كون بدي اسئلك عن شي بس ما اقدر حتى ارفع ايدي
خوفا من انو رح اتلبك

وانا على بواب تخرج بقا ما بظن رح يكون في ممارسة انكليزي متل اول

راحت عليي دكتور؟؟؟؟

طالما صرتي بمرحلة ما بتحتاجي فيا لمتابعة الترجمة معناها عندك الاستماع جيد جدا, و هادا بدوره بيعني انو الشي الباقي هو التمرين ما اكتر. ما في داعي تتلبكي ابدا, لانو اولا, و لنفرض انك بمحاضرة مثلا, مستوى الطلاب الباقي مانو بالضرورة احسن من مستواكي, و انا دائما بقول انو اذا طلع شخص يحكي و باقي الطلاب ضحكوا مثلا بكون العيب فين لانو ما عندن جرأة انو يحكوا بالاصل. تانيا, ليش الخوف؟ يعني شو اسوأ شي ممكن يصير؟ لنفرض انو حكيتي و ما طلع شي صح؟ شو بصير؟
و لا شي. في طريقة بعلموا بعلم النفس للتخلص من موضوع الخوف, و هي انو توقفي قدام مرآة (mirror) و تحكي و هيك يتشوفي حالك و كيف عم تتصرفي انت و عم تحكي. و تذكري انو اذا ما جربتي مارح تعرفي النتيجة, ممكن تكون لغتك حلوة كتير و عندك طلاقة بس كلو مخفي بسبب وهم الخوف. لا تفكري بالقواعد او الكلمات نفسا انت و عم تحكي, و لا تفكري انو شو لفظت صح او خطا, المهم انو احكي و كلو مقبول. و اكيد ماراحت عليكي , دائما في وقت, و معرفة المشكلة هو نص الحل, لذلك باقي النص التاني و هو انو تكوني واثقة بنفسك. اذا بتحبي الافلام, في فيلم كتير الو علاقة بهل الموضوع و اسمه The King's Speech او King's Speech بنصحك تشوفيه.
تحياتي

شكرا لنصايحك.أنا عم احضر الأفلام بكلمات انكليزية بس بعد في مشكلة من وين بدي جيب صديقة بتعرف تحكي.نحنا منحاول بلجامعة بس بدنا شخص بيعرف اللغة منيح لحتا نعرف وين عم نغلط.حاولت أدخل عبرامج دردشة بس مافي منا فايدة.ياريت اذا بتعرف شي موقع دردشة لحتا نقدر نستفيد منو ويكون الاشخاص الموجودين فيه لغتهم الأم انكليزي.شكرا كتير الك دكتور

مرحبا دكتور كيف الصحة
و الله النصائح اللي عم تعطينا ياها كتير حلوة و بتشجع
إنو عل القليلة لسه في حدا بيعطي أمل بالحياة وألف شكر إلك دكتور

أزا بدك يا سوسن تعملي محادثة مع أحد بريطاني -أمريكي-أسترالي أو نيوزلندي في كتير مواقع على الأنترنيت بتتضمن تبادل اللغات . يعني أنتي بتعمليهم عربي وهنن بيعلموكي أنكليزي . أنا سنة تانية وألي 2 سنين بتعرف على عالم وبحكي معاهم عن طريق السكايب . جربي هدول التلت مواقع :
www.mylanguageexchange.com
www.language-exchanges.org
exchangealanguage.com
يعني محد رح يفضل عليكي رح تعملي وتتعملي
بالمناسبة لازم يكون عندك أشترك بالسكايب حصرا لتقدري تتواصلي وأزا بدك خيارات أكتر من هوديل كتبي على google : Language exchange . ورح تلاقي كتير مواقع

M. Samhar AlAbiad,

الدكتور محمد سمهر الأبيض ، تحية عربية طيبة وبعد ,

أشكرك جزيل الشكر على هذه المعلومات الرائعة التي زودتنا بها ، كما أشكر monogamy, على ذكره للمواقع التي نستطيع من خلالها تبادل اللغة والتحدث من خلال الانترنت ...

دكتورنا العزيز، هل يوجد سلسلة من مقاطع الفيديو تكون بمثابة المحاضرات التي نحضرها بالجامعة ولأشخاص بارزين ، نستطيع من خلالها تعلم الـ Pronunciation , وكذلك الـ accent لكل من الإنكليزية البريطانية والأمريكية ، مع العلم أنني قد حصلت على محاضارت من مجلة آرتين للهجة الأمريكية وكانت بعنوان Pronunciation workshop ، وكانت عبارة عن أربع فصول ، ويقدمها روبرت بأسلوب شيق وممتع إستفدت من خلال هذه السلسلة كثيرا في هذا الموضوع ...ولكن للأسف فإن أهم شيء كان في هذه السلسلة كان مفقودا وهو الكتاب الإلكتروني ، ولكن للأسف لم أستطع الحصول عليه..

على كل حال، إنني من متقني الـ اللهجة البريطانية - إلى حد ما - بتقدير جيد ، ولكن أحاول جاهدا البحث عن سلسلة من الدروس التعليمية تتعلق بـ Pronunciation وكذلك الـ accent - مثل التي ذكرتها سابقا- لتحسين لهجتي ... فهل أستطيع أن أجد طلبي ؟

إستنتجت دكتور من خلال نصايحك نقطة مهمة...
اليوم ، انا أموري بخير بالبريطاني متل ماذكرت ، والأمريكي أخدت فكرة عنو ، بس انا بدي أوصل لمرحة أتعمق فين التنين حتى أحسن مستوى لهجتي بالتنين بشكل منيح ... فهل هذا ممكن ؟


كل الشكر لك دكتور مسبقا ، وبعتذر منك إذا أطلت بالسؤال


تقبل تحياتي ودمت بخير

تحياتي للجميع
سوسن, طالما انو حاليا صعب تعملي محادثة مع صديقة مثلا, خيارك الوحيد هو التكرار, استمعي لجمل و كرري لحتا تنحفظ و تصيري تقوليا بسرعة. في طريقة حلوة و كتير فعالة و كنت علما من زمان و هيى طريقة المونولوج, يعني حددي لنفسك وقت خمس دقائق, بتحكي فين من دون توقف ابدا عن اي شي بيخطر على بالك, و بتعملي هيك مرة كل نص ساعة او حسب راحتك. بالتدريج رح يصير عندك سرعة بالتفكير بالانكليزي لانو الطلاقة اساسا هي انو تحكي من دون تفكير بالقواعد او الكلمات. يعني متل العربي, و حطي ببالك انو حتى الانكليز نفسن وقت بيحكوا بكون عندن اخطاء, متل وقت احنا بنحكي عربي و بنغلط, لذلك لا تهتمي كتير بالقواعد.
بالنسبة لمواقع تشات, انا بصراحة ما عندي خبرة فين لانو و لا مرة استخدمتن.
شكرا انسة برشلونية و استاذ monogamy على المشاركة الحلوة.
استاذ نور شكرا الك على المداخلة الحلوة. السلسلة اللي ذكرتا ممتازة جدا, و هاي اسماء بعض اقراص التعليم (لغة او عام) مع الفيديو, ممكن تلاقيا ب google و تنزلا عندك:
TTC Learning Videos
Masterpieces of the Imaginative Mind: Literature's most fantastic works
Understanding Linguistics: The Science of Language
Extra English

و بعض المواقع:
http://www.english4today.com/usr/video/ytv/
موقع رائع و في دروس بالفيديو بتغطي القواعد و اللفظ لكافة المستويات

http://www.learnenglish-a-z.com/learn-e ... video.html

http://englishsecret.com/
موقع مختص باللفظ

http://www.eslvideo.com/
موقع عن اللغة بشكل عام, احتمال تحتاج تعمل حساب.

و في بعض الكتب المفيد جدا و هي عبارة عن سلسلة كتب حسب المستوى:
- سلسة كتب NorthStar سلسلة رائعة و جدا قوية خاصة اذا جبت كتاب Listening مستوى Advanced و انا درّست هاي السلسة بعام 2002 بمعهد اللغات و لقيت انو الطلاب استفادوا منا بشكل رائع
- سلسلة Interchange نفس المبدأ مع التركيز على تمارين متنوعة بكل المجالات
- سلسلة Spectrum ايضا قوية جدا خاصة مقاطع listening

و اكيد ممكن تستفيد من الكتب الصوتية و بتلاقي كتير على الانترنت بس ادخل غوغل و اعمل بحث عن english audio books + free
و الشي اللي ذكرته اكيد ممكن و انا طبقته, لذلك بنصحك تتابع بالموضوع و تتمرن قد ما بتقدر و ما في شي مستحيل طالما عندك المام باللفظ البريطاني, الامريكي رح تلاقيه اسهل بكتير.
تحياتي للجميع

M. Samhar AlAbiad,


شكرا جزيلا لك دكتور ، الله يعطيك الف عافية يارب عالمعلومات يلي قدمتنا ياها ...


شكرا لمساعدتك

تقبل تحياتي وإحترامي