تحياتي دكتور
بس بحب قلك ينعاد عليك بالصحة و العافية انشاء لله
أنا بحييك يا دكتور و عنجد ماحدا بيطلعلو يعلق على تصحيحك
أنا نجحت بالمادة بعلامة 67 بالدورة الأولى هالسنة و ما كنت بتوقع أكتر
يعني الواحد لازم يعترف أنو عندو أخطاء بس عندك طلاب بيكتبو
و بيفكرو حالن كاتبين ب 100 علامة بس ما بيعرفو أنو الأخطاء الإملائية
مهمة جداً و أنو عيب على طالب سنه رابعة يغلط إملائياً
طبعاً هادا غير الأخطاء القواعدية و بالنهاية الخطأ بالإجابة
و مشكور كتير دكتور و الله يكتر من أمثالك

تحية الك اخي الكريم و ينعاد عليك
و شكرا لكلامك اللطيف و مبروك النجاح بالمادة. يمكن اصعب الشي يعترف الطالب انو ممكن يكون عنده اخطاء و متل ما تفضلت الاخطاء الاملائية و القواعدية احيانا بتسبب الرسوب, يعني هل من المعقول طالب يرتكب اخطاء متل:
tow بدل two
thier بدل their

و هادا شي بسيط جدا مقارنة بباقي الاخطاء

تحياتي الك و بتمنالك التوفيق

كل عام وانت بخير دكتور ينعاد عليك بالصحة والعافية يا رب .  

و أنت بألف خير و ينعاد عليك و على الجميع
شكرا إلك

السلام عليكم ورحمة الله ..استاذنا الكريم  حقيقة انا عضوة جديدة في منتداكم القيم..خريجة كلية الترجمة الجزائر.
اوددت فقط  ان اشكر مساعيكم في خدمة الطلاب.فقد لفتت انتباهي طريقة التصحيح ...واسلوبكم البليغ وحتى اختيارات النصوص.
كثر الله من امثالكم ودمتم في خدمة العلم.
تحياتي لكل الدكاترة واعضاء المنتدى

و عليكم السلام
و اهلا و سهلا و بتمنالك الفائدة و التوفيق
تحياتي

بشكر الجميع ع أرائهم الخاصة
و بحب ضيف صح نحنا الطلاب نرتكب أخطاء كتيرة و بالتالي نرسب بالمادة بس هادا مو  يعني مع الاحترام للدكتور أنو ما في ظلم بالتصحيح أنا بالذات بعرف و متأكدة أنو أنظلمت بالإنشاء 3

شو السبب انو انظلمت بالانشاء؟
طالما في اخطاء معناها رح يروح علامات على كل خطأ. و بالانشاء في قواعد و املاء و اسلوب و افكار و ترتيب الافكار يعني الشغلة ما مجرد كتبنا موضوع معناها نجحنا. انت متأكده انو كل هل الشي صح عندك؟
اكتبي كيف جاوبتي على الاسئلة بالفحص او اكتبي موضوع من اختيارك لحتى نشوف مستوى كتابتك و بعدها بنحكم اما التصحيح ما في ظلم لانو بنهاية الامر امتحان و التصحيح حسب الشي الموجود على ورقة الامتحان فقط. اذا شكسبير بيكتب موضوع و بيطلعله اخطاء و الافكار ما لا علاقة بالموضوع بده يرسب.
ممكن تجربي تشوفي ورقتك بعد موافقة العميد و ساعتا بتعرفي ليش رسبتي.
اما تقولي انو متأكدة انو انظلمت فهادا كلام باطل
تحياتي

طيب هلأ هاد الكلام صح انو بمواد متل القواعد والانشا والترجمة في مجال كتير كبير انو الواحد يطلع عندو أخطاء إملائية أو قواعدية...بس بالمواد الحفظية متل النثر والشعر والمسرح والقصة انو صارت معي اني كتبت متل مو الدكتور حاكي بالحرف ومتل مانو طالب لي لحتى آخد بالخمسين...يعني بهيك مواد الطالب بيكون عرفان بالضبط شو كاتب!!!!!

المواد الأدبية الموضوع فيا مختلف, لانو و هادا توقع ما اكتر, التركيز بكون على الافكار و طريقة الاجابة. و لكن هل الشي ما معناه انو المدرس ما رح يحاسب على الاخطاء القواعدية. انا بنصحك اختي الكريمة انو ما تتوقعي علامتك بأي مادة لانو ممكن تكون كاتبة شي هو باعتقادك صح و ممكن على السرعة يكون في اخطاء قواعد و املاء انت غافلة عنا, و لذلك اذا طلعت المادة راسبة او علامة متدنية ممكن تنزعجي و تتفاجئي و لذلك الحضور مهم لانو بتوقع انو المدرس من خلال المحاضرات ممكن يلمح او يصرح بالاسلوب المطلوب او بطريقة الاجابة الصحيحة بالامتحان. احيانا انو تحفظي بصم و تكتبي بس بنظر المصحح ممكن يكون هل الشي سيء لانو بتصير الطلاب متل آلة التصوير, حفظ بصم و نسخ على ورقة الاجابة و اذا في 1000 دفتر للتصحيح و كله كاتب نفس الشي ما رح يصير في تميز و المصحح ما رح يعرف اذا انت فعلا فهمانة الشي اللي كاتبتيه او على الاقل انو عندك القدرة انو تفكري و تعبري عن افكارك بلغتك الخاصة و بهل الحالة بصير في تميز و بتصير علامتك افضل.
بتمنى انو تكون النقطة وضحت
و بالتوفيق للجميع