جولة .. في مترو دبي الجديد

عاشقة العربية

حاجتنا سرافيس وسيارات بدنا نغيّر جو ونجرب نطلع بالقطار
وما أي قطار !! رح نعمل جولة بــ متــرو دبـــي

وسأخبركم لم اخترتُ لكم هذا المترو تحديداً
- أحد أكثر أنظمة المترو تطوراً وأمناً وراحة في العالم
- أطول نظام مترو آلي في العالم نُفّذ في مشروع واحد
- نظام ذكي لرصد العقبات الجانبية على الطريق
- كاميرات أمامية وخلفية لمراقبة حركة القطار لحظة بلحظة
- تكييف هوائي عالي الكفاءة في جميع المقصورات والممرات
- وحدة شرطة خاصة للمترو
- أكثر من 3000 كاميرا مراقبة في القطارات والمحطات للحفاظ على الأمن على مدار الساعة
- نظام اتصال لاسلكي مدمج بين المترو ووحدات الطوارئ
- وكل قطار في خمس مقطورات تتسع لـ 643 راكباً

هل عرفتم الآن أين سنكون ؟
هيا بنا ..

معاً سنذهب من أحد أكبر المولات في دبي (الإمارات مول) إلى محطة القطار المتصلة بها

وسنقف لقطع التذاكر

الآن في طريقنا إلى القطار ..
هذه هي أقرب نقطة إلى سير القطار ، لأخذ التذاكر وتسجيلها للسماح لنا بالدخول إلى القطار

حين ندقّق النظر بهذه الأرضية سنجد أشياء فضيّة تشكّل مربعات
هذه تدعى مجسّات وهو نظام إرشاد ذكي من العلامات الأرضية البارزة لمساعدة ذوي الإعاقات البصرية للتحرك بكل يسر وسهولة في مختلف محطات وعربات المترو
هذه هي الصور عن قرب ..

الآن ، آلات تسجيل التذاكر للسماح بالدخول

وعليها ستضع البطاقة المخصصة ، لتأخذ هذه الآلة كود البطاقة وتدخل بأمان

وها نحن ننتظر القطار لكي يمرّ في هذا المكان

والساعة الإلكترونية تشير إلى المواعيد الدقيقة

وسُمِع صوت القطاااار من بعيد ..

وفي الداخل ، وفي مقطورات عامة الشعب :

أما هنا .. فصرنا في مقطورة VIP :

وهناك أيضاً مقطورة للنساء والأطفال

وتستطيع في الطريق أن تشاهد معالم دبي من الأعلى في وضح النهار أو في عتمة الليل حتى تصل إلى المحطة التي تريد .

آن آوان الوصول .. لتنتهي رحلتنا ونعود من حيث بدأنا

موقع آرتـيـن يتمنى لكم جولة سعيدة في مترو دبي الجديد

زمردة

هدى,

متل المترو اللي عنا بالزبط :mrgreen:

و أنا عم قول ليه الناس اللي عم تسافر لدبي ماعم ترجع *ممم

جميل جداً يا هيك الحضارة يا أمّا بلا ... و هي اليوم كمان دشنوا برج خليفة شي حلو كتير و لسا الخير لقدام

عصام

هدى,

هو صحي هالصور والشرح بيخلو الواحد يبكي
بس معنا معنا بيصير عنا احسن منن
ومو حلوة الركبة هنيك
عنا السرفيس بيسوى كل هالمترو
بتعطي اللي قدامك عشر ليرات بيجي بغباء ولا اروع من هيك بيقلك واحد
وبعدين بالسرفيس بيحس الواحد بالدفا اكتر خاصة اذا محشور شي حشرة ماكنة جنب حدا مانو سمين وعكرسي ديييييييييق

لاتحرمينا من رحلات تانية ها

Wissam

لك لك لك ........سارقين التصميم تبع المترو اللي كنا بدنا نعملو نحنا
بس يلا بكرا منصمم أحلا منو ......بس انشالله ما يجي حدا تاني يسرق التصميم الجديد لأنو الحمدلله كل تصميم عم ياكل معنا شي 100 وعشرطعشر سنة
هدى,
الله يسلم هالإيدين.......كتير حلوين الصور ذكرتيني بأول ما اشتركتي بالموقع باسمك القديم وبمواضيعك القديمة

لجين

خيتو شو بدنا بالحكي ..هو انو هيك :mrgreen:

وفهمك كفاية
حلوة الحضارة والتطور عنجد عقبالنا
:mrgreen:

عاشقة العربية

عبير,

اقتباس:

متل المترو اللي عنا بالزبط

لا راح ولا إجى

اقتباس:

أنا عم قول ليه الناس اللي عم تسافر لدبي ماعم ترجع

بيني وبينك ما عم تطول ، لأنو عم تفلس وترجع

اقتباس:

جميل جداً يا هيك الحضارة يا أمّا بلا ... و هي اليوم كمان دشنوا برج خليفة شي حلو كتير و لسا الخير لقدام

اي فعلا برج دبي افتتحو ، شي خيالي هو والمنطقة اللي حواليه
بشكر مرورك اللطيف

عصام,

اقتباس:

هو صحي هالصور والشرح بيخلو الواحد يبكي
بس معنا معنا منصير أحسن منن

بالقريب العاجل إن شاء الله

اقتباس:

عنا السرفيس بيسوى كل هالمترو
بتعطي اللي قدامك عشر ليرات بيجي بغباء ولا اروع من هيك بيقلك واحد

عم توحلي بفكرة موضوع سياحي بسرافيس حمص
ومنن هالموقف اللي بدل ع ذكاء الراكبين لهالنوع من السرافيس

اقتباس:

لاتحرمينا من رحلات تانية ها

وهو كذلك

Wissamo,

اقتباس:

لك لك لك ........سارقين التصميم تبع المترو اللي كنا بدنا نعملو نحنا
بس يلا بكرا منصمم أحلا منو

هو شفت أوراق عم تطير من عنا لدبي بعدين لعرفت انن اوراق التصميم بس منصير كمان بالقريب العاجل

هلأ لنحكي الحق ..
اللي ركب بالقطار السريع الجديد اللي بسوريا فعلا مرتب وجديد وناقصو شوية اهتمام بالخدمات وبكون منيح

خليتني فكّر شو كانت مواضيعي القديمة وما طلع معي شي
بشكر مرورك وتعليقك

لجين,
لأ ترى فهمت عليكي وأفحمتيني
يسلمو

Obada Arwany

يعني بسمع كتير ابي و اخي و اهلي بيحكوا عن اللي شافو هنيك
بس انا بحياتي ما شفت هيك شي و لا رح اتخيل اني اركبوا
بصراحة ما بيطاوعني قلبي متل ما بيقولوا تعلمنا على الشقا

بس جد حاسس حالي عم شوف شي لعبة 3D
او شي مسلسل اطفال متل ناروتوا او ون بيس هدول شغل الكذب فين ما الو والي :mrgreen:

بس انا بضمنلكم انوا يعني شهر بالكتير رح بتلاقوا عنا منن
او بالأحرى اكتر شوي

عصام,

اقتباس:

بتعطي اللي قدامك عشر ليرات بيجي بغباء ولا اروع من هيك بيقلك واحد

عنجد هي المعضلة اللي بدي افهمها دائما
يعني منقول ايام انوا الشوفير طبعا لو كانت متعلم او عندو ذكاء كان صار غير هيك لو سألك عنها
بس تشوف واحد بيدعي انوا جامعي او مثقف او بينسب نفسوا للحضارة و بيسألك
العشرة كم واحد هي جد بتزعجني متلك يا عصام

Safa alaasi

هدى,

عن جد شي خيلة :shock:

يعني لو رحت لهنيك ما رح يصرلي اركب فيه :mrgreen:

و بصراحة بحب الطراز القديم و حلمي اركب فيه *sla

انو قال يعني بحس حالي بشي رواية

... شو بدك بالحكي أنا بحب الشغلات الفقرية مو بإيدي :roll:

اقتباس:

بتعطي اللي قدامك عشر ليرات بيجي بغباء ولا اروع من هيك بيقلك واحد

لا غباء ولا شي بيكون ما انتبه انو هاي عشرة بيجوز فكرا خمس وعشرين ... رأسا جاهزين لاستغباء العالم و ما بتحطو أعذار للعالم :evil:

Mohammed

هدى,
الله يسامحك :cry:

ما حرام نحنا الناس الغشيمين الي ما نعرفش حاجة ومش شايفين حاجة تورينا هيك صور
شو بنعمل بحالنا طيب

خاااااصة أنا .. لأني عملت مقابلة العمل للشغل بشركة ميترو دبي والوظيفة روااااااق والراتب مغري والسكن رائع وال وال ....
أخخخخخخخخخخخخخخخخخ
بس شو بدنا نعمل ع حظنا صار في أزمة عالمية وخففو العدد من مية لشي 4 أو خمسة بسوريا
عفكرة كأن الأفتتاح مقررر ب 9\9\2009 بس ما عدت تابعت اخبار الشباب
بس ما بعرف ازا عرفو يدبرو حالن بدوني

رشا

يسلم ايديك يا هدا اما شو رحلة بتصطل صطل :mrgreen:

والله هدول يلي عندن مصاري بيصير عندن كلشي بس كانو بحس هيك شغلات بتلبق لسوريا اكتر من دبي مو :mrgreen:

اي بس والله الركبة بالسرفيس بتجنن لانو مقاعد هزاز ببلاش :mrgreen:

وفيا زحليطة كمان :mrgreen:

يعني مدينة ملاهي

بس والله لو نركب بمليون مترو مارح فينا نترك السرافيس

اخخخخ وصلنا اخيرا :wink:

تحياتي وشكرا مرة تانية *Hi

آخر المشاركات

جولة .. في مترو دبي الجديد